Read Iban Sekariah 12 Bible Online

Sekariah 12 - Iban bible

Sekariah 12

¹Tu pesan pasal Israel ari TUHAN, TUHAN ti mintarka langit lalu ngaga dunya, lalu meri pengidup ngagai mensia. Ku Iya bejaku,

²“Aku deka ngasuh Jerusalem nyadi baka semangkuk wain. Semua bansa ti ngelingi iya deka ngirup ari mangkuk nya lalu guir-guir bejalai baka orang ke mabuk. Lalu lebuh sida ngelulung Jerusalem, semua nengeri ti bukai di menua Judah deka mega dikelulung sida.

³Tang ba maya nya ila, Aku deka ngaga Jerusalem nyadi baka batu ti berat. Semua bansa ti nguji nanggung iya, deka bebadi. Semua bansa di dunya tu deka beserakup nyerang iya.

⁴Lebuh maya nya ila Aku deka ngasuh kuda sida begau abis ati,[18] lalu ngasuh semua orang ke nepan kuda gila magang. Aku deka nyaga orang Judah, tang Aku deka ngasuh kuda bala munsuh sida buta.

⁵Udah nya suku raban bansa ti diturunka Judah deka bejaku dalam ati diri, ‘TUHAN ti Pemadu Bekuasa meri pengering ngagai nembiak Iya ti diau di Jerusalem.’

⁶“Lebuh maya nya ila Aku deka ngasuh suku raban bansa ti diturunka Judah nyadi baka api ti dalam utan, tauka nyadi baka api ba padang gandum ti udah mansau - sida deka ngerusak semua bansa ti ngelingi sida. Orang Jerusalem deka mengkang diau likun dalam nengeri nya.

⁷“Aku ti TUHAN, deka meri pemenang ngagai bala soldadu Judah dulu, ngambika basa ti deka diterima peturun David enggau orang Jerusalem, enda lebih besai agi ari basa ti deka diterima orang Judah ti bukai.

⁸Lebuh maya nya ila TUHAN deka nyaga orang ke diau di Jerusalem, datai ke orang ke pemadu lemi ari bala sida deh nyadi kering baka David. Peturun David deka nguluka sida baka melikat TUHAN, baka Allah Taala empu.

⁹Lebuh maya nya ila, Aku deka ngerusak semua bansa ti nguji nyerang Jerusalem.

¹⁰ “Aku deka ngirika roh pengasih enggau roh besampi ngagai bala peturun David enggau orang bukai ti diau di Jerusalem. Sida deka merening ngagai orang ke mati dibanchak sida, lalu sida deka ngulitka iya baka orang ke ngulitka anak tunggal diri, lalu duie-duie nyabakka iya, baka orang ke mati anak tuai.

¹¹Lebuh maya nya ila, Jerusalem deka balat ngulit baka orang ke ngulitka Hadat Rimon [19] ba emperan Megido.

¹²Genap ruang bilik di menua nya deka ngulit kediri-diri: ruang bilik peturun David, ari peturun Natan, ari peturun Lewi, ari peturun Simei, enggau semua ruang bilik ti bukai. Genap ruang bilik deka ngulit kediri-diri, lalu sida ke lelaki ari ruang bilik siti-siti deka ngulit kediri-diri, lalu bini sida ngulit kediri-diri.