Read Iban Penyampau 35 Bible Online

Penyampau 35 - Iban bible

Penyampau 35

¹ Ku TUHAN bejaku ngagai Moses ba emperan Moap ngimbai tebing Sungai Jordan, di seberai nengeri Jeriko:

²“Padahka ngagai orang Israel, sida enda tau enda meri ari pesaka ti diterima sida, nengeri alai raban bansa Lewi diau; kita mega enda tau enda meri ngagai sida padang rumput ngelingi nengeri nya.

³Nengeri nya deka diempu orang Lewi, alai sida diau, lalu padang rumput nya alai sida nginang jelu sapi enggau semua jelu bukai ti diempu sida.

⁴Padang rumput ti diberi ngagai orang Lewi enda tau enda ngerembai ke luar lima ratus meter, belabuh ari dinding kuta nengeri nya, ngelingi nengeri nya,

⁵ngambika endur nya besegi empat, seribu meter panjai, enggau seribu meter buka, lalu nengeri nya ba tengah-tengah.

⁶Nengeri ti diberi kita ngagai orang Lewi enda tau enda nyengkaum enam buah nengeri alai ngerarika diri, alai orang ke tekelanjur munuh orang tau ngerarika diri; lalu nambahka nengeri nya, kita enda tau enda meri sida empat puluh dua buah nengeri ti bukai.

⁷Pemayuh semua nengeri ti diberi kita ngagai orang Lewi nya empat puluh lapan buah, lalu genap buah nengeri endang bisi padang rumput magang.

⁸Nyadi pasal pemayuh nengeri ti diberi siti-siti raban bansa ngagai orang Lewi, baka tu ku jalai ngira iya: raban bansa ti besai agi, deka meri mayuh agi nengeri, lalu raban bansa ti mit deka meri mimit agi nengeri, nitihka pemesai menua ti diempu raban bansa nya.”

⁹ Ku TUHAN bejaku ngagai Moses,

¹⁰“Bejaku nuan ngagai orang Israel, lalu sebut ngagai sida: ‘Lebuh kita meraka Sungai Jordan, lalu datai di menua Kanaan,

¹¹kita enda tau enda milih nengeri alai ngerarika diri, ti tau alai kita ngerarika diri enti kita tekelanjur munuh orang.

¹²Kita deka diau likun ba nengeri nya ari kaban belayan ke ngiga balas. Nadai orang ke dituduhka salah munuh orang, tau diukum bunuh sebedau iya kena pechara di mua orang mayuh.

¹³Nya alai pilih enam buah nengeri,

¹⁴tiga buah muak ke timur Sungai Jordan, lalu tiga buah di menua Kanaan.

¹⁵Nengeri nya deka nyadika nengeri alai ngerarika diri, diungkupka orang Israel enggau ke orang kampar ti diau lama tauka enda lama di menua kita. Barang sapa tekelanjur munuh orang, tau ngerarika diri ngagai nengeri nya.

¹⁶Tang enti kita ngena senyata besi tauka batu, tauka kayu, munuh orang nya, kita salah, lalu kita deka diukum bunuh.

¹⁹Kaban belayan ti nyempil ari orang ke mati nya, deka betanggungjawap munuh pemunuh nya. Lebuh kaban belayan nya tetemuka pemunuh nya, iya enda tau enda munuh pemunuh nya.

²⁰Enti kita begedika orang, ngejuka iya, tauka nikau iya ngena utai, lalu iya mati laban nya,

²¹tauka kita mukut iya, kita salah, lalu kita enda tau enda dibunuh. Kaban belayan ti nyempil ari orang ke kena bunuh nya bisi tanggungjawap munuh pemunuh nya. Lebuh iya nemu pemunuh nya, iya enda tau enda munuh iya.

²²Tang enti sema kita tekelanjur munuh orang ke ukai dipegedika kita, nemuka kita ngejuka iya, tauka nikau iya ngena utai,

²³tauka kita enda meda endur alai kita nikauka batu lalu tebunuhka orang nya, tang ukai laban kita deka ngemediska iya, lalu iya ukai mega munsuh kita;

²⁴ba pekara ti baka nya, orang di nengeri nya deka ngakim sereta ngarika kita enggau kaban belayan orang ke ngiga balas, lalu sida deka ngumbai kita enda salah.

²⁵Kita semina tekelanjur munuh orang nya, lalu orang di nengeri nya deka ngelepaska kita ari kuasa kaban belayan orang ke mati nya, lalu orang di nengeri nya deka mulaika kita ngagai nengeri ti alai kita ngerarika diri. Kita enda tau enda mengkang diau di nengeri nya nyentuk ngagai pemati orang ke nyadi Imam Besai lebuh utai nya nyadi.

²⁶Enti kita ninggalka nengeri ti udah alai kita ngerarika diri,

²⁷lalu enti kaban belayan orang ke mati nya tetemuka kita, lalu munuh kita, pengawa ti malas baka nya ukai penyalah munuh orang.

²⁸Barang sapa salah laban iya tekelanjur munuh orang, enda tau enda mengkang diau dalam nengeri alai iya ke ngerarika diri nyentuk ngagai maya Imam Besai mati. Udah nya baru kita tau pulai baru ngagai rumah diri empu.

²⁹Atur tu deka dikena kita enggau peturun kita di sebarang endur kita diau.

³⁰ Orang ke dituduhka munuh orang tau dikumbai salah, lalu diukum bunuh beduduk ba saksi dua tauka tiga iku orang. Jaku ari siku saksi aja enda chukup kena nuduhka orang nya salah munuh orang.

³¹Orang ke udah munuh orang enda tau enda dibunuh. Sida enda tau meri duit kena sida nyeliahka ukum nya.

³²Enti sida udah rari ngagai nengeri ti udah diletak alai ngerarika diri, anang ngemendarka sida nebus nyawa diri lalu pulai ngagai menua diri empu sebedau Imam Besai nya mati.

³³Enti kita nejuka sida ngereja nya, kita deka ngamahka menua ti alai kita diau. Pengawa bebunuhka orang ngamahka menua, lalu kita nadai jalai nuchi menua ti alai orang bisi udah dibunuh, kelimpah ari pemunuh nya empu dibunuh.

³⁴Anang ngamahka menua ti alai kita diau, laban Aku tu TUHAN, lalu Aku diau begulai enggau orang Israel.’ ”