Read Iban Penyampau 29 Bible Online

Penyampau 29 - Iban bible

Penyampau 29

¹“Kena satu hari bulan ti ketujuh, kita enda tau enda besembiang bebala mayuh, lalu enda gawa. Ba hari nya, terumpit deka disepu.

²Beri siti piring tunu, ti bebau rengut ngagai TUHAN. Piring nya nyengkaum: siku sapi ti lelaki, siku bedus ti lelaki, enggau tujuh iku anak domba ti lelaki, ti umur setaun. Semua sida nya nadai penimpang magang.

³Beri piring gandum kita, iya nya tepung ti pemadu alus ti udah dichampur enggau minyak kana, baka tu: tiga kilogram tepung ke siku sapi ti lelaki, dua kilogram tepung ke siku bedus ti lelaki,

⁴enggau sekilogram ke siku anak domba.

⁵Beri mega siku kambin nyadika piring pengampun dosa. Nya meh chara kita ngereja pengawa nuchi orang mayuh ari dosa sida.

⁶Beri semua piring tu nambahka piring tunu ti diberi genap satu hari bulan, sama enggau piring gandum, enggau piring wain. Piring ti diberi ngena api tu bebau rengut ke TUHAN.

⁷ “Kena sepuluh hari bulan ti ketujuh, kita enda tau enda besembiang bebala mayuh lalu bepasa; kita enda tau gawa,

⁸tang meri siti piring ti bebau rengut ngagai TUHAN, iya nya, siku sapi ti lelaki ti agi biak, siku bedus ti lelaki, enggau tujuh iku anak domba ti lelaki, ti umur setaun. Semua sida tu nadai penimpang magang.

⁹Beri tepung ti udah dichampur enggau minyak kana nyadika piring gandum, iya nya, tiga kilogram tepung ke siku sapi ti lelaki, dua kilogram ke siku bedus ti lelaki,

¹⁰enggau sekilogram ke siku anak domba.

¹¹Beri mega siku kambin ti lelaki nyadika piring pengampun dosa, nambahka kambin ti diberi ba pengawa nuchi orang mayuh ari dosa sida, enggau piring tunu sereta enggau piring gandum, enggau piring wain.

¹² “Kena lima belas hari bulan ti ketujuh, kita enda tau enda besembiang bebala mayuh; kita enda tau gawa, lalu kita enda tau enda ngintu gawai tu ke TUHAN tujuh hari.

¹³Ba hari ti keterubah, beri piring ti diberi ngena api, ti bebau rengut ngagai TUHAN, iya nya, tiga belas iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki ti umur setaun. Semua sida nya nadai penimpang magang.

¹⁴Beri tepung ti udah dichampur enggau minyak kana nyadika piring gandum kita, iya nya, tiga kilogram ke siku sapi ti lelaki, dua kilogram ke siku bedus ti lelaki,

¹⁵enggau sekilogram ke siku anak domba, sama enggau piring wain nitihka penyampau ti diguna.

¹⁶Beri mega siku kambin ti lelaki nyadika piring pengampun dosa. Beri semua piring tu nambahka piring tunu enggau piring gandum, enggau piring wain, ti endang diberi tiap hari.

¹⁷Ba hari ti kedua, beri dua belas iku sapi ti lelaki, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang.

¹⁸Beri enggau jelu nya semua piring ti bukai baka ke diguna ba hari ti keterubah.

²⁰Ba hari ti ketiga, beri sebelas iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang.

²¹Beri sama enggau sida nya semua piring bukai baka ke diguna ba hari ti keterubah.

²³Ba hari ti keempat, beri sepuluh iku sapi ti lelaki ti agi biak, dua iku bedus ti lelaki, enggau empat belas iku anak domba ti umur setaun. Semua sida tu nadai penimpang magang.

²⁴Beri sama enggau sida nya semua piring bukai baka ke diguna ba hari ti keterubah.

²⁶Ba hari ti kelima, beri semilan iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang.

²⁷Beri sama enggau sida nya semua piring bukai baka ke diguna ba hari ti keterubah.

²⁹Ba hari ti keenam, beri lapan iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang.

³⁰Beri enggau sida nya semua piring bukai baka ke diguna ba hari ti keterubah.

³²Ba hari ti ketujuh, beri tujuh iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki ti umur setaun. Semua sida nya nadai penimpang magang.

³³Beri sida nya sama enggau piring bukai baka ke diguna ba hari ti keterubah.

³⁵Ba hari ti kelapan, kita enda tau enda besembiang bebala mayuh, lalu anang gawa.

³⁶Beri siti piring tunu nyadika piring ti diberi ngena api ngagai TUHAN, ti bebau rengut ke Iya, baka tu: siku sapi ti lelaki ti agi biak, siku bedus ti lelaki, enggau tujuh iku anak domba ti lelaki, ti umur setaun. Semua sida nya nadai penimpang magang.

³⁷Beri sama enggau sida nya semua piring bukai baka ke diguna ba hari ti keterubah.

³⁹Tu meh adat pasal ngenjuk piring tunu, piring gandum, piring wain, enggau piring pemaik, ti enda tau enda diberi kita ngagai TUHAN, ba gawai ti udah diletak. Piring tu nambahka piring ti diberi kita lebuh kita ngamatka semaya, sereta nambahka piring ti diberi kita nitihka peneka ati diri.

⁴⁰Moses madahka ngagai orang Israel semua utai ti udah dipesanka TUHAN ngagai iya.