Read Iban Penyampau 33 Bible Online

Penyampau 33 - Iban bible

Penyampau 33

¹Jerita tu madahka nama endur alai orang Israel ke nirika kem sida, udah bekau sida ke pansut ari menua Ejip, nitihka raban bansa sida empu, diuluka Moses seduai Aron.

²Ari asuh TUHAN, Moses nuliska nama endur alai genap kali sida nirika kem.

³Orang Israel pansut ari menua Ejip kena lima belas hari bulan ti kesatu taun nya, sehari udah bekau sida ke ngintu Gawai Paska ti keterubah iya. Sida dijaga TUHAN lebuh sida angkat ninggalka nengeri Rameses dipeda semua orang Ejip,

⁴ke benung nguburka anak tuai sida ke lelaki, ti udah dibunuh TUHAN. TUHAN ngereja nya kena Iya mandangka Diri lebih agi bekuasa ari petara menua Ejip.

⁵Orang Israel ninggalka nengeri Rameses, lalu nirika kem di Sukot.

⁶Kem sida ke nangkanka nya, didirika sida di Etam, ba tisi menua puang.

⁷Ari nya sida nikal baru ngagai Pi-hahirot, muak ke timur Baal-sepon, lalu nirika kem sida semak Mikdol.

⁸Sida ninggalka Pi-hahirot, lalu bejalai nengah Tasik Mirah ngagai menua puang Sur. Lebuh sida udah bejalai tiga hari, sida lalu nirika kem di Marah.

⁹Ari nya sida bejalai ngagai Elim, alai sida ke nirika kem, laban ba endur nya bisi dua belas iti mata ai, enggau tujuh puluh pun kayu engkerema.

¹⁰Sida ninggalka Elim lalu nirika kem semak Teluk Suez.

¹¹Nangkanka nya, sida nirika kem di menua puang Sin.

¹²Udah nya sida nirika kem di Dopkah,

¹³lalu udah bekau nya, di Alus.

¹⁴Udah nya sida nirika kem di Repidim, endur ti nadai ai irup.

¹⁵Dalam pejalai sida ari Repidim ngagai Bukit Hor, sida nirika kem di menua puang Sinai, Kibrot-hataba (tauka “Kubur Alai Orang Ke Tetenguk’), Heserot, Ritmah, Rimon-peres, Libnah, Risah, Kehelatah, Bukit Seper, Haradah, Makelot, Tahat, Terah, Mitkah, Hasmonah, Moserot, Bene-jaakan, Hor-Gitgat, Jotbata, Abronah, Esion-geber, menua puang Sin (iya nya Kades), enggau Bukit Hor, ba tisi menua Edom.

³⁸ Imam Aron lalu niki ngagai Bukit Hor, nitihka pesan TUHAN. Iya mati dia lebuh umur iya seratus dua puluh tiga taun, kena satu hari bulan ti kelima, dalam taun ti keempat puluh udah bekau orang Israel pansut ari menua Ejip.

⁴⁰ Raja ke merintah di Arat, ti di selatan menua Kanaan, ninga berita orang Israel ti deka datai.

⁴¹Dalam pejalai sida ari Bukit Hor ngagai emperan menua Moap, orang Israel nirika kem sida ba Salmonah, Punon, Obot, ba tembawai Abarim di menua Moap, Dibon Gat, Almon Diplataim, Bukit Abarim semak Bukit Nebo, enggau ba emperan menua Moap ngimbai Sungai Jordan, di seberai nengeri Jeriko, entara Bet-Jesimot enggau Emperan Akasia.

⁵⁰Ba emperan menua Moap ngimbai Sungai Jordan ari seberai nengeri Jeriko, TUHAN bejaku ngagai Moses, ku Iya:

⁵¹“Bejaku nuan ngagai orang Israel, lalu sebut ngagai sida: ‘Lebuh kita meraka Sungai Jordan, ngagai menua Kanaan,

⁵²kita enda tau enda muru semua orang ke nguan menua nya. Rusak semua engkeramba sida ke digaga ari batu enggau ari besi, enggau semua endur alai sida besembiang.

⁵³Ambi menua nya lalu ngentapka diri dia, laban Aku udah meri menua nya ngagai kita nyadika pesaka kita.

⁵⁴ Bagi menua nya ngagai semua suku raban bansa orang Israel ngena chara bechabut undi, lalu beri ungkup ti besai agi ngagai suku raban bansa ti mayuh agi tubuh, enggau ungkup ti mit agi ngagai suku raban bansa ti mimit agi tubuh.

⁵⁵Tang enti kita enda muru orang ke nguan menua nya, sida ke agi tinggal deka ngachau kita baka empeleman ti ba mata kita enggau baka duri ti ngachuk rusuk kita; sida deka ngachau kita di menua ti diuan kita.

⁵⁶Lalu Aku deka ngerusak kita, baka Aku ti udah bekira deka ngerusak sida.’ ”