Read Iban Penyampau 5 Bible Online

Penyampau 5 - Iban bible

Penyampau 5

¹Ku TUHAN bejaku ngagai Moses,

²“Asuh orang Israel muai ari kem semua orang ke bisi penyakit kulit ti tau ngerampit, tauka bisi utai kamah ti pansut ari tubuh sida, enggau semua orang ke enda tuchi ketegal sida udah negu bangkai.

³Buru semua orang ke enda tuchi pansut, ngambika sida enda ngamahka kem ti alai Aku diau begulai enggau bala nembiak Aku.”

⁴Orang Israel lalu ngereja nya, lalu muai semua orang nya ari kem, munyi ti disebut TUHAN ngagai Moses.

⁵ Lalu ku TUHAN bejaku ngagai Moses,

⁶“Sebut ngagai orang Israel: Lebuh orang enda tetap ati ngagai TUHAN, lalu ngereja penyalah ngagai orang,

⁷iya enda tau enda ngaku dosa diri, lalu mayar semua utai ti patut dibayar iya, ditambahka enggau dua puluh peratus, ngagai orang ke udah alai iya ngereja penyalah.

⁸Tang enti orang nya udah mati, lalu nadai kaban belayan ti nyempil ti tau alai nyuaka bayar nya, bayar nya tau diberi ngagai TUHAN, ke guna imam. Bayar nya nambahka bedus ti lelaki ti dikena ngereja pengawa nuchi orang ke bepenyalah nya.

⁹Semua pemeri ti kudus ti diberi orang Israel ngagai TUHAN mega diempu imam ti alai sida nyuaka utai ti diberi nya.

¹⁰Imam deka bempu pemeri ti kudus ti diberi ngagai iya.”

¹¹Ku TUHAN bejaku ngagai Moses,

¹²“Sebut ngagai orang Israel: Enti bini nesatka diri lalu enda tetap ati ngagai laki iya;

¹³tauka iya beleman enggau lelaki bukai, lalu laki iya enda nemu nya, lalu iya enda ditemu udah ngereja nya, lalu orang pen nadai mega meda iya ngereja nya, laban iya enda kena tangkap ngereja nya;

¹⁴lalu enti laki iya ninding bini ti udah ngereja kereja ti kamah; tauka iya ninding bini iya, taja pen bini iya nadai udah ngereja kereja ti kamah;

¹⁵laki indu nya enda tau enda mai bini iya ngagai imam, sereta mai piring ti diguna ari indu, iya nya, sekilogram tepung barli, tang iya enda tau nuang minyak kana tauka meri rempah ngagai tepung nya, laban nya piring kena ngenselan iya ke ninding, kena mansutka penyalah.

¹⁶“Lalu imam nya deka mai indu nya ke mua, ngagai TUHAN,

¹⁷lalu imam nya deka ngambi ai ti kudus ngena mangkuk tanah, lalu ngambi amau[2] ari geladak langkau sembiang, lalu nuang amau nya ngagai ai ti kudus nya.

¹⁸Lalu imam nya deka ngasuh indu nya bediri di mua TUHAN, lalu muka sanggul indu nya, lalu ngengkahka ba jari indu nya piring gandum nya, iya nya piring kena ngenselan laki ke ninding. Lalu imam nya deka megai mangkuk ti ngundan ai ti dikumbai ai ti pait, ti mai sumpah.

¹⁹Udah nya, imam nya deka ngasuh indu nya besumpah. Ku iya, ‘Enti nuan nadai udah butang, nuan enda kena tinggang sumpah ti dibai ai tu.

²⁰Tang enti nuan udah butang,

²¹awakka TUHAN ngaga nama nuan nyadika leka jaku sumpah[3] ba bansa nuan empu, lebuh TUHAN ngasuh nuan tara, lalu sarang anak nuan deka bedarah.

²²Awakka ai sumpah tu tama ngagai perut nuan, lalu ngasuh perut nuan gentung, lalu ngasuh sarang anak nuan bedarah, lalu nuan deka tara!” Lalu indu nya deka nyebut, “Amin. Amin.”

²³“Udah nya, imam nya deka nuliska leka jaku sumpah nya, lalu masu tulis nya ngagai ai ti dikumbai ai ti pait;

²⁴lalu iya deka ngasuh indu nya ngirup ai nya, lalu ai nya deka tama ngagai tubuh indu nya, lalu ngasuh iya balat pedis.

²⁵Imam nya deka ngambi piring nya ari jari indu nya, miauka piring nya di mua TUHAN, lalu mai piring nya ngagai alta;

²⁶lalu imam nya deka ngambi segenggam ari piring nya, nyadika pengingat, lalu nunu piring nya ba alta, lalu udah nya ngasuh indu nya ngirup ai nya.

²⁷Lebuh imam nya udah ngasuh indu nya ngirup ai nya, lalu enti indu nya udah ngereja kereja ti kamah, lalu udah enda tetap ati ngagai laki iya, ai ti mai jaku sumpah nya deka tama ngagai tubuh iya, lalu ngasuh iya balat pedis, lalu sarang anak iya deka bedarah, lalu iya deka tara, lalu nama iya deka nyadika leka jaku sumpah[4] ba bansa iya empu.

²⁸Tang enti indu nya nadai udah ngereja kereja ti kamah, lalu iya mengkang tuchi, iya enda kena tinggang sumpah nya, lalu iya ulih beranak.

²⁹“Tu adat ti dikena ba pasal laki ke ninding, lalu besangkaka bini iya bisi udah butang. Indu nya deka diasuh bediri di mua TUHAN, lalu imam nya deka bejalaika adat nya ba indu nya.

³¹Laki indu nya nadai penyalah, tang enti indu nya bisi penyalah, iya deka betanggungjawapka penyalah diri empu.”