Read Iban Penyampau 32 Bible Online

Penyampau 32 - Iban bible

Penyampau 32

¹Raban bansa Reuben enggau Gat mayuh amat jelu tupi. Lebuh sida meda pemanah menua Joser enggau menua Giliat alai nupi jelu,

²sida mansang ngagai Moses, Eleasar enggau bala tuai orang Israel ti bukai, lalu bejaku,

³“Menua ti udah dialahka TUHAN ti orang Israel, iya nya, nengeri Atarot, Dibon, Jaser, Nimrah, Hesbon, Elialih, Sibmah, Nebo, enggau Beon, manah alai nupi jelu, lalu jelu tupi kami pen mayuh.

⁵Nya alai kami minta nuan meri ngagai kami menua tu nyadika pesaka kami, lalu anang mai kami meraka Sungai Jordan, lalu diau din.”

⁶Disaut Moses, “Kati kita deka diau ditu lalu nejuka bala orang Israel ti bukai mansang beperang?

⁷Nama kebuah kita berani ngasuh orang Israel lemi semengat lalu enggai meraka Sungai Jordan ngagai menua ti udah diberi TUHAN ngagai sida?

⁸ Nya meh utai ti udah dikereja aki ini kita kelia, lebuh aku ngasuh sida bejalai ari Kades-barnea lalu matau menua tu.

⁹Sida bejalai naka Lebak Eskol, lalu meda menua nya, tang lebuh sida pulai, sida ngasuh orang lemi semengat ngambika sida enda mansang ngagai menua ti udah diberi TUHAN ngagai sida.

¹⁰ Ba hari nya TUHAN ringat, lalu Iya besumpah, ku Iya,

¹¹‘Laban sida enda taluk ngagai Aku, nya alai Aku besumpah: nadai siku lelaki ke umur dua puluh taun ke atas, ke pansut ari menua Ejip, deka datai ba menua ti udah disemaya Aku ngagai Abraham, Isak enggau Jakop.’

¹²Tu nyengkaum semua orang, kelimpah ari Kalep anak Jepuneh orang Kenas, enggau Josua anak Nun, ke mengkang taluk ngagai TUHAN.

¹³TUHAN ringat ngagai orang mayuh lalu ngasuh sida bejalai segau-segau di menua puang empat puluh taun, datai ke semua orang ari serak ke ngeringatka ati TUHAN udah abis mati.

¹⁴Nyadi diatu kita udah nganti aki ini kita, kita ke rebak baru, ke bedosa, ke sedia deka nyungkak TUHAN ringat baru ngagai orang Israel.

¹⁵Enti kita raban bansa Reuben enggau Gat enggai nitihka TUHAN diatu, Iya deka, sekali agi, ninggalka semua orang tu di menua puang, lalu kita empu deka betanggungjawapka pemati sida.”

¹⁶Sida mansang ngagai Moses, lalu bejaku, “Awakka kami dulu ngaga kandang batu ke jelu bedus kami, enggau nengeri ti bekuta ke bala bini anak kami.

¹⁷Udah nya baru kami bejalai enggau bala orang Israel ti bukai mansang beperang, lalu nguluka bala nyerang, datai ke kami udah ngentapka sida di menua ti endang ungkup sida. Lebuh maya nya ila, bala anak bini kami ulih diau dalam nengeri ti bekuta ditu, likun ari serang orang ke bempu menua tu.

¹⁸Kami enda pulai ngagai rumah kami empu sebedau semua orang Israel bempu menua ti diungkup ngagai sida.

¹⁹Kami enda ngambu menua ti diempu sida di seberai Sungai Jordan din, laban kami udah nerima ungkup kami tunga ke timur Sungai Jordan ditu.”

²⁰Disaut Moses, “Enti kita ngereja nya, enti kita amat deka sedia di mua TUHAN lalu mansang beperang,

²¹lalu semua bala soldadu kita meraka Sungai Jordan, nyentuk ngagai maya TUHAN udah muru semua munsuh Iya,

²²lalu udah ngalahka menua sida, nya baru kita tau pulai, lalu dilepaska ari semua tanggungjawap kita ngagai TUHAN, enggau ngagai orang Israel ti bukai. Nya baru TUHAN deka ngumbai menua tunga ke timur Sungai Jordan nya menua kita.

²³Tang enti kita enda ngereja nya, kita bedosa ngelaban TUHAN. Lalu anang saru: dosa kita deka tetemuka kita. [32]

²⁴Gaga meh nengeri ke bala anak kita, enggau kandang jelu ke bedus [33]kita, tang kereja utai ti udah disemaya kita!”

²⁵Ku orang ari raban bansa Gat enggau raban bansa Reuben bejaku ngagai Moses, “Tuan, kami deka ngereja nitihka asuh nuan.

²⁶Bala bini, bala anak kami enggau jelu sapi, enggau jelu bedus kami deka mengkang ditu di nengeri di menua Giliat tu;

²⁷tang semua kami deka meraka Sungai Jordan, sedia deka beperang ke TUHAN, munyi ti diasuh nuan.”

²⁸ Moses lalu meri atur pasal sida ngagai Imam Eleasar, ngagai Josua anak Nun, enggau ngagai bala tuai orang Israel ti bukai:

²⁹Ku Moses bejaku ngagai sida, “Enti raban bansa Gat enggau raban bansa Reuben meraka Sungai Jordan lalu sedia deka beperang nitihka atur TUHAN, lalu enti ari saup sida, kita ulih ngalahka menua tu, kita enda tau enda meri menua Giliat nyadika pesaka sida.

³⁰Tang enti sida enda meraka Sungai Jordan, lalu enda mansang beperang enggau kita, sida enda tau enda diberi ungkup di menua Kanaan, baka kita bukai.”

³¹Bala raban bansa Gat enggau bala raban bansa Reuben lalu nyaut, “Tuan, kami deka ngereja utai nitihka jaku TUHAN.

³²Kami deka meraka ngagai menua Kanaan lalu beperang di baruh atur TUHAN, tang kami deka mengkang bempu pesaka ditu muak ke timur Sungai Jordan tu.”

³³Nya alai Moses meri ngagai bala raban bansa Gat, ngagai bala raban bansa Reuben, enggau ngagai setengah ari raban bansa Manasi, semua menua ti udah diempu Sihon, raja orang Amor, enggau menua ti udah diempu Og, raja ke merintah di Basan, nyengkaum nengeri enggau menua ti ngelingi menua nya.

³⁴Raban bansa Gat lalu nirika baru nengeri ti bekuta ke benama Dibon, Atarot, Aroer,

³⁵Atrot, Sopan, Joser, Jogbehah,

³⁶Bet Nimrah, enggau Bet Haran.

³⁷Raban bansa Reuben nirika baru nengeri Hesbon, Elealeh, Kiriataim,

³⁸Nebo, Baal-meon (nama tu udah diubah) enggau Sibmah. Sida meri nama ti baru ngagai nengeri ti diaduka sida.

³⁹Bala raban peturun Machir anak Manasi nyerang menua Giliat, ngalahka menua nya, lalu muru orang Amor ti diau dia.

⁴⁰Nya alai Moses meri menua Giliat ngagai raban peturun Machir, lalu sida diau dia.

⁴¹Jair, ari raban bansa Manasi, nyerang lalu ngalahka sekeda genturung pendiau, lalu ngumbai genturung pendiau nya “Tumpuk Pendiau Jair.”

⁴²Nobah nyerang lalu ngalahka Kenat enggau genturung pendiau ti ngelingi nya, lalu iya ngumbai genturung pendiau nya “Kampung Nobah”, ngangkatka nama iya empu.