Read Iban Sekariah 4 Bible Online

Sekariah 4 - Iban bible

Sekariah 4

¹Melikat ti udah bejaku enggau aku datai baru, lalu ngerak aku baka ke ngerak orang ke tinduk.

²Iya lalu nanya aku, “Nama utai dipeda nuan?” Aku lalu nyaut, “Siti penuduk lampu ti digaga ari emas, ti bisi mangkuk ba puchuk iya. Ba penuduk lampu nya bisi tujuh iti lampu, lalu tiap-tiap iti lampu nya bisi tujuh iti endur alai engkah sumbu.

³ Ngimbai penuduk lampu nya bisi dua batang kayu kana, sekayu muak ari kanan, lalu sekayu muak ari kiba.”

⁴Aku lalu nanya melikat nya, “Nama reti utai nya, tuan?”

⁵Melikat nya lalu nyaut aku, “Kati nuan enda nemu nya?” Aku lalu nyaut, “Enda aku nemu, tuan.”

⁶ Iya lalu madahka ngagai aku, “Tu jaku TUHAN ngagai Serubabel:[5]Ukai ngena pengering, ukai ngena kuasa, tang ulih Roh Aku, ku TUHAN ti Pemadu Bekuasa bejaku.

⁷Sapa nuan nya, O bukit ti besai? Nuan deka digaga nyadi emperan di mua Serubabel. Lalu iya deka mai pansut batu pemun lalu orang mayuh deka manjung, ‘Naka meh penelap Allah Taala!’ ” [6]

⁸TUHAN lalu bejaku baru ngagai aku:

⁹“Jari Serubabel udah nudukka batu pemun Rumah Sembiang tu, lalu jari iya deka mega nembuka Rumah tu. Nya baru kita deka nemu TUHAN ti Pemadu Bekuasa udah ngirumka aku ngagai kita.

¹⁰ Laban barang sapa ngeleseka hari ti mit tu, deka rami gaga, lalu deka meda tali penyukat enggau batu nya ba jari Serubabel. “Lampu tujuh iti nya mata TUHAN, ti meda semua utai di serata dunya.”

¹¹ Udah nya aku nanya iya, “Nama reti dua iti batang kayu kana ti muak ari kanan enggau ari kiba penuduk lampu nya?

¹²Lalu nama reti dua iti dan kayu kana ti nuang minyak nengah dua iti paip emas nya?”

¹³Iya lalu nanya aku, “Kati nuan enda nemu nya?” Aku lalu nyaut, “Enda aku nemu, tuan.”

¹⁴Iya lalu madahka ngagai aku, “Seduai nya orang ke udah dipilih bediri semak TUHAN ti merintah semua dunya.”