Read Iban Habakuk 3 Bible Online

Habakuk 3 - Iban bible

Habakuk 3

¹Tu sampi nabi Habakuk:[5]

²O TUHAN, aku bisi udah ninga pasal utai ti udah dikereja Nuan lalu aku nangi. Diatu kereja baru ba rambau kami tu utai ti udah dikereja Nuan dulu menya. Kasihka kami, taja pen Nuan ringat.

³Allah Taala datai baru ari Edom. Allah Taala ti kudus datai ari munggu di menua Paran. Mulia Iya ngemenuhka langit, lalu dunya penuh laban jaku puji ke Iya.

⁴Iya datai tampak baka kilat. Penampak bepijar pansut ari jari Iya. Dia meh endur alai kuasa Iya dilalaika.

⁵Iya ngasuh penyakit bejalai dulu ari Iya lalu Iya ngasuh pemati ngentudika Iya.

⁶Lebuh Iya ngetu, tanah berenyang. Lebuh Iya merening sekejap aja, semua bansa getar-getar. Bukit ti meruan belama iya diredakka. Munggu ti meruan belama iya, tengelam, munggu ti udah alai Iya bejalai dulu kelia.

⁷Aku meda orang Kusan takut lalu orang Media getar-getar.

⁸TUHAN, kati Nuan pedis ati ngagai sungai? Tauka Nuan ringat ngagai sungai, tauka Nuan ringat ngagai tasik, lebuh Nuan nepan kuda enggau kerita perang Nuan mai pemenang?

⁹Nuan ngedarka panah Nuan, sedia deka nimbakka laja Nuan.[6] Nuan melah tanah ngena sungai.

¹⁰Bukit tepedaka Nuan lalu sida getar-getar. Ai tebubuh ari langit. Ai ti di baruh dunya beguntam, lalu gelumbang ti besai nyadi.

¹¹Mata hari enggau bulan enda engkebut lebuh panah Nuan beperenching mansa, lebuh sangkuh Nuan bekilap.

¹²Nuan bejalai nengah dunya mai pengeringat. Nuan ngeransi lalu ngelunjak mayuh bengkah bansa.

¹³Nuan datai laban Nuan deka ngelepaska bala nembiak Nuan, deka ngelepaska raja ti udah dipilih Nuan. Nuan mumpung pala tuai orang ke jai lalu ngeluska semua orang ke nitihka iya.[7]

¹⁴Laja Nuan ngebuska tuai soldadu iya lebuh laja nya datai baka kabut ti deka mambarka kami, ketawaka kami baka sida ke belalai nekanka pengidup orang ke seranta.[8]

¹⁵Nuan ngelunjak tasik ngena kuda Nuan lalu ai tasik bepupu.

¹⁶Aku ninga semua utai nya, lalu aku getar-getar. Mulut aku nyau getar-getar laban aku takut. Tubuh aku lemi, lalu kaki aku jelepi.[9] Aku enda engkeretik nganti Allah Taala ngukum sida ke nyerang kami.

¹⁷Taja pen kayu ara nadai bebuah lalu buah anggur nadai tumbuh ba batang iya, taja pen buah kana enda lekat lalu umai gandum nadai mansutka asil, taja pen semua bedus abis mati lalu bansal sapi puang,

¹⁸aku deka mengkang gaga ati sereta lantang laban TUHAN endang Juruselamat aku.

¹⁹ TUHAN ti Pemadu Tinggi meri aku pengering. Iya ngasuh aku laju baka rusa lalu ngasuh aku diau likun ba sebelah bukit.