Read Iban Sekariah 1 Bible Online

Sekariah 1 - Iban bible

Sekariah 1

¹ Dalam bulan ti kelapan, kedua taun Darius nyadi raja besai menua Persia, TUHAN meri pesan tu ngagai nabi Sekariah anak Berekiah, uchu Ido. Ku Iya bejaku,

²“TUHAN udah balat amat ringat ngagai bala aki ini kita.

³Nya alai sebut ngagai sida: Ku TUHAN ti Pemadu Bekuasa bejaku: Pulai baru ngagai Aku, lalu Aku deka pulai baru ngagai kita.

⁴Anang baka aki ini kita. Dulu kelia bala nabi meri sida pesan, nagang sida ngereja penyai, ngambika sida enda agi bedosa. Tang sida enggai mending tauka ngasika Aku, ku TUHAN bejaku.

⁵Dini alai bala aki ini kita diatu? Kati bala sida nabi idup belama iya?

⁶Tang jaku enggau adat Aku, ti udah diberi Aku ngena bala nembiak Aku, iya nya bala sida nabi, udah nyadi ba sida. Nya alai sida nesal ati lalu bejaku, “TUHAN ti Pemadu Bekuasa, udah ngukum kitai setipak enggau penyalah kitai, nitihka pelan Iya.”

⁷Kena dua puluh empat hari bulan ti kesebelas (bulan Sebat), kedua taun Darius nyadi raja, TUHAN meri ngagai aku siti pesan dalam genera lebuh malam hari.

⁸ Dalam genera malam nya aku tepedaka siku orang nepan kuda ti mirah. Iya udah ngetu ba madang kayu maitel ba siti lebak, lalu iya dititihka kuda ti bukai - kuda ti mirah, ti belang, enggau ti burak.

⁹Aku lalu nanya, “Tuan, nama utai nya?” Ku melikat ke bejaku enggau aku nyaut aku, “Aku deka madahka utai nya ngagai nuan.

¹⁰Orang ke bediri ba madang kayu maitel lalu nyaut, “Sida tu orang ke udah dikirumka TUHAN matau dunya.”

¹¹Sida lalu bejaku ngagai melikat TUHAN ti bediri ba madang kayu maitel: “Kami udah matau dunya, lalu nemu dunya bisi pemaik.”

¹²Udah nya melikat TUHAN lalu bejaku, “TUHAN ti Pemadu Bekuasa, Nuan udah ringat ngagai Jerusalem enggau ngagai semua nengeri menua Judah dalam pengelama tujuh puluh taun. Ni pengelama nuan agi ringat sebedau Nuan ngayanka pengasih Nuan ngagai sida?”

¹³TUHAN lalu nyaut melikat nya enggau jaku siru.

¹⁴Melikat nya ngasuh aku madahka utai ti udah disebut TUHAN ti Pemadu Bekuasa: “Aku balat amat rindu sereta sayauka Jerusalem, nengeri Aku ti kudus,

¹⁵lalu Aku balat amat ringat ngagai bansa bukai ti diau dalam pemaik. Laban lebuh Aku enda tentu ringat ngagai bala nembiak Aku, makin balat agi ga sida bansa bukai merinsaka bala nembiak Aku.

¹⁶Nya alai Aku udah pulai baru ngagai Jerusalem, deka ngayanka pengasih Aku. Rumah Sembiang deka didirika baru, lalu kuta nengeri nya deka digaga baru.”

¹⁷Melikat nya mega ngasuh aku nyebut tu: “TUHAN ti Pemadu Bekuasa madahka semua nengeri Iya deka nyadi kaya-raja baru, lalu Iya deka sekali agi nulung Jerusalem, lalu milih nengeri nya nyadika nengeri Iya Empu.”

¹⁸Dalam siti agi genera aku tepedaka empat iti tanduk sapi.

¹⁹Aku nanya ngagai melikat ti udah bejaku ngagai aku, “Nama reti tanduk nya?” Ku iya nyaut, “Sida nya nunjukka mayuh bengkah perintah di dunya tu ti udah ngachirka orang Judah, orang Israel enggau orang ari Jerusalem.”

²⁰Udah nya TUHAN lalu ngayanka ngagai aku empat iku tukang besi.

²¹Aku lalu nanya ngagai Iya, “Nama utai ti deka dikereja sida?” Ku Iya nyaut, “Sida datai laban sida deka ngemba lalu ngalahka semua bansa ti udah ngalahka menua Judah, sereta ngachirka bala nembiak iya.”