Read Iban Sekariah 2 Bible Online

Sekariah 2 - Iban bible

Sekariah 2

¹Dalam siti agi genera, aku tepedaka siku orang megai tali penyukat.

²“Deka kini ke nuan?” ku aku nanya. “Ka nyukat Jerusalem,” ku iya nyaut, “ke nemu pemanjai enggau pemesai nengeri nya.”

³Udah nya melikat ti udah berandau enggau aku mansang ke mua, lalu siku agi melikat mansang betemu enggau iya,

⁴lalu bejaku ngagai iya, “Alai nuan belanda lalu padahka ngagai orang bujang nya: Jerusalem deka nyadi baka genturung pendiau ti nadai dinding kuta, laban mensia enggau jelu tupi deka kelalu mayuh dalam nengeri nya.

⁵Laban Aku deka nyadi kuta api ngelingi nengeri nya, lalu Aku deka bemulia dalam nengeri nya.”

⁶Ku TUHAN bejaku ngagai bala nembiak Iya, “Aku udah ngachirka kita ngagai semua endur. Tang diatu, kita ke udah kena buai, enda tau enda rari ari menua Babilon lalu pulai baru ngagai Jerusalem.

⁸Barang sapa nyerang kita, nyerang orang ke pemadu dikesayauka Aku.” Nya alai TUHAN ti Pemadu Bekuasa [1] ngasuh aku mai pesan tu ngagai semua bansa ti udah ngerumpak bala nembiak Iya:

⁹“TUHAN Empu deka ngelaban kita, lalu kita deka dirumpak orang ke udah nyadi ulun kita.” Lebuh utai tu nyadi, nya baru semua orang deka nemu aku amat udah dikirumka TUHAN ti Pemadu Bekuasa.

¹⁰Ku TUHAN bejaku, “Belagu enggau ati ti gaga meh kita orang Jerusalem, laban Aku deka datai lalu diau enggau kita!”

¹¹Lebuh maya nya ila, mayuh bengkah bansa deka datai ngagai TUHAN, lalu nyadika nembiak Iya. Iya deka diau enggau kita, lalu kita deka nemu Iya udah ngirumka aku ngagai kita.

¹²Judah deka nyadi pesaka TUHAN baru di menua Iya ti kudus, lalu Jerusalem deka nyadi nengeri ti pemadu dikerinduka Iya.

¹³Anang inggar semua kita di mua TUHAN, laban Iya deka datai ari endur Iya ti kudus.