Read Iban Penyampau 30 Bible Online

Penyampau 30 - Iban bible

Penyampau 30

¹Moses meri atur tu ngagai bala tuai raban bansa orang Israel.

² “Lebuh orang besemaya deka meri utai ngagai TUHAN, tauka ngangkatka sumpah kena ngemaduka diri makai sekeda utai, orang nya enda tau mungkir ari semaya nya, tang ngereja semua utai ti disebut iya.

³Lebuh indu ke agi biak, ti agi diau dalam rumah apai iya, ngaga semaya deka meri utai ngagai TUHAN, tauka besemaya deka badu agi makai sekeda utai,

⁴iya enda tau enda ngereja semua utai ti disemaya iya, enti apai iya enda nagang iya lebuh iya ninga pasal semaya nya.

⁵Tang enti apai iya nagang iya ngamatka semaya iya, lebuh apai iya ninga pasal semaya nya, indu nya enda ibuh ngamatka semaya nya. TUHAN deka ngampun iya, laban apai iya nagang iya ngamatka semaya nya.

⁶Enti indu ke apin belaki ngaga siti semaya, nemuka sengaja tauka enda sengaja, tauka besemaya deka badu agi makai sekeda utai, lalu udah nya belaki,

⁷iya enda tau enda ngereja semua utai ti udah disemaya iya, enti laki iya enda nagang iya lebuh laki iya ninga pasal utai nya.

⁸Tang enti laki iya nagang iya ngamatka semaya nya lebuh iya ninga pasal utai nya, indu nya enda ibuh ngamatka semaya nya. TUHAN deka ngampun iya.

⁹Indu ke balu tauka indu ke udah sarak enda tau enda ngamatka semua semaya iya.

¹⁰Enti indu ke udah belaki ngaga semaya, tauka besemaya deka badu agi makai sekeda utai,

¹¹iya enda tau enda ngereja semua utai ti udah disemaya iya, tauka udah dijanji iya, enti laki iya enda nagang iya lebuh laki iya ninga pasal utai nya.

¹²Tang enti laki iya nagang iya ngamatka semaya nya, lebuh laki iya ninga pasal semaya nya, indu nya enda ibuh ngamatka semaya nya. TUHAN deka ngampun iya, laban laki iya udah nagang iya ngamatka semaya nya.

¹³Laki iya bisi kuasa netapka, tauka muai, sebarang semaya tauka janji ti udah digaga bini iya.

¹⁴Tang enti laki enda nagang bini iya lebuh iya ninga pasal semaya bini iya, bini iya enda tau enda ngereja semua utai ti udah disemaya tauka dijanji iya. Enti laki iya enda nagang iya lebuh laki iya ninga pasal semaya nya, reti nya iya netapka semaya nya.

¹⁵Tang enti, udah lepas nya, laki iya ngetas semaya nya, laki iya deka betanggungjawapka penyalah bini iya.

¹⁶Tu meh adat ti diberi TUHAN ngagai Moses ba pasal semaya ti digaga indu ke apin belaki, ti agi diau dalam rumah apai iya, tauka semaya ti digaga indu ke udah belaki.