Read Iban Penyampau 3 Bible Online

Penyampau 3 - Iban bible

Penyampau 3

¹Tu ruang bilik Aron enggau Moses lebuh TUHAN bejaku ngagai Moses ba Bukit Sinai.

² Tu nama anak lelaki Aron: Nadap anak tuai iya, Abihu, Eleasar, enggau Itamar.

³Sida tu udah ditata sereta dichiri nyadi imam,

⁴ tang Nadap seduai Abihu dibunuh TUHAN, lebuh seduai iya meri api ti enda kudus ngagai TUHAN, di menua puang Sinai; lalu seduai iya nadai purih. Nya alai Eleasar seduai Itamar bekereja nyadi imam sepemanjai umur apai seduai iya Aron.

⁵Ku TUHAN bejaku ngagai Moses,

⁶“Bai orang Lewi ke mua, lalu letak sida bekereja ke Imam Aron.

⁷Sida deka ngereja pengawa ke iya enggau ke semua orang Israel di mua Langkau Kain TUHAN, lebuh sida gawa dalam langkau sembiang.

⁸Sida deka ngemataka semua pekekas ke Langkau Kain TUHAN, lalu ngereja pengawa ke semua orang Israel, lebuh sida gawa dalam langkau sembiang.

⁹Lalu nuan enda tau enda nyerahka orang Lewi ngagai Aron enggau ngagai anak lelaki iya. Semua orang Lewi diserahka magang ngagai iya ari orang Israel.

¹⁰Lalu nuan enda tau enda ngeletak Aron enggau anak lelaki iya ngereja semua pengawa imam; tang enti orang bukai datai semak ngagai Langkau Kain TUHAN, orang nya enda tau enda dibunuh.”

¹¹Ku TUHAN bejaku ngagai Moses,

¹² “Dinga nuan, Aku udah ngambi orang Lewi ari orang Israel, kena nganti semua anak tuai orang Israel. Orang Lewi diempu Aku,

¹³laban semua anak tuai endang enggi Aku magang; lebuh Aku munuh anak tuai orang Ejip, Aku nyeraraka semua anak tuai orang Israel nyadika enggi Aku, nyengkaum anak tuai mensia enggau anak tuai jelu. Sida endang enggi Aku: Aku tu TUHAN.”

¹⁴Lalu ku TUHAN bejaku ngagai Moses di menua puang Sinai,

¹⁵ “Itung pemayuh tubuh orang Lewi, nitihka ruang bilik, enggau suku raban bansa sida; itung magang semua anak lelaki ari umur sebulan ke atas.”

¹⁶Moses lalu ngitung sida nitihka jaku pesan TUHAN.

¹⁷Baka tu ku nama anak lelaki Lewi: Gerson, Kohat enggau Merari.

¹⁸Lalu nama anak lelaki Gerson: Libni seduai Simei.

¹⁹Anak lelaki Kohat nitihka suku raban bansa sida: Amram, Isar, Hebron, enggau Usil.

²⁰Lalu anak lelaki Merari nitihka suku raban bansa sida: Mahli enggau Musi. Sida tu orang ke nurunka ruang bilik orang Lewi.

²¹Gerson nurunka suku raban bansa Libni enggau Simei. Nya meh suku raban bansa ari peturun Gerson.

²²Pemayuh semua orang lelaki ke umur sebulan ke atas, ke dituliska nama nya 7,500 iku.

²³Bala suku raban bansa ari peturun Gerson diasuh nirika kem sida ari belakang langkau sembiang nya, muak ke barat,

²⁴lalu sida iya diuluka Eliasap anak Lael.

²⁵Lalu tanggungjawap peturun Gerson dalam Langkau Kain TUHAN nya ngemataka langkau sembiang, sereta enggau semua tudung ti di dalam, tudung ti di luar, kain tirai ti ba penama ngagai Langkau Kain TUHAN,

²⁶kain tirai ke tengah laman ti ngelingi langkau sembiang enggau alta, enggau kain tirai ke pintu penama ngagai tengah laman Langkau nya. Sida mega betanggungjawapka semua pengawa ti besangkut-paut enggau semua utai nya.

²⁷Kohat nurunka suku raban bansa Amram, Isar, Hebron enggau Usil. Sida tu meh suku raban bansa ti diturunka Kohat.

²⁸Pemayuh orang ke umur sebulan ke atas, ke dituliska nama nya 8,600 iku, lalu sida nya deka bekereja dalam Langkau Kain TUHAN.

²⁹Semua suku raban bansa ti diturunka Kohat deka nirika kem sida ba tisi selatan langkau sembiang,

³⁰diuluka Elisapan anak Usil.

³¹Lalu bala sida tu betanggungjawapka Peti Lampang Batu Adat, mija, penuduk lampu, alta, enggau perengka ti dikena imam dalam Langkau Kain TUHAN, enggau kain tirai ti ba penama ngagai Endur ti Pemadu Kudus. Sida betanggungjawapka semua pengawa ti besangkut-paut enggau semua utai nya.

³²Tuai ke semua orang Lewi nya Eleasar anak Imam Aron. Iya nyadi tuai ke orang ke bekereja dalam Langkau Kain TUHAN.

³³Peturun Merari nyengkaum suku raban bansa Mahli enggau Musi. Nya meh peturun Merari.

³⁴Pemayuh orang ke lelaki ari umur sebulan ke atas, ke dituliska nama nya 6,200 iku,

³⁵lalu semua suku raban bansa tu diuluka Suril anak Abihail. Sida deka nirika kem sida ba tisi utara langkau sembiang.

³⁶Lalu peturun Merari deka betanggungjawapka langkar langkau sembiang, alang dinding, tiang, pelasar, enggau semua utai ti dikena nirika Langkau nya. Sida betanggungjawapka semua pengawa ti besangkut-paut enggau semua utai nya.

³⁷Sida mega betanggungjawapka tiang, pelasar, tiang bantil, enggau tali ti dikena ba tengah laman.

³⁸Moses seduai Aron, enggau anak lelaki Aron deka nirika kem sida di mua langkau sembiang, muak ke timur, di mua Langkau Kain TUHAN tunga ngagai mata hari tumbuh. Sida betanggungjawap ngereja pengawa dalam Langkau Kain TUHAN, ke orang Israel. Enti orang bukai datai semak ngagai Langkau Kain TUHAN, orang nya enda tau enda dibunuh.

³⁹Pemayuh semua orang Lewi ti lelaki, ke umur sebulan ke atas, ti udah diitung Moses seduai Aron nitihka pesan TUHAN, nya 22,000 iku.

⁴⁰Lalu ku TUHAN bejaku ngagai Moses, “Itung lalu tuliska nama semua anak tuai orang Israel ti lelaki, ari umur sebulan ke atas.

⁴¹Ambi orang Lewi ke Aku, kena nganti sida. Lalu ambi semua jelu tupi orang Lewi kena nganti anak tuai jelu tupi ti lelaki ti diempu orang Israel. Aku tu TUHAN.”

⁴²Moses lalu nuliska nama semua anak tuai orang Israel ti lelaki nitihka pesan TUHAN.

⁴³Lalu semua anak tuai ti lelaki ke umur sebulan ke atas dituliska nama magang, lalu pemayuh sida nya 22,273 iku.

⁴⁴Lalu ku TUHAN bejaku ngagai Moses,

⁴⁵“Ambi orang Lewi kena nganti semua anak tuai orang Israel ti lelaki, enggau jelu tupi orang Lewi, kena nganti anak tuai jelu tupi ti lelaki ari orang Israel, ngambika orang Lewi diempu Aku. Aku tu TUHAN.

⁴⁶Lalu kena nebus 273 iku anak tuai orang Israel ti lelaki, ke lebih ari pemayuh tubuh orang Lewi ti lelaki,

⁴⁷kita enda tau enda ngambi lima singkap duit pirak ke genap iku sida, nitihka rega ti udah diletak dalam Langkau Kain TUHAN,

⁴⁸lalu beri duit nya ngagai Aron enggau ngagai bala anak lelaki iya.”

⁴⁹Nya alai Moses ngambi duit tebus ke 273 iku orang Israel ke mayuh agi ari orang Lewi;

⁵⁰Iya ngambi duit tebus nya ari anak tuai ti lelaki orang Israel. Penyampau duit nya 1,365 singkap pirak, nitihka rega ti udah diletak dalam Langkau Kain TUHAN;

⁵¹lalu meri duit tebus nya ngagai Aron enggau bala anak lelaki iya, nitihka pesan TUHAN ngagai Moses.