Read Iban Mikah 3 Bible Online

Mikah 3 - Iban bible

Mikah 3

¹Pendingka tu, kita ke merintah orang Israel! Kita udah dikarapka meri atur ti lurus,

²tang kita begedika utai ti badas, lalu rinduka utai ti jai. Kita niti kulit bala nembiak Aku idup-idup, lalu nyarikka isi ari tulang sida.

³Kita bepakaika bala nembiak Aku. Kita niti kulit sida, matahka tulang sida, lalu netak sida baka ke netak dagin ti deka dipanduk.

⁴Maya deka datai alai kita deka nyabak ngangauka TUHAN, tang Iya enggai nyaut kita. Iya enggai mendingka sampi kita, laban kita udah ngereja penyai.

⁵Bala nembiak Aku ditipu bala nabi ke madahka sida deka diau dalam pemaik enti sida meri nabi nya duit, tang deka nyerang sida, enti sida enda meri duit ngagai sida nabi nya.

⁶“Nabi, timpuh kita nyau deka abis. Hari kita nyau deka malam. Laban kita udah nesatka bala nembiak Aku, kita nadai agi begenera, lalu kita enda ulih nujum agi.”

⁷Sida ke nujum, deka malu laban sida enda ulih nujum agi. Semua sida deka malu magang, laban Allah Taala enda nyaut sida.

⁸Tang ba pasal aku empu, TUHAN ngemenuhka aku enggau Roh sereta enggau kuasa Iya, lalu Iya meri aku ati ti lurus enggau pemerani kena aku madahka dosa orang Israel.

⁹Pendingka aku, kita ke merintah orang Israel, kita ke begedika atur ti lurus, lalu nyarutka utai ti ngena nyadi salah.

¹⁰Kita nirika nengeri Allah Taala, Jerusalem, beduduk ba pengawa kita ke bebunuhka orang enggau ba atur ti enda lurus.

¹¹Orang ke merintah di nengeri tu megai perintah laban sida deka makai suap. Sida imam minta upah lebuh sida nerangka Adat, lalu sida nabi minta duit lebuh sida madahka pemandang sida empu, lalu semua sida nya bela madahka TUHAN bisi enggau sida. Ku sida, “Kitai enda bebadi, laban TUHAN bisi enggau kitai.”

¹² Nya alai, ketegal kita, Sion deka dichangkul baka tanah umai. Jerusalem deka nyadi tembawai, lalu Rumah Sembiang deka nyadi utan.