Read Iban Sekariah 14 Bible Online

Sekariah 14 - Iban bible

Sekariah 14

¹Hari TUHAN nyau deka datai, alai perapasan ti dirampas ari kita deka dibagi di mua kita empu.

²Laban TUHAN deka ngempuruka semua bansa nyerang Jerusalem, lalu nengeri nya deka alah, utai dalam rumah dirumpak, lalu sida ke indu dipasung. Setengah ari orang Jerusalem deka dibuai ngagai menua bukai, tang sida ti bukai enda ditabanka ari nengeri nya.

³Udah nya TUHAN deka nyerang semua bansa ti nyerang Jerusalem, baka Iya ti udah nyerang dulu menya.

⁴Lebuh maya nya ila Iya deka bediri ba Bukit Kana, tunga ke timur ari Jerusalem. Udah nya siti darung ti besai deka melah Bukit Kana ari timur nyentuk ke barat. Setengah bukit nya deka nginsit tunga ke utara, lalu setengah tunga ke selatan.

⁵Kita deka rari nengah darung ti melah bukit nya,[21] Kita deka rari baka aki ini kita kelia lebuh tanah berenyang lebuh rambau Usiah nyadi raja menua Judah. TUHAN Allah Taala aku deka datai, mai semua melikat enggau Iya.

⁶Lebuh maya nya ila, menua nadai agi chelap tauka dibalut ais,

⁷nadai agi petang. Hari deka seruran terang belama, nyengkaum lebuh malam hari. Semina TUHAN siku aja nemu maya utai nya deka nyadi.

⁸ Ba hari nya, ai ti chiru deka rarat ari Jerusalem, setengah ngagai Tasik mati, lalu setengah ngagai Tasik Tengah. Ai nya deka rarat sepemanjai taun, lebuh musin kemarau, enggau lebuh musin pengujan.

⁹Udah nya baru TUHAN deka nyadi raja ke semua dunya. Genap iku orang deka nyembah Iya, ngena nama Iya siku aja.

¹⁰Semua menua, kenyau ari Geba di utara nyentuk ngagai Rimon di selatan, deka dirataka magang nyadi emperan. Jerusalem deka ngayung semua menua ti ngelingi iya. Rampa nengeri deka berengkah ari Pintu Benjamin nyentuk ngagai Pintu Sukut, ba alai pintu ti dulu menya, lalu ari Menara Hananel nyentuk ngagai pitan anggur raja.

¹¹ Orang deka diau likun dia, nadai agi takutka penusah.

¹²TUHAN deka ngasuh penyakit ninggang semua bansa ti nyerang Jerusalem. Isi, mata enggau dilah sida deka buruk lebuh sida agi idup.

¹³Lebuh maya nya ila TUHAN deka ngasuh sida balat begau abis ati,[22] datai ke sida nangkap lalu ngamuk orang ke berimbai pendiau enggau sida.

¹⁴Indah orang Judah empu deh deka ngelaban orang ke di Jerusalem. Semua pengaya semua bansa ti ngelingi sida deka digumpul magang lalu dibai ngagai Jerusalem - emas, pirak, enggau tugung gari.

¹⁵Penyakit deka mega ninggang kuda, penakan kuda, jelu unta, enggau keledai - semua jelu ti dalam kem munsuh.

¹⁶ Udah nya semua sida ke agi idup ari semua bansa ti udah nyerang Jerusalem, deka mansang ngagai nengeri nya tiap taun lalu nyembah TUHAN ti Pemadu Bekuasa nyadika raja sida, lalu ngintu Gawai Belangkau.

¹⁷Enti bansa siti-siti enggai mansang kia lalu nyembah TUHAN ti Pemadu Bekuasa nyadika raja sida, hari enda ujan di menua sida.

¹⁸Enti orang Ejip enggai ngintu Gawai Belangkau, sida deka ditinggang penyakit ti deka diasuh TUHAN ninggang semua bansa ti enggai mansang ngagai Gawai nya.

¹⁹Tu meh ukum ti deka ninggang menua Ejip enggau semua menua bukai, enti sida enggai ngintu Gawai Belangkau.

²⁰Lebuh maya nya ila, indah luching ti ba rekung kuda deh deka dituliska enggau leka jaku “Diserahka ngagai TUHAN.” Periuk ti dikena manduk utai dalam Rumah Sembiang deka nyadi kudus baka mangkuk ti di mua alta.

²¹Genap igi periuk ti dikena manduk utai di Jerusalem enggau di serata menua Judah deka diserahka magang kena nyembah TUHAN ti Pemadu Bekuasa. Orang ke ngenjuk piring deka ngena periuk nya manduk dagin ti diambi ari piring. Lebuh maya nya ila, orang nadai agi bedagang dalam Rumah TUHAN ti Pemadu Bekuasa.