Read Iban Habakuk 2 Bible Online

Habakuk 2 - Iban bible

Habakuk 2

¹Aku deka niki menara ti alai aku jaga, lalu nganti TUHAN madahka ngagai aku utai ti deka diasuh Iya sebut aku, enggau saut ari Iya[1] pasal serebana aku.

²Ku TUHAN nyaut aku: “Tuliska enggau terang ba batu-tulis utai ti dipadahka Aku ngagai nuan, ngambika utai nya nyamai dibacha.

³ Tuliska utai nya, laban utai nya apin dikamatka diatu. Tang maya deka datai enda lama da agi, alai utai ti dipadahka Aku ngagai nuan, deka dikamatka. Utai nya baka ke lubah nyadi, tang anti aja utai nya. Iya tetap deka nyadi, lalu iya enda masau jam.

⁴ Tu pesan nya: ‘Orang ke jai enda ulih idup,[2] tang orang ke lurus deka idup ngena pengarap sida.’ ”

⁵Pengaya nemu nipu. Orang ke amu endang sumbung sereta kasak-kasak, enda nemu puas ati baka pemati. Nya kebuah sida ngalahka menua siti lalu udah nya ngalahka menua siti.

⁶Orang ke dialahka sida deka ngeleseka sida. Ku orang ke dialahka sida bejaku, “Kita ngerampas utai orang, tang kita deka tulah! Ni pengelama kita deka ngiga pengaya mejalka orang mayar utang sida?”

⁷Tang sebedau kita nemu diri, kita ke udah ngalahka orang bukai, deka mega berutang lalu dipejalka mayar anak duit nya. Munsuh deka datai, lalu kita getar-getar. Sida deka ngerumpak utai kita!

⁸Kita udah ngerumpak utai orang ari mayuh bengkah bansa, tang diatu sida ke agi idup deka ngerumpak utai kita, laban kita udah munuh orang, laban kita udah kasar enggau orang di dunya tu, sereta kasar enggau nengeri sida.[3]

⁹Tulah meh kita ke udah ngaga ruang bilik kita kaya-raja ngena utai ti dirampas kita, lalu kita udah nguji ngaga rumah kita likun ari utai ti tau nganu!

¹⁰Tang pelan kita udah ngemaluka ruang bilik kita. Pengawa kita ke ngerusak mayuh bengkah bansa, deka ngerusak kita empu.

¹¹Indah batu ti dikena ngaga kuta deh nemu nyabak ngelaban kita, lalu kasau ngelembungka sabak nya.

¹²Tulah meh orang ke nirika nengeri beduduk ba penyalah, lalu ngaga nengeri nya beduduk ba pengawa kita ke bebunuhka orang.

¹³ Bansa ti dialahka kita ngelelakka diri ngereja pengawa ti nadai guna, lalu semua utai ti udah digaga sida abis retung diempa api. TUHAN ti Pemadu Bekuasa Empu ti udah ngereja nya.

¹⁴ Tang dunya deka penuh laban penemu pasal mulia TUHAN, baka tasik ti penuh laban ai.

¹⁵Tulah meh kita ke ngemalu sereta ngeleseka pangan lebuh kita ringat; kita ngasuh sida guir-guir baka ke mabuk, ngambika kita ulih meda sida telanjai.

¹⁶Kita empu deka dikeleseka, ukai dibasa. Kita empu deka ngirup lalu guir-guir. TUHAN deka ngasuh kita ngirup mangkuk ukum kita empu, lalu kita deka dipechat, enda dibasa agi.

¹⁷Kita udah berimba utan di menua Lebanon. Diatu kita empu deka ditebang. Kita udah bebunuhka jelu dalam utan nya. Diatu jelu babas deka ngemba kita. Utai nya deka nyadi laban kita udah bebunuhka orang, enggau laban kita udah kasar enggau mensia di dunya tu, sereta kasar enggau nengeri sida.[4]

¹⁸Nama guna engkeramba? Engkeramba nya semina utai ti digaga mensia, lalu iya nadai madahka utai bukai, tang semina pemula aja. Nama penguntung orang ke ngaga engkeramba enti iya manggaika pengarap iya ba petara ti enda nemu bejaku!

¹⁹Tulah meh kita ke bejaku ngagai repik kayu, “Dani!” tauka bejaku ngagai tekang batu, “Angkat!” Kati engkeramba ulih mandangka utai ngagai kita? Iya nyangka abis dibalut pirak enggau emas, tang iya nadai seput.

²⁰Tang TUHAN diau dalam Rumah Sembiang Iya ti kudus. Awakka semua mensia di dunya tu diau enda engkeretik di mua Iya.