Read Iban Nahum 1 Bible Online

Nahum 1 - Iban bible

Nahum 1

¹ Tu pesan pasal Nineweh, cherita pasal genera ti dipeda Nahum ke datai ari Elkos.

²TUHAN nya Allah Taala ti ngiga balas. TUHAN malas sereta ringat. TUHAN malas munsuh Iya lalu ringat ngagai bala munsuh Iya.

³TUHAN enda mudah ringat, tang besai kuasa lalu nadai kala enda ngukum orang ke salah. Di sebarang endur alai TUHAN bejalai, biaubalai nyadi. Mua hari nya amau ti tekebu laban kaki Iya!

⁴Iya ngerara tasik, lalu tasik rangkai! Iya ngerangkaika semua sungai. Rumput di Basan enggau di Karmel layu, lalu bungai di Lebanon lesap magang.

⁵Bukit berenyang di mua TUHAN. Munggu lela di mua Iya. Tanah, dunya enggau semua mensia di dunya getar-getar magang lebuh TUHAN ngayanka Diri.

⁶Sapa ulih natka pengeringat TUHAN? Sapa tan ngasaika pengeringat Iya? Iya mubuhka pengeringat iya baka api. Batu besepur nyadi amau di mua Iya.

⁷TUHAN endang manah, nyadi kuta lebuh maya penusah. Iya nyaga orang ke ngenduh ba Iya.

⁸Iya ngena ai bah ngerusak semua munsuh Iya. Iya ngagai munuh Iya lalu munuh sida ba endur ti petang.

⁹Nama kebuah kita bepekat ngelaban TUHAN? Iya deka ngerusak kita. Nadai orang ulih ngelaban Iya lebih ari sekali.

¹⁰Sida tusut baka balun duri, mabuk baka orang ke mabuk; sida deka ditunu baka rumput ti rangkai.

¹¹Ari nuan, Nineweh, siku orang udah pansut. Iya penuh laban akal ti jai, lalu iya bepekat ngelaban TUHAN.

¹²Tu utai ti disebut TUHAN ngagai bala nembiak Iya Israel: “Taja pen orang Asiria kering sereta mayuh tubuh, sida deka dirusak lalu lesap. Nembiak Aku, Aku udah merinsaka kita, tang Aku enda agi merinsaka kita.

¹³Diatu Aku deka madamka kuasa Asiria ti merintah kita, lalu mutuska rantai ti nanchang kita.”

¹⁴Tu atur ti udah diletak TUHAN pasal orang Asiria: “Sida nadai peturun nampung nama sida. Aku deka ngerusak engkeramba ti dalam rumah sembiang petara sida. Aku benung nyendiaka kubur ke orang Asiria, laban sida sigi enda patut idup!”

¹⁵ Peda nyin, siku seruan datai nengah bukit mai berita ti manah! Iya benung di rantau jalai deka madahka pasal pemenang! Orang Judah, begawai meh kita, lalu beri ngagai Allah Taala utai ti udah disemaya kita ngena sumpah. Orang ke jai enda agi nyerang menua kita. Sida udah abis dirusak!