Read Iban Nahum 2 Bible Online

Nahum 2 - Iban bible

Nahum 2

¹Nineweh, nuan diatu benung diserang! Kuasa ti deka ngerusak nuan, udah datai. Tanka kuta! Jaga jalai raya! Sediaka diri empu beperang! (

²TUHAN baru deka mulaika mulia ngagai Israel, baka mulia iya ti dulu menya sebedau bala munsuh ngerumpak iya.)

³Bala munsuh mai terabai ti mirah lalu sida ngena pekayan ti mirah. Sida sedia deka nyerang! Kerita perang sida bekilap baka api! Kuda[1] sida seruran deka belanda!

⁴Kerita perang laju nengah jalai raya, laju amat kia-kia nengah padang ba sebelah nengeri. Sida baka sempun lalu bejalai kin kitu baka kilat.

⁵Bala pemesai dikangauka. Sida tesangkut lebuh sida mansang ke mua. Bala penyerang belanda mansang semak ngagai kuta lalu ngaga utai kena nerabai batang kayu ti dikena ngentung pintu kuta.

⁶Tekat sungai[2] lalu tebuka. Semua orang di istana lalu balat amat takut.

⁷Kuin lalu ditangkap. Bala orang gaji iya bedemuh munyi burung achang lalu mandam dada diri.

⁸Baka ai ti pansut ari tekat ti pechah baka nya meh orang mayuh belanda pansut ari Nineweh![3] “Ngetu! Ngetu!” ku orang ngangau. Tang nadai siku orang nikal.

⁹Rampas perengka pirak! Rampas perengka emas! Nengeri nya penuh laban pengaya!

¹⁰Nineweh udah rusak, ditinggalka mensia, nadai orang nguan! Ati nyau anchur laban takut. Patung nyau getar-getar, nadai agi pengering, mua nyau puchat.

¹¹Dini alai nengeri nya diatu ti udah baka lubang singa, endur alai anak singa makai, endur ti digusung singa, enggau singa ti indu endur alai anak sida diau likun?

¹²Singa munuh jelu ti deka diempa iya lalu nyarikka jelu nya ke bini iya enggau ke anak iya. Iya ngisi lubang iya enggau dagin ti udah dicharikka iya.

¹³“Aku ngelaban kita!” ku TUHAN ti Pemadu Bekuasa bejaku. “Aku deka nunu kerita perang kita. Bala soldadu kita deka mati beperang, lalu Aku deka ngerampas semua utai ti udah dirampas kita ari orang bukai. Peminta bala pengari kita, nadai agi didinga.”