Read Iban Penyampau 6 Bible Online

Penyampau 6 - Iban bible

Penyampau 6

¹Lalu ku TUHAN bejaku ngagai Moses,

²“Sebut ngagai orang Israel: Lebuh lelaki tauka indu besumpah deka nyadi Nasir [5] lalu nyerahka diri ngagai TUHAN,

³ iya enda tau ngirup wain tauka ai ti bisa. Iya enda tau ngirup ai ti digaga ari buah anggur, tauka makai buah anggur, tauka makai salai buah anggur.

⁴Seagi-agi iya nyadi Nasir, iya enda tau makai utai ti datai ari batang anggur. Indah leka tauka kulit buah anggur deh enda tau diempa iya.

⁵Seagi-agi iya mengkang ditanggam sumpah Nasir, iya enda tau beguntin, tauka bekukur. Iya kena tanggam sumpah nya sepengelama iya nyerahka diri ngagai TUHAN, lalu iya enda tau enda nejuka buk iya panjai enda diguntin.

⁶Buk iya nyadika tanda iya udah nyerahka diri ngagai Allah Taala. Nya alai iya enda tau datai semak ngagai bangkai, nemuka bangkai nya bangkai apai, indai, menyadi lelaki, tauka menyadi indu iya, enggai ke iya kamah laban nya.

⁸Seagi-agi iya nya orang Nasir, iya mengkang diserahka ngagai TUHAN.

⁹“Enti buk ti udah diserahka ngagai TUHAN nyadi kamah laban orang ke bempu buk nya bediri semak orang ke mati ngenyit, iya enda tau enda nganti tujuh hari, lalu udah nya ngukur buk iya. Nya baru iya nyadi tuchi.

¹⁰Ba hari ti kelapan, iya deka mai dua iku burung achang tauka dua iku burung puna ngagai imam ba penama ngagai Langkau Kain TUHAN.

¹¹Imam nya deka nyerahka siku ari burung nya nyadika piring pengampun dosa, lalu siku nyadika piring tunu, kena iya nuchi orang nya ketegal iya udah negu bangkai. Ba hari nya mega, orang nya deka nyerahka buk diri baru ngagai TUHAN,

¹²lalu nyadi Nasir baru, lalu mai siku bedus ti umur setaun nyadika piring kena muai penyalah. Maya ti dulu nadai diguna agi, laban buk ti udah diserahka ngagai TUHAN, udah kamah.

¹³ “Tu adat ke orang Nasir: lebuh orang nya udah nembuka tanggungjawap iya ti nyadi Nasir, iya deka dibai ngagai penama Langkau Kain TUHAN,

¹⁴lalu meri pemeri iya ngagai TUHAN, iya nya, siku anak domba ti lelaki ti umur setaun, ti nadai penimpang, nyadika piring tunu; siku anak domba ti indu ke umur setaun, ti nadai penimpang, nyadika piring pengampun dosa; enggau siku bedus ti lelaki, ti nadai penimpang, nyadika piring pemaik.

¹⁵Iya deka mega meri sebakul roti ti enda beragi: iya nya tuku roti ti tebal, ti digaga ari tepung ti udah dichampur enggau minyak kana, enggau singkap roti ti mipis ti udah diunsut enggau minyak kana, lalu nambahka nya, piring ti digaga ari gandum, enggau wain.

¹⁶Imam nya deka nyerahka semua utai nya ngagai TUHAN, lalu ngenjuk piring pengampun dosa, enggau piring tunu,

¹⁷lalu nyerahka bedus ti lelaki nya ngagai TUHAN nyadika piring pemaik, lalu meri utai nya enggau sebakul roti. Iya deka mega nyerahka piring gandum, enggau wain.

¹⁸Lalu orang Nasir nya deka ngukur buk iya ba penama ngagai Langkau Kain TUHAN, lalu nunu buk nya ba api ti alai piring pemaik benung ditunu.

¹⁹Udah nya, lebuh berang anak domba nya udah dipanduk, imam deka ngambi berang nya, lalu ngengkahka iya, sama enggau siti tuku roti ti tebal, enggau sesingkap roti ti mipis ari bakul nya, ngagai jari orang Nasir nya, lebuh iya udah ngukur buk iya.

²⁰Udah nya, imam deka nyerahka utai nya nyadika piring ti manah ngagai TUHAN. Utai nya piring ti kuduska imam empu, nambahka isi dada enggau pah bedus, ti endang diempu imam nitihka letak adat. Udah nya baru orang Nasir nya tau ngirup wain.

²¹“Nya meh adat ke orang Nasir ke ngangkatka sumpah. Piring ti diberi ngagai TUHAN deka diberi nitihka jaku sumpah orang Nasir nya, nambahka piring bukai ti ulih diberi iya.

²²Ku TUHAN bejaku ngagai Moses,

²³“Sebut ngagai Aron enggau ngagai anak lelaki iya: ‘Baka tu ku jalai kita merekatka orang Israel. Sebut ngagai sida,

²⁴TUHAN merekatka kita, lalu ngintu kita;

²⁵TUHAN gaga ati ke kita lalu kasihka kita;

²⁶TUHAN rinduka kita, lalu meri kita pemaik.’

²⁷“Nya meh jalai sida ngena nama Aku merekatka orang Israel, lalu Aku deka merekatka sida.”