Read Iban Sekariah 10 Bible Online

Sekariah 10 - Iban bible

Sekariah 10

¹Pinta meh ujan ari TUHAN ngambika hari ujan lebuh musin bungai. TUHAN ti ngasuh mua hari nyadi, enggau ngasuh hari ujan, ngambika utai ti ditanam semua orang tumbuh magang.

² Orang betanyaka utai ngagai engkeramba enggau ngagai orang ke tau tilit, tang saut ti diterima sida nya utai ti bula sereta nadai reti. Sekeda sida nerangka mimpi, tang sida semina nesatka kita. Sida nguji merindang kita, tang utai nya nadai guna. Nya alai orang mayuh bekesegau ngapa baka bedus ti tesat. Sida tusah laban sida nadai tuai ngiring.

³Ku TUHAN bejaku, “Aku ringat ngagai orang bansa bukai ke merintah bala nembiak Aku, lalu Aku deka ngukum sida. Orang Judah endang enggi Aku, lalu Aku TUHAN ti Pemadu Bekuasa, deka ngibun sida. Sida deka nyadi kuda perang Aku ti bekuasa.

⁴Orang ke merintah sida, bala tuai, enggau bala tuai soldadu, deka datai ari bala sida empu.[14]

⁵Orang Judah deka menang baka soldadu ke ngelunjak munsuh ba luchak jalai raya. Sida deka ngelaban, laban TUHAN bisi enggau sida. Indah bala munsuh ke nepan kuda deh alah laban sida.

⁶“Aku deka ngasuh orang Judah kering. Aku deka ngelepaska orang Israel. Aku deka kasihka sida lalu mai semua sida pulai baru ngagai menua sida empu. Sida nadai ngasaika diri udah ditulak Aku. Aku tu TUHAN Allah Taala sida. Aku deka nyaut sampi sida.

⁷Orang Israel deka kering baka soldadu, lantang ati baka orang ke udah ngirup wain. Peturun sida deka ingatka pemenang tu lalu gaga ati ketegal utai ti udah dikereja TUHAN.

⁸“Aku deka ngangauka bala nembiak Aku lalu ngempuruka sida. Aku deka ngelepaska sida lalu ngasuh sida mayuh tubuh baka ke dulu menya.

⁹ Taja pen Aku udah ngachirka sida ngagai mayuh bengkah bansa, tang sida ke diau di menua ti jauh deka ingatka Aku. Sida enggau bala anak sida deka meruan idup lalu pulai sama sereta ngagai menua diri empu.

¹⁰Aku deka mai sida pulai ari menua Ejip enggau ari menua Asiria lalu ngentapka sida di menua sida empu. Aku deka mega ngentapka sida di Giliat enggau di Lebanon. Semua menua tu deka penuh laban mensia.

¹¹Lebuh sida bejalai ngerenchah tasik penusah, Aku ti TUHAN, deka malu gelumbang, lalu Sungai Nile deka rangkai. Asiria ti sumbung deka dikemaruhka, lalu Ejip ti kering deka lenyau kuasa.

¹²Aku deka ngasuh bala nembiak Aku kering. Sida deka nyembah lalu ngasika Aku.” TUHAN udah bejaku.