Read Iban Sekariah 7 Bible Online

Sekariah 7 - Iban bible

Sekariah 7

¹Kena empat hari bulan ti kesemilan (bulan Kislep), keempat taun Darius nyadi raja, TUHAN meri siti pesan ngagai aku.

²Orang Betel udah ngasuh Sareser seduai Regemelek, enggau bala seduai iya mansang ngagai Rumah TUHAN ti Pemadu Bekuasa, lalu besampi minta berekat ari TUHAN

³sereta mai tanya tu ngagai bala imam enggau bala nabi: “Kati kitai patut majak ngulit sereta bepasa dalam bulan ti kelima ke Rumah Sembiang ti udah dirusak, baka ke udah dikereja kitai betaun-taun tu ti udah?”

⁴Tu pesan TUHAN ti datai ba aku.

⁵Ku TUHAN bejaku, “Padahka ngagai orang di menua tu, enggau ngagai bala imam, lebuh sida bepasa sereta ngulit dalam bulan ti kelima enggau dalam bulan ti ketujuh, dalam kandang tujuh puluh taun tu ti udah, sida ukai ngereja nya kena ngemesaika Aku.

⁶Lalu lebuh sida makai ngirup, sida semina ngemuaska diri empu aja.”

⁷Tu utai ti udah disebut TUHAN ngena bala nabi ke dulu kelia, lebuh maya Jerusalem agi kaya-raja sereta penuh laban mensia, enggau lebuh maya mensia diau, ukai semina dalam nengeri ti mit ngelingi nengeri Jerusalem, tang mega di selatan menua tu, enggau ba sebelah kaki bukit di barat.

⁸TUHAN meri pesan tu ngagai Sekariah:

⁹“Dulu kelia Aku meri pesan tu ngagai bala nembiak Aku: ‘Kita enda tau enda nentuka atur ti lurus dipejalaika, lalu kita enda tau enda ngayanka penelap enggau pengasih ngagai pangan diri.

¹⁰Anang nekanka pengidup indu ke balu, orang ke nadai apai indai, orang kampar ti diau begulai enggau kita, tauka orang ke suntuk. Lalu anang bekiraka jalai ngemediska pangan diri.’

¹¹“Tang bala nembiak Aku kieh, lalu enggai mending. Sida nutup runding sida

¹²lalu ngasuh ati sida kering baka batu. Nya alai laban sida enggai mendingka ajar ti diberi Aku beseruanka sida nabi ke idup dulu kelia, Aku balat amat ringat.

¹³Laban sida enda mending lebuh Aku bejaku, nya alai Aku enda nyaut lebuh sida besampi.

¹⁴Aku baka kabut, ngebuka sida lalu ngasuh sida diau di menua bukai. Menua ti manah tu ditinggalka sunyi, nadai orang nguan.”