Read Iban Mikah 6 Bible Online

Mikah 6 - Iban bible

Mikah 6

¹Pendingka pekara ti dibantaika TUHAN kena Iya ngelaban orang Israel. Angkat meh Nuan, O TUHAN, lalu bantaika pekara ti dibai Nuan. Awakka bukit enggau munggu ninga utai ti disebut Nuan.

²Kita bukit, kita pugu dunya ti meruan belama iya, pendingka pekara ti dibantaika TUHAN! TUHAN bisi pekara kena Iya ngelaban bala nembiak Iya. Iya deka besalah orang Israel.

³Ku TUHAN bejaku, “Nembiak Aku, nama utai ti udah dikereja Aku ba kita? Baka ni ku Aku udah nating kita? Saut Aku.

⁴ Aku udah mai kita pansut ari menua Ejip. Aku udah ngelepaska kita ari pengidup kita ke nyadi ulun. Aku udah ngasuh Moses, Aron, enggau Miriam nguluka kita.

⁵ Nembiak Aku, kingatka utai ti deka dikereja Raja Balak menua Moap ngagai kita, enggau chara Balaam anak Beor nyaut iya. Kingatka utai ti nyadi di rantau jalai ari kem di Akasia ngagai Gilgal. Kingatka semua utai nya, nya baru kita deka nemu utai ti udah dikereja Aku kena Aku ngidupka kita.”

⁶Nama utai ti deka dibai aku ngagai TUHAN Allah Taala ti di serega, lebuh aku datai nyembah Iya? Kati aku patut mai anak jelu sapi ti pemadu gemu nyadika piring tunu?

⁷Kati TUHAN deka gaga ati enti aku mai ngagai Iya seribu iku bedus, tauka minyak kana ti enda nemu abis? Kati aku patut meri ngagai Iya anak tuai aku, kena aku nebus dosa aku?

⁸Enda. TUHAN udah madahka ngagai kitai utai ti manah. Utai ti diguna Iya ari kitai nya baka tu: ngereja utai ti lurus, seruran ngayanka pengerindu, lalu diau begulai sejalai enggau Allah Taala kitai enggau ati ti baruh.

⁹Kitai pintar enti kitai nangika TUHAN. Ku Iya ngangau ngagai nengeri, “Pendingka tu, kita ke begelumu di nengeri![12]

¹⁰Dalam rumah orang ke jai, bisi pengaya ti udah ulih sida nipu. Sida ngena takar ti enda betul. Tu utai ti dipegedika Aku.[13]

¹¹Baka ni ku Aku ulih ngampun orang ke ngena takar enggau timbang ti enda betul?

¹²Orang ke kaya ngambi ulih ba orang ke seranta, lalu semua kita endang orang ke bula.

¹³Nya alai Aku udah ngepunka [14] pengawa ngerusak kita, ketegal dosa kita.

¹⁴Kita makai, tang enda nemu kenyang. Iya ti bendar, kita agi lapar. Kita deka nabanka utai, tang kita enda ulih nyimpan utai nya. Sebarang utai ti disimpan kita deka dirusak Aku lebuh maya perang.

¹⁵Kita deka nanam gandum, tang kita nadai utai diketau. Kita deka mitan buah kana ngulihka minyak, tang kita nadai peluang ngena minyak nya. Kita deka ngaga wain, tang kita enda ngirup wain nya.

¹⁶ Utai tu deka nyadi laban kita udah ngereja utai ti jai nunda Raja Omri enggau anak lelaki iya, Raja Ahap. Kita udah majak nitihka atur seduai iya, nya alai Aku deka ngerusak kita, lalu semua orang deka ngeleseka kita. Orang[15] di semua endur deka mechat kita.”[16]