Read Iban Mikah 5 Bible Online

Mikah 5 - Iban bible

Mikah 5

¹Orang Jerusalem, gempuruka bala soldadu kita![10] Kitai tu dikelulung munsuh! Sida nyerang tuai orang Israel!

² Ku TUHAN bejaku, “Betlehem Epratah, nuan suku raban bansa ti pemadu mit ari peturun Judah, tang ari nuan Aku deka mansutka siku pemerintah ke orang Israel, ari peturun orang ke dulu kelia.”

³Nya alai TUHAN deka nejuka bala nembiak Iya diperintah munsuh sida, nyentuk ngagai maya indu ke deka beranak nya udah ngadaka anak lelaki iya. Udah nya, orang Israel ti udah dibuai ngagai menua bukai, deka pulai baru ngagai bala sida empu.

⁴Lebuh pemerintah nya datai, iya deka merintah bala nembiak iya ngena kuasa ti datai ari TUHAN, sereta enggau mulia TUHAN Allah Taala empu. Bala nembiak iya deka diau likun, laban semua mensia di serata dunya deka ngaku iya endang besai kuasa,

⁵lalu iya deka mai pemaik. Lebuh orang Asiria nyerang menua kitai, lalu ngelanggar kuta kitai, kitai deka ngasuh bala tuai kitai ke pemadu kering ngelaban sida.

⁶ Ngena senyata sida, sida deka ngalahka menua Asiria, iya nya menua Nimrot, lalu sida[11] deka ngelepaska kitai ari orang Asiria lebuh orang Asiria nyerang menua kitai.

⁷Orang Israel ti agi idup deka nyadi baka ambun ti ngasuh nyamai isi, ti dikirumka TUHAN ngagai mayuh bengkah bansa, baka ujan ti beberis ninggang utai ti tumbuh. Sida deka manggaika pengarap sida ba Allah Taala, ukai ba mensia.

⁸Sida ke tinggal dalam mayuh bengkah menua, deka nyadi baka singa ti begigaka pemakai dalam utan, tauka ba padang rumput. Iya tama ngagai raban bedus, nerekam sida, lalu nyarikka sida, lalu nadai orang ngelepaska sida.

⁹Israel deka ngalahka bala munsuh iya, lalu ngerusak semua sida.

¹⁰Ku TUHAN bejaku, “Lebuh maya nya ila, Aku deka munuh kuda kita lalu ngerusak kerita perang kita.

¹¹Aku deka ngerusak nengeri di menua kita, lalu ngeruntuhka semua kuta kita.

¹²Aku deka muai pengaruh kita, lalu muai semua orang ke betilitka nasit.

¹³Aku deka ngerusak engkeramba enggau tiang batu keramat kita. Kita enda agi nyembah utai ti udah digaga kita empu.

¹⁴Aku deka numbangka engkeramba petara indu Aserah di menua kita, lalu ngerusak nengeri kita.

¹⁵Lalu laban Aku balat ringat, Aku deka malas penyai semua bansa ti enda ngasika Aku.”