Read Iban Penyampau 8 Bible Online

Penyampau 8 - Iban bible

Penyampau 8

¹ Ku TUHAN bejaku ngagai Moses,

²“Padahka ngagai Aron, lebuh iya ngelekatka tujuh iti lampu ba penuduk lampu nya, iya enda tau enda ngelekatka lampu nya ngambika sida manchar ke mua.”

³Aron lalu ngereja baka nya, lalu ngelekatka lampu nya manchar ke mua.

⁴Tiang lampu nya digaga ari emas ti ditempa, kenyau ari atas nyentuk ke baruh, nitihka pelan ti udah dipadahka TUHAN ngagai Moses.

⁵Ku TUHAN bejaku ngagai Moses,

⁶“Seraraka orang Lewi ari orang Israel ti bukai, lalu tuchi sida

⁷ngena chara tu: pechik sida ngena ai ti dikena nuchi orang, lalu asuh sida ngukur semua tubuh sida, sereta masu gari sida. Nya baru sida tuchi.

⁸Udah nya, sida enda tau enda ngambi siku sapi ti lelaki ti agi biak, enggau piring gandum, iya nya tepung ti dichampur enggau minyak kana. Lalu nuan enda tau enda ngambi siku agi sapi ti lelaki nya nyadika piring pengampun dosa.

⁹Udah nya, gempuruka semua orang Israel, lalu asuh bala orang Lewi bediri di mua Langkau Kain TUHAN.

¹⁰Orang Israel deka ngengkahka jari sida ba pala orang Lewi.

¹¹Udah nya, Aron deka nyerahka orang Lewi ngagai Aku nyadi pemeri ti manah ari orang Israel, ngambika sida tau bekereja ke Aku.

¹²Udah nya, orang Lewi deka ngengkahka jari sida ba pala sapi ti dua iku nya. Siku ari sapi nya deka diberi nyadika piring pengampun dosa, lalu siku nyadika piring tunu, kena nuchi orang Lewi.

¹³“Serahka orang Lewi nyadika pemeri ti manah ngagai Aku, lalu asuh Aron enggau bala anak lelaki iya nyadi tuai sida.

¹⁴Seraraka orang Lewi ari orang Israel ti bukai, ngambika sida diempu Aku.

¹⁵Lebuh nuan udah nuchi lalu nyerahka orang Lewi, nya baru sida tau gawa dalam Langkau Kain TUHAN.

¹⁶Aku udah ngambu sida kena nganti semua anak tuai orang Israel ti lelaki, lalu sida deka diempu Aku siku aja.

¹⁷ Lebuh Aku munuh semua anak tuai di serata menua Ejip, Aku nyeraraka anak tuai orang Israel, enggau anak tuai semua jelu, ngambika semua sida diempu Aku.

¹⁸Diatu Aku ngambi orang Lewi kena nganti semua anak tuai orang Israel,

¹⁹lalu Aku meri orang Lewi ngagai Aron enggau bala anak lelaki iya, nyadika pemeri ari orang Israel, ngambika sida bisi gawa dalam Langkau Kain TUHAN ngarika orang Israel, lalu nyaga orang Israel ari penusah ti deka ninggang sida, enti sida datai kelalu semak ngagai Endur ti Kudus.”

²⁰Nya alai Moses, Aron enggau semua orang Israel nyerahka orang Lewi, nitihka pesan TUHAN ngagai Moses.

²¹Orang Lewi nuchi diri empu, lalu masu gari diri, lalu Aron nyerahka sida nyadi pemeri ti manah ngagai TUHAN. Iya mega ngereja pengawa nuchi sida.

²²Orang Israel ngereja semua utai nitihka pesan ti diberi TUHAN ngagai Moses, ba pasal orang Lewi. Nya alai, orang Lewi tau gawa dalam Langkau Kain TUHAN di baruh Aron enggau anak lelaki iya.

²³Ku TUHAN bejaku ngagai Moses,

²⁴“Kenyau ari umur sida dua puluh lima taun, genap iku orang Lewi deka ngereja pengawa diri dalam Langkau Kain TUHAN,

²⁵lalu iya badu agi bekereja lebuh umur iya lima puluh taun.

²⁶Udah lepas nya, iya tau nyaup orang Lewi ti bukai ngereja pengawa sida dalam Langkau Kain TUHAN, tang iya enda tau nengali pengawa nya kediri. Nya chara nuan ngatur pengawa ke orang Lewi.”