Read Iban Penyampau 9 Bible Online

Penyampau 9 - Iban bible

Penyampau 9

¹ TUHAN lalu bejaku ngagai Moses di menua puang Sinai, dalam bulan ti kesatu, kedua taun udah bekau orang Israel ke pansut ari menua Ejip. Ku Iya,

²“Kena empat belas hari bulan tu, belabuh ari padam mata panas, orang Israel enda tau enda ngintu Gawai Paska, nitihka semua adat enggau atur Gawai nya.”

⁴Moses lalu ngasuh orang mayuh ngintu Gawai Paska,

⁵lalu kena lemai empat belas hari bulan ti kesatu, sida ngintu Gawai nya di menua puang Sinai. Orang mayuh ngereja semua utai ti udah dipesanka TUHAN ngagai Moses.

⁶Tang sekeda orang enda tuchi, laban sida udah negu bangkai, lalu sida enda ulih ngintu Gawai Paska sehari nya. Sida lalu mansang ngagai Moses seduai Aron,

⁷lalu bejaku, “Kami tu enda tuchi laban kami udah bisi negu bangkai, tang nama kebuah kami enda tau enggau orang Israel ti bukai ngenjuk piring ngagai TUHAN ba maya ti udah diletak?”

⁸Disaut Moses, “Nganti dulu. Aku deka ningaka atur ari TUHAN pasal kita.”

⁹TUHAN lalu bejaku ngagai Moses,

¹⁰“Sebut ngagai orang Israel: Lebuh kita, tauka peturun kita, enda tuchi laban kita udah bisi negu bangkai, tauka bejalai jauh ari menua, tang keran deka ngintu Gawai Paska,

¹¹kita tau ngintu Gawai nya sebulan udah bekau Gawai nya, kena lemai empat belas hari bulan ti kedua. Intu Gawai nya ngena roti ti enda beragi, sereta enggau sayur ti pait.

¹² Anang nejuka pemakai nya beteda datai ngagai pagi hari siti, lalu anang matahka tulang jelu nya. Intu Gawai nya nitihka semua atur.

¹³Tang orang ke endang tuchi, lalu enda bejalai ngagai menua bukai, enti iya enda ngintu Gawai Paska, iya deka badu agi dikumbai nembiak Aku, laban iya enda ngenjuk piring ngagai Aku ba maya ti udah diletak. Orang nya deka betanggungjawapka dosa diri empu.

¹⁴“Enti orang kampar ti diau begulai enggau kita, bisi ati deka ngintu Gawai Paska, sida enda tau enda ngintu Gawai nya nitihka adat enggau atur. Adat nya deka dikena semua orang, nemuka orang nya bansa orang Israel, tauka orang kampar.”

¹⁵Lebuh langkau sembiang nya didirika, mua hari datai lalu ngelindung langkau sembiang, enggau Langkau Kain TUHAN. Lebuh malam hari, mua hari nya nyadi baka api.

¹⁷Genap kali mua hari nya angkat ari atas Langkau Kain TUHAN, orang Israel ngererak kem, lalu nirika kem sida baru ba endur alai mua hari nya nurun.

¹⁸Orang Israel ngererak kem sida nitihka asuh TUHAN, lalu sida nirika kem sida baru, nitihka pesan Iya. Seagi-agi mua hari nya mengkang ari atas langkau sembiang nya, sida mengkang diau ba kem nya.

¹⁹Seagi-agi mua hari nya mengkang ari atas langkau sembiang nya, sida ngasika jaku TUHAN, lalu enda mindah ari endur nya.

²⁰Kadang-kadang mua hari nya semina mengkang ari atas langkau sembiang nya dua tiga hari aja. Tang sida mengkang dia, tauka mindah ari kem nya, nitihka asuh TUHAN.

²¹Kadang-kadang mua hari nya semina mengkang dia ari lemai nyentuk ngagai pagi aja, lalu sida mindah lebuh mua hari nya angkat.

²²Nemuka dua hari, sebulan, setaun tauka lama agi, seagi-agi mua hari nya mengkang ari atas langkau sembiang nya, sida enda mindah. Tang lebuh mua hari nya angkat, sida mindah.

²³Sida nirika kem, tauka ngererak kem, nitihka pesan ti diberi TUHAN ngena Moses.