Read Iban Penyampau 4 Bible Online

Penyampau 4 - Iban bible

Penyampau 4

¹Ku TUHAN bejaku ngagai Moses seduai Aron,

²“Itung semua orang Lewi ti lelaki ari raban peturun Kohat, nitihka nama ruang bilik sida,

³ari umur tiga puluh ngagai umur lima puluh taun, ti tau bekereja dalam Langkau Kain TUHAN, ngambika sida gawa dalam Langkau Kain TUHAN.

⁴Nya meh pengawa ke bala peturun Kohat dalam Langkau Kain TUHAN: ngemataka utai ti pemadu kudus.

⁵Lebuh kita deka mindahka kem kita, Aron enggau bala anak lelaki iya deka tama ngagai Langkau Kain TUHAN, nurunka kain tirai ti di mua Peti Lampang Batu Adat, lalu mungkur Peti nya ngena kain tirai nya.

⁶Sida enda tau enda map utai nya ngena kulit jelu ti alus, ngerembaika kain ti bechura biru ba atas nya, lalu udah nya, ngerasukka kayu pengaling.

⁷Sida deka ngerembaika kain ti biru ba atas mija ti alai meri roti ngagai TUHAN, lalu ngengkahka ba atas mija nya semua pinggai, mangkuk alai engkah menyan, mangkuk alai engkah piring, enggau tepayan alai nyimpan piring wain. Roti enda tau enda seruran bisi ba mija nya.

⁸Sida deka mungkur semua utai nya ngena kain ti mirah, ngengkahka kulit jelu ti alus ba atas utai nya, lalu udah nya ngerasukka kayu pengaling.

⁹Sida deka ngambi kain ti biru, lalu mungkur penuduk lampu sama enggau lampu, sepit, talam, enggau semua utai ti alai nyimpan minyak kana.

¹⁰Sida deka mungkus utai nya, enggau semua pekekas iya, ngena kulit ti alus, lalu ngengkahka utai nya ba langkar ti dikena ngesan iya.

¹¹Udah nya, sida deka mungkur alta emas ngena kain ti biru, ngengkahka kulit jelu ti alus ba atas alta nya, lalu udah nya, ngerasukka kayu pengaling.

¹²Sida deka ngambi semua perengka ti dikena dalam Langkau Kain TUHAN, malut utai nya ngena kain ti biru, ngengkahka kulit jelu ti alus ba atas sida, lalu ngengkahka utai nya ba kayu pengaling.

¹³Sida deka ngambi amau ti belemak ari alta nya, lalu mungkur utai nya ngena kain ungu.

¹⁴Sida deka ngengkahka ba atas utai nya semua pekekas ti dikena ngereja pengawa ba alta: talam bara api, pengait, sandak mit, enggau bisin. Udah nya sida deka map utai nya ngena kulit jelu ti alus, lalu ngerasukka kayu pengaling.

¹⁵Lebuh sida ngererak kem sida, bala raban peturun Kohat deka datai lalu ngesan utai ti kudus, lebuh Aron enggau bala anak lelaki iya udah tembu map semua utai nya sereta enggau pekekas sida. Bala raban peturun Kohat enda tau negu utai ti kudus nya, enggai ke sida mati. Nya meh tanggungjawap bala raban peturun Kohat lebuh Langkau Kain TUHAN dipindahka.

¹⁶“Lalu anak lelaki Imam Aron ke benama Eleasar deka betanggungjawapka semua langkau sembiang nya, minyak lampu, menyan, piring gandum, minyak tata, enggau semua utai bukai dalam Langkau Kain nya ti udah diseraraka ngagai TUHAN.”

¹⁷Ku TUHAN bejaku ngagai Moses seduai Aron,

¹⁸“Anang nejuka suku raban bansa Kohat

¹⁹datai semak ngagai utai ti pemadu kudus nya, enggai ke sida mati. Kena nagang sida mati, Aron enggau bala anak lelaki iya deka tama lalu ngagihka pengawa ngagai siku-siku sida, lalu madahka utai ti deka dibai sida.

²⁰Tang enti orang ari raban peturun Kohat tama ngagai Langkau Kain TUHAN, lalu tepedaka bala imam nyendiaka utai ti kudus ti deka dibai, [1] sida deka mati.”

²¹Ku TUHAN bejaku ngagai Moses,

²²“Itung pemayuh tubuh semua orang Lewi ti lelaki ari suku raban bansa Gerson, nitihka ruang bilik sida,

²³lalu tuliska nama sida ke umur entara tiga puluh ngagai lima puluh taun, ke nemu ngereja pengawa dalam Langkau Kain TUHAN.

²⁴Sida deka betanggungjawap mai utai tu:

²⁵Sida deka mai langkau sembiang, Langkau Kain TUHAN, tudung iya ti ari dalam, tudung iya ti ari luar, tudung iya ti digaga ari kulit jelu ti alus, tirai ke penama ngagai Langkau Kain TUHAN,

²⁶tirai enggau tali ti dikena ba tengah laman ti ngelingi langkau sembiang enggau alta, kain tirai ke pintu penama ngagai tengah laman nya, enggau semua perengka ti dikena nirika semua utai nya. Sida deka ngereja semua pengawa ti diguna ke semua utai nya.

²⁷Moses seduai Aron deka nentuka orang ari peturun Gerson ngereja semua pengawa nya, lalu mai semua utai ti diletak Aron enggau bala anak lelaki iya.

²⁸Nya meh tanggungjawap bala suku raban bansa Gerson dalam Langkau Kain TUHAN. Sida deka ngereja tanggungjawap nya dikemataka Itamar anak Imam Aron.

²⁹“Nyadi pasal peturun Merari, nuan enda tau enda ngitung tubuh sida, nitihka suku raban bansa enggau ruang bilik sida,

³⁰lalu tuliska nama semua lelaki ke umur entara tiga puluh ngagai lima puluh taun, ke nemu ngereja pengawa dalam Langkau Kain TUHAN.

³¹Sida deka betanggungjawap mai langkar, alang dinding, tiang, enggau pelasar ke langkau sembiang,

³²sereta enggau tiang, pelasar, tiang bantil, enggau tali ti dikena ba tengah laman ti ngelingi Langkau Kain nya, sereta enggau semua utai ti dikena nirika utai nya. Genap iku sida deka betanggungjawap mai utai ti diletak ke sida siku-siku.

³³Tu meh tanggungjawap bala suku raban bansa ari peturun Merari ti ngereja pengawa dalam Langkau Kain TUHAN. Sida deka bejalaika tanggungjawap nya dikemataka Itamar anak Imam Aron.”

³⁴Nitihka pesan TUHAN, Moses, Aron, enggau bala tuai orang mayuh lalu ngitung tubuh suku raban bansa Kohat, Gerson enggau Merari. Sida ngitung tubuh nitihka suku raban bansa enggau ruang bilik, lalu nuliska nama semua lelaki ke umur tiga puluh ngagai lima puluh taun, ke nemu ngereja pengawa dalam Langkau Kain TUHAN. Baka tu ku pemayuh tubuh sida: [Raban Peturun] — [Pemayuh tubuh] Kohat — 2,750 Gerson — 2,630 Merari — 3,200 Semua sida dipegulaika: — 8,580

⁴⁹Genap iku sida nya dituliska nama magang nitihka pesan TUHAN ngagai Moses. Lalu nitihka pesan TUHAN ngagai Moses, genap iku sida nya diberi tanggungjawap bekereja, tauka mai utai.