Read Iban Sekariah 11 Bible Online

Sekariah 11 - Iban bible

Sekariah 11

¹Buka pintu nuan, Lebanon, ngambika api ulih nganguska kayu sidar [15] nuan!

²Nyabak duie-duie meh kita kayu saipris laban kayu sidar udah rebah. Kayu ti manah nya udah dirusak! Nyabak duie-duie meh kita kayu oak ti di Basan laban utan ti tebal udah diperimba!

³Bala pemerintah nyabak tusah ati laban mulia sida udah abis! Dinga singa negung, laban utan ti alai sida diau ngimbai Sungai Jordan udah rusak!

⁴Ku TUHAN Allah Taala aku bejaku ngagai aku, “Keluluka diri nyadi pengibun raban bedus [16] ti deka disayat.

⁵Orang ke bempu sida nyayat sida, lalu orang nya enda diukum. Sida nyual dagin, lalu nyebut, ‘Puji TUHAN! Kitai tu kaya!’ Indah orang ke ngibun sida deh enda sinu ati ke sida.” (

⁶Ku TUHAN bejaku, “Aku enggai agi sinu ati ke orang di dunya. Aku Empu deka ngasuh semua orang mayuh diperintah raja sida. Sida raja nya deka ngerusak dunya, lalu Aku enggai ngelepaska dunya ari kuasa sida.”)

⁷Sida ke bebeli enggau bejualka bedus nya ngaji aku, lalu aku nyadi pengibun ke bedus ti deka disayat. Aku ngambi dua iti tungkat: siti dikumbai aku “Pengasih” lalu siti dikumbai aku “Penyerakup.” Aku lalu ngibun raban bedus nya.

⁸Aku enda liat ati enggau tiga iku pengibun bedus ti bukai, ke begedika aku, lalu dalam sebulan aku muai sida tiga.

⁹Udah nya aku bejaku ngagai raban bedus nya, “Aku enggai agi nyadi pengibun kita. Awakka bedus ti endang deka mati, mati. Awakka bedus ti endang deka dirusak, terus dirusak. Sida ke agi tinggal deka ngerusak pangan diri.”

¹⁰Udah nya aku ngambi tungkat ti dikumbai “Pengasih” lalu matahka iya, kena muai sempekat ti udah digaga TUHAN enggau semua bansa.

¹¹Nya alai sempekat nya dibuai lebuh hari nya. Orang ke bebeli enggau bejualka bedus nengkilaka aku, laban sida nemu TUHAN endang bejaku ngena utai ti dikereja aku.

¹² Ku aku bejaku enggau sida, “Enti kita deka, beri ngagai aku meh gaji aku. Tang enti kita enggai, awakka kita nyimpan gaji aku nya.” Nya alai sida meri ngagai aku tiga puluh singkap pirak nyadika gaji aku.

¹³Ku TUHAN bejaku ngagai aku, “Simpan pirak nya dalam sarang reta Rumah Sembiang.” [17] Nya alai aku mai tiga puluh singkap duit pirak nya, upah ti dikira sida chukup ke aku, lalu nyimpan duit nya dalam sarang reta Rumah Sembiang.

¹⁴Udah nya aku matahka tungkat ti kedua, ti dikumbai “Penyerakup.” Menua Judah enggau menua Israel lalu badu agi beserakup.

¹⁵Udah nya TUHAN bejaku ngagai aku, “Keluluka diri sekali agi nyadi pengibun bedus, tang sekali tu nyadi pengibun ti nadai guna.

¹⁶Aku udah ngasuh siku pengibun ngemataka raban bedus Aku, tang iya enda nyaup bedus ti deka disayat. Iya enda mega ngiga bedus ti tesat, tauka ngeraika iya ti kena laban pemedis, tauka engkani bedus ti bepengerai, tang iya makai dagin bedus ti pemadu gemu. Indah tunjing bedus nya deh abis dikuyaska iya.

¹⁷Tulah meh pengibun bedus ti nadai guna nya, ke udah ninggalka raban bedus. Kuasa iya deka dirusak abis lebuh maya perang. Lengan iya deka lupis, lalu mata kanan iya deka buta.”