Read Iban Sekariah 5 Bible Online

Sekariah 5 - Iban bible

Sekariah 5

¹Aku malik baru, lalu sekali tu aku tepedaka siti gulung surat ti terebai.

²Melikat nya nanya aku pasal utai ti dipeda aku. Aku lalu nyaut, “Siti gulung surat ti terebai. Pemanjai iya semilan meter, lalu buka iya empat meter setengah.”

³Lalu ku iya bejaku ngagai aku, “Ba gulung surat nya bisi dituliska jaku sumpah ke semua menua tu. Ba sepiak gulung surat nya, iya madahka genap iku penchuri deka dibuai ari menua tu. Lalu ba sepiak, iya madahka genap iku orang ke ngelanggar sumpah diri empu, deka mega dibuai.

⁴TUHAN ti Pemadu Bekuasa madahka sumpah nya deka ninggang rumah genap iku penchuri, enggau genap iku orang ke ngelanggar sumpah diri empu. Sumpah nya deka mengkang dalam rumah sida, lalu ngaga rumah nya nyadi tembawai.”

⁵Melikat nya pegari baru, lalu bejaku, “Peda nyin! Bisi siti agi utai bukai pansut!”

⁶Aku lalu nanya, “Nama utai nya?” Iya lalu nyaut, “Siti bakul pansut. Bakul nya dosa [7] semua menua tu.”

⁷Tudung ti digaga ari bangkang lalu dikebakka. Aku lalu tepedaka siku indu duduk dalam bakul nya!

⁸Ku melikat nya bejaku, “Tu penyai.” Iya lalu ngenyakka indu nya ke dalam bakul nya baru, lalu nudung bakul nya baru.

⁹Udah nya aku engkadah, lalu tepedaka dua iku indu datai terebai nuju aku. Sayap seduai iya kering baka sayap burung undan. Seduai iya lalu ngangkatka bakul nya, lalu terebai.

¹⁰Aku lalu nanya ngagai melikat nya, “Kini ke tunga seduai iya mai bakul nya?”

¹¹Disaut iya, “Ngagai menua Babilon, alai sida ke deka ngaga sebuah rumah ke iya. Lebuh rumah nya udah sedia, bakul nya deka diengkah dia, ba penuduk iya.”