Read Iban Mikah 2 Bible Online

Mikah 2 - Iban bible

Mikah 2

¹Tulah meh orang ke gali enda tinduk berundingka jalai ngereja penyai! Lebuh hari nyau tawas, lebuh sida bisi peluang, sida lalu ngereja penyai ti udah diperambu sida.

²Lebuh sida inginka tanah orang, sida ngerampas tanah nya. Lebuh sida inginka rumah orang, sida ngerampas rumah nya. Nadai ruang bilik, tauka reta tengkira ti likun.

³Nya alai TUHAN bejaku, “Aku berunding deka ngasuh penusah ti besai ninggang kita, lalu kita enda ulih ngerarika diri. Kita deka nemu diri tusah. Nya baru kita enda ngenyumbungka diri agi.

⁴Lebuh maya nya ila, orang deka ngena cherita pasal kita ke ditinggang penusah nyadika leka jaku sumpah,[2] lalu sida deka belagu ngena lagu sinu ati tu kena sida ngenang pasal utai ti udah diasaika kita: Kami udah abis rusak! TUHAN udah ngerampas tanah kami Lalu udah meri tanah nya ngagai orang ke nangkap kami.”[3]

⁵Nya alai, lebuh maya tanah nya dipulaika baru ngagai bala nembiak TUHAN, kita nadai ungkup.

⁶Ku orang mayuh ngajar aku, “Anang ngajar kami. Anang ngajar pasal utai nya. Allah Taala sigi enda mechat kami.

⁷Kati nuan ngumbai orang Israel kena tinggang sumpah?[4] Kati TUHAN enda agi liat ati? Kati Iya amat deka ngereja utai nya? Kati Iya enda[5] nelap lebuh Iya [6]bejaku ngagai orang ke ngereja utai ti ngena?”

⁸Ku TUHAN nyaut, “Kita nyerang bala nembiak Aku[7] baka munsuh. Orang ke pulai ngayau ngumbai diri likun di rumah, tang kita bisi dia, deka ngenchuri baju sida.

⁹Kita muru bala bini nembiak Aku ari rumah ti dikesayauka sida, lalu kita udah ngerumpak berekat ti udah diberi Aku ngagai bala anak sida belama iya.

¹⁰Angkat meh kita lalu mupuk. Kita nadai agi pengelikun ditu. Dosa kita udah ngasuh endur tu dirusak.

¹¹“Orang tu begunaka nabi ke bejalai mai pemula enggau ati ti nipu, ke nyebut, ‘Aku benabi madahka kita deka mayuh wain enggau ai ti bisa.’

¹²“Tang Aku deka ngempuruka kita, semua kita orang Israel ti agi tinggal. Aku deka ngempuruka kita baka bedus ti pulai baru ngagai raban sida empu. Baka padang rumput ti penuh laban bedus, baka nya meh menua kita deka penuh baru laban mensia.”

¹³Allah Taala deka muka jalai ke sida, lalu nguluka sida pulai ari menua bukai. Sida deka ngebuka diri pansut nengah pintu nengeri, lalu ngelepaska diri. Raja sida, iya nya TUHAN Empu, deka nguluka sida pansut.