Read Iban Mikah 1 Bible Online

Mikah 1 - Iban bible

Mikah 1

¹ Lebuh maya Jotam, Ahas, enggau Hesekiah nyadi raja menua Judah, TUHAN meri pesan tu ngagai Mikah, ke datai ari nengeri Moreset. TUHAN mandangka ngagai Mikah semua utai tu pasal Samaria enggau Jerusalem.

²Dingaka utai tu, semua bansa. Pendingka tu, semua kita ke diau di dunya! TUHAN, Raja ti Pemadu Tinggi deka besaksi ngelaban kita. Iya bejaku ari Rumah Sembiang Iya ti di serega.

³TUHAN deka datai ari endur Iya ti kudus. Iya deka nurun lalu bejalai ba tuchung bukit.

⁴Udah nya bukit deka luluh di baruh Iya baka lilin ti luluh laban api. Sida deka rarat ngagai lebak baka ai ti nurun bukit.

⁵Semua utai tu deka nyadi laban orang Israel udah bedosa lalu angkat ngelaban Allah Taala. Sapa ke patut dianu ketegal orang Israel angkat ngelaban? Samaria, indu nengeri nya empu! Sapa ke salah laban sida besembahka engkeramba di menua Judah? Jerusalem empu!

⁶Nya alai TUHAN bejaku, “Aku deka ngaga Samaria nyadi tembawai di menua pesisir, nyadi endur alai nanam anggur. Aku deka mubuhka tugung batu nengeri nya ngagai lebak, lalu deka ngerumbak pugu nengeri nya.

⁷Semua engkeramba ti dikesayauka orang di nengeri nya deka dipechahka magang, lalu semua utai ti diberi ngagai indu ke nyundal dalam rumah sembiang engkeramba nya, deka dirusak ngena api, lalu semua anak patung di nengeri nya deka ditugungka nyadi uras. Samaria udah bulih utai tu kena sida besembiang minta diri peridi, lalu diatu munsuh sida deka nabanka utai nya ngagai bala indu ke nyundal dalam rumah sembiang di menua bukai.

⁸Ketegal utai tu, aku deka ngulit sereta nyabak. Aku deka bejalai enda bekasut sereta telanjai. Aku deka meraung munyi ukui kampung, lalu ngulit baka burung unta.

⁹Bakal Samaria enda ulih suman, lalu Judah baru deka natka diri merinsa baka nya mega. Pengerusak udah datai ba pintu besai nengeri Jerusalem empu, ti alai bala nembiak Aku diau.”

¹⁰Anang madahka ngagai bala munsuh kitai di Gat pasal kitai ke alah. Anang nejuka sida meda kita nyabak. Kita orang Bet-le-aprah,[1] baringka diri malai amau kena kita ngayanka diri tusah ati!

¹¹Kita orang Sapir, alai kita mindah ngagai menua bukai, telanjai sereta malu. Sida ke diau di Sanan enda berani pansut ari nengeri sida. Lebuh kita ninga orang di Bet-esel ngulit, kita deka nemu diri enda ulih ngenduh di nengeri nya.

¹²Orang di Marot irau ati nganti bantu, laban TUHAN udah ngasuh penusah ti besai datai semak ngagai Jerusalem.

¹³Kita ti diau di Lakis, tanchangka kuda ngagai kerita perang kita. Kita udah bedosa nunda orang Israel, lalu ngasuh Jerusalem bedosa.

¹⁴Diatu, kita orang Judah, beri selamat tinggal ngagai nengeri Moreset Gat. Bala raja orang Israel nadai bulih tulung ari nengeri Aksip.

¹⁵Kita ke di Maresah, TUHAN deka nyerahka kita ngagai munsuh, ti deka ngalahka nengeri kita. Bala tuai orang Israel deka rari lalu belalai dalam lubang gua di Adulam.

¹⁶Kita orang Judah, kukur buk kita kena nandaka diri ngulitka anak ke dikerinduka kita. Kukur abis lengis buk kita baka pala burung ti bepakaika bangkai, laban anak kita deka dirampas ari kita, lalu ditabanka ngagai menua bukai.