Read Iban Hagai 2 Bible Online

Hagai 2 - Iban bible

Hagai 2

¹Kena dua puluh satu hari bulan ti ketujuh taun nya, TUHAN bejaku baru ngagai nabi Hagai, ku Iya:

²Sebut ngagai Serubabel, tuan gabenor menua Judah, enggau ngagai Josua ti nyadi Imam Besai, enggau ngagai orang mayuh, munyi tu,

³ “Kati kita ingatka gaya pemanah Rumah Sembiang ti dulu menya? Baka ni ku gaya Rumah Sembiang nya ba mata kita diatu? Iya baka ke nadai gaya.

⁴Tang kita enda tau lemi semengat. Kereja aja pengawa kita, laban Aku bisi enggau kita.

⁵ Lebuh kita pansut ari menua Ejip, Aku udah besemaya deka meruan enggau kita. Diatu Aku agi meruan enggau kita, nya alai anang takut.

⁶ “Enda lama da agi Aku deka ngusak langit enggau dunya, tanah enggau tasik.

⁷Aku deka ngusak semua bansa, lalu semua pengaya sida deka dibai kitu magang, lalu Rumah Sembiang deka penuh laban pengaya.

⁸Semua pirak enggau emas di dunya tu endang enggi Aku magang.

⁹Rumah Sembiang ti baru nya deka manah agi ari gaya Rumah Sembiang ti dulu menya, lalu dia meh endur alai Aku deka meri pengaya enggau pemaik ngagai bala nembiak Aku.” TUHAN ti Pemadu Bekuasa udah bejaku.

¹⁰Kena dua puluh empat hari bulan ti kesemilan kedua taun Darius nyadi raja, TUHAN ti Pemadu Bekuasa bejaku baru ngagai nabi Hagai.

¹¹Ku Iya, “Pinta pemutus penemu ari bala iman ba pekara tu:

¹²‘Enti orang ngambi dagin ti udah diserahka ngagai TUHAN, lalu ngandut dagin nya ngena baju panjai iya, lalu baju nya tekindaska roti tauka pemakai ti udah dipanduk, tauka wain, tauka minyak, tauka sebarang macham pemakai, kati utai ti kena kindas nya tau nyadi kudus?’ ” Sida imam lalu nyaut, “Enda.”

¹³ Udah nya Hagai lalu nanya baru, “Enti sema orang nyadi kamah laban iya udah teteguka bangkai, lalu udah nya iya teteguka pemakai, kati nya tau ngasuh pemakai nya kamah?” Ku sida imam nyaut, “Tau.”

¹⁴Udah nya ku Hagai bejaku, “Nya meh utai ti deka nyadi ba orang ari bansa tu, ku TUHAN bejaku. Semua utai ti dikereja kita, enggau semua piring ti diberi kita, kamah magang.”

¹⁵Ku TUHAN bejaku, “Kati kita enda nemu utai ti udah nyadi ba kita? Sebedau kita belabuh ngaga Rumah Sembiang,

¹⁶kita mansang ngagai tugung gandum, ngarapka diri deka tetemuka 200 kilogram gandum, tang kita semina tetemuka 100 kilogram aja. Kita mansang deka ngauk 100 liter wain ari tajau, tang kita semina tetemuka 40 liter aja.

¹⁷Aku ngasuh ribut ti angat enggau ujan batu ngerusak semua utai ti ditanam kita, tang kita mengkang enggai nesal ati.

¹⁸Sehari tu, kena dua puluh empat hari bulan ti kesemilan, batu pemun Rumah Sembiang tembu didudukka. Peda kita utai ti deka nyadi berengkah ari diatu.

¹⁹Taja pen gandum nyau abis, lalu batang anggur, kayu kana, kayu delima, enggau kayu ara kita apin bebuah, tang berengkah ari diatu Aku deka merekatka kita.”

²⁰Kena dua puluh empat hari bulan nya, TUHAN meri pesan ti kedua ngagai Hagai:

²¹“Padahka ngagai Serubabel, tuan gabenor menua Judah, Aku baru deka ngusak langit enggau dunya,

²²lalu muai perintah, lalu ngerusak kuasa sida. Aku deka nungkupka kerita perang enggau orang ke nepan sida. Kuda deka mati, lalu orang ke nepan sida deka bebunuhka pangan diri.

²³Ba hari nya ila Aku deka mai nuan Serubabel ke nembiak Aku, lalu Aku deka milih nuan merintah dalam nama Aku, laban Aku udah milih nuan, ku TUHAN ti Pemadu Bekuasa bejaku.