Read Iban Sekariah 13 Bible Online

Sekariah 13 - Iban bible

Sekariah 13

¹Ku TUHAN ti Pemadu Bekuasa bejaku, “Lebuh maya nya ila, siti ai ti engkeching deka dibuka kena nuchi peturun David enggau orang Jerusalem ari dosa sida enggau ari penyalah sida ke besembahka engkeramba.

²Lebuh maya nya ila Aku deka muai semua nama engkeramba ari menua tu, lalu nadai orang agi ingatka sida. Aku deka muai orang ke ngumbai diri nabi, lalu muai ati ti seruran deka besembahka engkeramba.

³Udah nya, enti orang deka majak benabi, apai enggau indai iya empu deka bejaku enggau iya, madahka iya enda tau enda dibunuh, laban iya ngumbai diri nyebut jaku TUHAN, tang iya ti bendar iya nyebut utai ti bula. Lebuh iya benabi, apai enggau indai iya empu deka manchak iya datai ke mati.

⁴Lebuh maya nya ila, nadai siku nabi deka temegahka genera diri, tauka ngeluluka diri nyadi nabi, tauka bekenaka gari ti kasar baka ke dikena nabi, lalu nipu orang mayuh.

⁵Tang iya deka nyebut, ‘Aku ukai nabi. Aku tu orang bumai. Aku udah bumai tanah tu seumur idup.’

⁶Udah nya, enti orang bisi nanya iya, ‘Nama telih ti ba dada nuan nya?’ iya deka nyaut, ‘Aku telih ba rumah pangan aku.’ ”

⁷ Ku TUHAN ti Pemadu Bekuasa bejaku, “Dani, pedang, lalu serang pengibun bedus [20] nya ke bekereja ke Aku! Bunuh iya, ngambika raban bedus pambar. Aku deka nyerang bala nembiak Aku

⁸lalu di serata menua tu dua bagi ari tiga bagi orang deka mati.

⁹Lalu Aku deka nguji sebagi ari tiga bagi ti agi idup, lalu deka nuchi sida baka ke nuchi pirak ngena api. Aku deka nguji sida baka ke nguji emas. Nya baru sida deka besampi ngagai Aku, lalu Aku deka nyaut sida. Aku deka madahka sida nya nembiak Aku, lalu sida deka ngaku Aku Allah Taala sida.”