Read Iban Habakuk 1 Bible Online

Habakuk 1 - Iban bible

Habakuk 1

¹Tu pesan ti dipadahka TUHAN ngagai nabi Habakuk.

²O TUHAN, ni pengelama aku enda tau enda ngangau minta tulung, baru Nuan deka mending, lalu ngelepaska kami ari orang ke mangah tu?

³Nama kebuah Nuan ngasuh aku meda penyalah enggau penusah ti baka tu? Baka ni ku Nuan tan meda penyalah ti baka tu? Aku dikelingi pengerusak enggau penusah, lalu orang belaban sereta belaya.

⁴Adat enda terit sereta nadai guna, lalu atur ti lurus endang enda kala dipejalaika. Orang ke jai ngelingi orang ke lurus. Nya alai atur ti lurus ditunsangka magang.

⁵ Udah nya TUHAN lalu bejaku ngagai bala nembiak Iya, “Peratika semua bansa ti ngelingi kita. Kita deka tekenyit ati ke utai ti dipeda kita, laban Aku deka ngereja siti utai lebuh rambau kita, ti mar dikarapka kita enti utai nya dipadahka ngagai kita.

⁶ Aku ngasuh orang Babilon, orang ke mangah sereta enda nemu jenuh nya, megai kuasa. Sida bejalai ngagai semua endur di dunya tu ngalahka menua bukai.

⁷Sida ngasuh orang nangi sereta takut, lalu ari penyumbung sida, sida ngumbai semua utai ti dikereja sida ngena magang.

⁸“Kuda sida laju agi ari engkuli, mangah agi ari ukui kampung ti lapar. Bala soldadu sida ke nepan kuda, datai ari menua ti jauh. Kuda sida ngerumbak tanah. Sida nyambar, baka menaul ti nyambarka utai ti deka diempa sida.

⁹“Bala soldadu sida nyerang lalu ngalah, lalu semua orang bela takut magang lebuh sida datai. Orang ke ditangkap sida ngemayuh igi pasir.

¹⁰Sida enda bebasaka raja, lalu ngeleseka bala pemesai. Nadai kuta ulih mempang sida. Sida nugungka tanah ba tisi kuta, lalu ngalahka kuta nya.

¹¹Udah nya sida majakka pejalai sida baka ribut. Kuasa sida empu nyadika petara sida.”

¹²TUHAN, kenyau ari pun, Nuan endang Allah Taala. Nuan Allah Taala aku. Nuan kudus sereta meruan belama iya. TUHAN Allah Taala enggau Penyaga aku, Nuan udah milih orang Babilon, lalu ngasuh sida kering ngambika sida ulih ngukum kami.

¹³Tang baka ni ku Nuan tan meda orang ke aum-juak, ti jai tu? Mata Nuan kelalu kudus merening ngagai penyai, lalu Nuan enda tan meda orang ngereja penyalah. Nya alai, nama kebuah Nuan enda bemunyi lebuh sida ngerusak orang ke lurus agi ari sida?

¹⁴Baka ni ku Nuan ngaga mensia baka ke enggau ikan, tauka enggau bala indu utai ti nadai raja?

¹⁵Orang Babilon nangkap orang ngena ginti baka ke nangkap ikan. Sida ngirit orang ngena jala, lalu manjung gaga ati ke orang ke ditangkap sida!

¹⁶Indah pukat sida deh abis disembah sida, lalu sida ngenjuk piring ngagai pukat sida, laban pukat sida nya meri sida utai ti pemadu manah.

¹⁷Kati sida deka ngena pedang sida belama iya, lalu majak ngerusak semua bansa bukai enggau nadai pengasih?