Read Iban Penyampau 28 Bible Online

Penyampau 28 - Iban bible

Penyampau 28

¹TUHAN ngasuh Moses

²ngajar orang Israel chara ngenjuk piring ti diberi ngena api ngagai Allah Taala, ti ngerinduka ati Iya, ba maya ti udah diletak.

³Tu bagi piring ti diberi ngena api ti enda tau enda diberi ngagai TUHAN. Ke piring tunu tiap hari: beri dua iku anak domba ti lelaki, ti umur setaun, ti nadai penimpang.

⁴Beri anak domba ti terubah, lebuh pagi hari, lalu iya ti kedua, lemai hari.

⁵Lalu ke genap iku jelu nya, beri piring gandum, iya nya sekilogram tepung, ti dichampur enggau seliter minyak kana ti pemadu manah.

⁶Tu piring ti diberi tiap hari, ti ditunu, ti terubah diberi ba Bukit Sinai nyadika piring ti diberi ngena api, ti bebau rengut ke TUHAN.

⁷Ke piring wain ti diberi sama enggau anak domba ti terubah, tuang seliter wain ba alta nya.

⁸Lemai nya, beri anak domba ti kedua, baka chara ti ngenjuk piring lebuh pagi nya, sama enggau piring wain. Nya mega nyadika piring ti diberi ngena api ti bebau rengut ke TUHAN.

⁹Ba Hari Sabat, beri dua iku anak domba ti lelaki, ti umur setaun, ti nadai penimpang, dua kilogram tepung ti dichampur enggau minyak kana nyadika piring gandum, sereta enggau piring wain.

¹⁰Piring ti ditunu tu deka diberi genap Hari Sabat, nambahka piring ti diberi tiap hari, sereta enggau piring wain.

¹¹Beri piring tunu ngagai TUHAN ba genap pun bulan, iya nya dua iku sapi ti lelaki ti agi biak, siku bedus ti lelaki, tujuh iku anak domba ti lelaki, semua nadai penimpang magang.

¹²Nyadi ke piring gandum, beri tepung dichampur enggau minyak kana, baka tu: ke genap iku sapi ti lelaki, beri tiga kilogram tepung. Ke siku bedus ti lelaki, beri dua kilogram tepung.

¹³Ke siku anak domba, beri sekilogram tepung. Piring ti ditunu tu nyadika piring ti diberi ngena api, ti bebau rengut ke TUHAN.

¹⁴Piring wain ti patut diberi nya dua liter wain ke genap iku sapi ti lelaki, satu setengah liter wain ke siku bedus ti lelaki, enggau seliter wain ke siku anak domba. Tu adat kena ngenjuk piring kena satu hari bulan ke tiap-tiap bulan sepemanjai taun.

¹⁵Lalu nambahka piring tunu ti diberi tiap hari, sama enggau piring wain, beri mega siku kambin ti lelaki nyadika piring pengampun dosa.

¹⁶ Gawai Paska ti dikena ngemesaika TUHAN, enda tau enda diintu kena empat belas hari bulan ti kesatu.

¹⁷ Kena lima belas hari bulan ti kesatu, Gawai Roti Ti Enda Beragi deka berengkah lalu deka diintu tujuh hari. Lebuh maya nya, semina roti ti enda beragi aja tau diempa.

¹⁸Ba hari ti keterubah, kita enda tau enda besembiang bebala mayuh, lalu kita enda tau gawa sehari nya.

¹⁹Beri piring tunu nyadika piring ti diberi ngena api ngagai TUHAN, iya nya, dua iku sapi ti lelaki, siku bedus ti lelaki, enggau tujuh iku anak domba ti lelaki ti umur setaun, ti nadai penimpang.

²⁰Beri piring ti menyana ti digaga ari tepung dichampur enggau minyak kana baka tu: tiga kilogram ke genap iku sapi ti lelaki, dua kilogram ke siku bedus ti lelaki,

²¹enggau sekilogram ke genap iku anak domba.

²²Beri mega siku kambin ti lelaki nyadika piring pengampun dosa. Nya chara kita ngereja pengawa nuchi orang mayuh.

²³Beri piring tu kena nambahka piring tunu, ti diberi tiap pagi.

²⁴Baka nya mega, dalam kandang tujuh hari, beri piring ti diberi ngena api ngagai TUHAN, ti bebau rengut lalu ngelantangka Iya. Beri piring tu nambahka piring tunu enggau piring wain ti diberi tiap hari.

²⁵Kita enda tau enda besembiang bebala mayuh ba hari ti ketujuh, lalu anang gawa.

²⁶ Ba hari ti keterubah ke Gawai Ngetau, lebuh kita meri ngagai TUHAN piring gandum ari gandum ti baru udah diketau kita, kita enda tau enda besembiang bebala mayuh, lalu kita enda tau gawa.

²⁷Beri piring tunu nyadika piring ti bebau rengut ke TUHAN, iya nya, dua iku sapi ti lelaki ti agi biak, siku bedus ti lelaki, enggau tujuh iku anak domba ti lelaki, ti umur setaun. Semua sida tu nadai penimpang magang.

²⁸Beri piring gandum ti digaga ari tepung ti pemadu alus dichampur enggau minyak kana, iya nya, tiga kilogram ke genap iku sapi ti lelaki, dua kilogram ke siku bedus ti lelaki,

²⁹enggau sekilogram ke siku anak domba.

³⁰Beri mega siku kambin ti lelaki nyadika piring pengampun dosa. Nya meh chara kita ngereja pengawa nuchi orang mayuh.

³¹Beri piring tu enggau piring wain, kena nambahka piring tunu ti diberi kita tiap hari, enggau piring gandum.