Read Iban Sepaniah 1 Bible Online

Sepaniah 1 - Iban bible

Sepaniah 1

¹ Tu pesan ti diberi TUHAN ngagai Sepaniah lebuh Josiah anak Amon nyadi raja menua Judah. (Sepaniah datai ari peturun Raja Hesekiah, nengah Amariah, Gedaliah, enggau Kusi.)

²Ku TUHAN bejaku, “Aku deka ngerusak semua utai di dunya,

³semua mensia enggau jelu, burung enggau ikan. Aku deka ngalahka[1] orang ke jai. Aku deka ngerusak semua mensia, lalu nadai siku sida agi idup. Aku ti TUHAN, udah bejaku.

⁴“Aku deka ngukum orang Jerusalem enggau semua orang di menua Judah. Aku deka ngerusak semua pengawa ti besembahka Baal ba endur nya, lalu orang nadai agi ingatka bala imam ke bekereja ke Baal.

⁵Aku deka ngerusak semua orang ke niki ngagai perabung rumah lalu nyembah mata hari, bulan, enggau bintang. Aku deka mega ngerusak orang ke nyembah Aku madahka diri deka taluk ngagai Aku, tang udah nya besumpah ngena nama petara Molek.

⁶Aku deka ngerusak sida ke nikal lalu enda agi nitihka Aku, sida ke enda datai ngagai Aku tauka enda minta iring Aku.”

⁷Hari nyau semak alai TUHAN deka ngakim. Nya alai anang engkeretik di mua Iya. TUHAN sedia deka ngaga bala nembiak Iya nyadika piring, lalu Iya udah ngasuh bala munsuh datai lalu ngerumpak menua Judah.

⁸“Ba hari sida disayat,” ku TUHAN bejaku, “Aku deka ngukum bala pemesai, bala anak lelaki raja, enggau semua orang ke nitihka adat asal orang bansa bukai.

⁹Aku deka ngukum semua orang ke besembah baka orang bansa bukai, ke ngenchuri sereta bebunuhka orang laban sida ingin deka ngisi rumah tuan sida[2] enggau perapasan.

¹⁰“Ba hari nya ila,” ku TUHAN bejaku, “kita deka ninga munyi nyawa orang ke nyabak ba Pintu Ikan di Jerusalem. Kita deka ninga munyi orang ke nyabak ba endur ti baru digaga di Jerusalem, enggau munyi utai ti merentum ba sebelah bukit.

¹¹Nyabak duie-duie meh kita lebuh kita ninga nya, kita ke diau ba endur ti baruh di nengeri nya, laban semua orang dagang kita mati magang!

¹²“Lebuh maya nya ila Aku deka mai lampu, lalu begigaka orang di serata nengeri Jerusalem, lalu Aku deka ngukum orang ke puas ati enggau diri empu, sereta arapka diri empu, ke bejaku dalam ati diri, ‘TUHAN enda ngereja utai ti manah tauka utai ti jai.’

¹³Pengaya sida deka dirumpak, lalu rumah sida dirusak. Sida enda agi diau dalam rumah ti digaga sida empu, tauka ngirup wain ari kebun anggur ti ditanam sida empu.”

¹⁴Hari TUHAN nyau semak - semak amat lalu deka datai enggau jampat! Hari nya deka balat ngenakutka[3] datai ke soldadu ke pemadu berani deh deka nyabak tusah ati!

¹⁵Hari nya deka nyadi hari alai ngeransi, hari penusah enggau pemerinsa, hari pengerusak, hari ti petang, hari ti petang laban mua hari,

¹⁶hari ti penuh laban munyi terumpit orang ke beperang, enggau munyi panjung bala soldadu ke nyerang nengeri ti bekuta, enggau menara ti tinggi.

¹⁷Ku TUHAN bejaku, “Aku deka ngasuh penusah ti besai ninggang semua mensia, datai ke semua orang deka begama bejalai baka orang ke buta. Sida udah bedosa ngelaban Aku, lalu diatu darah sida deka dibubuhka baka ai, lalu bangkai sida deka betegaring but ba tanah.”

¹⁸Lebuh TUHAN ngeransi, indah semua pirak enggau emas sida deh enda ulih ngelepaska sida. Semua dunya deka dirusak api pengeringat TUHAN. Iya deka ngenyit ngeluska semua mensia ti diau di dunya.