Read Iban Sekariah 8 Bible Online

Sekariah 8 - Iban bible

Sekariah 8

¹TUHAN ti Pemadu Bekuasa meri pesan tu ngagai Sekariah:

²“Aku endang lama udah keran deka nulung Jerusalem laban pemalat Aku rinduka nembiak iya, pengerindu ti udah nyungkak Aku ringat ngagai bala munsuh iya.

³Aku deka pulai baru ngagai Jerusalem, nengeri Aku ti kudus, lalu diau dia. Iya deka dikumbai nengeri ti tetap ati, lalu bukit TUHAN ti Pemadu Bekuasa [10] deka dikumbai bukit ti kudus.

⁴Sida lelaki enggau sida indu ke tuai umur ke betungkat lebuh sida bejalai, deka duduk baru ba padang nengeri.

⁵Lalu jalai raya deka penuh laban nembiak ti lelaki enggau ti indu bemain ba jalai raya nengeri nya.

⁶“Utai tu baka ke enda ulih nyadi enti nitihka pikir orang Israel ti agi idup, tang ba Aku nadai utai enda ulih dikereja.

⁷Aku deka ngelepaska bala nembiak Aku ari menua ti alai sida udah ditabanka,

⁸lalu Aku deka mai sida pulai baru ari timur enggau ari barat, ngambika sida diau di Jerusalem. Sida deka nyadi nembiak Aku, lalu Aku deka nyadi Allah Taala sida, lalu Aku deka merintah sida enggau ati ti tetap sereta enggau pengelurus.

⁹“Kita enda tau enda berani! Kita diatu benung ningaka jaku ti udah disebut bala nabi lebuh batu pemun Rumah Sembiang TUHAN didudukka alai nirika Rumah Sembiang nya baru.

¹⁰Sebedau nya suba, nadai orang ulih ngaji mensia tauka nyua jelu, lalu nadai orang likun ari munsuh. Aku udah ngasuh orang ngelaban pangan diri.

¹¹Tang diatu Aku ngereja utai ti lain agi ari nya ngagai bala nembiak Aku ti agi idup.

¹²Sida deka nanam gandum lalu sida nadai utai ngachau. Batang anggur sida deka bebuah, tanah deka mansutka asil, hari deka selalu ujan. Aku deka meri semua berekat tu ngagai bala nembiak Aku ti agi idup.

¹³Kita orang Judah enggau orang Israel! Dulu menya orang bansa bukai udah nyumpah pangan diri, ‘Awakka penusah besai baka ke ninggang orang Judah enggau orang Israel, mega ninggang nuan!’ Tang Aku deka ngidupka kita. Nya baru orang bansa bukai deka nyebut ngagai pangan diri, ‘Awakka nuan bulih berekat baka ke diterima orang Judah enggau orang Israel!’ Nya alai, anang takut, tang berani.”

¹⁴Ku TUHAN ti Pemadu Bekuasa bejaku, “Lebuh aki ini kita kelia ngereja utai ti nyungkak Aku ringat, Aku ngasuh penusah ti besai ninggang sida, lalu Aku enda ngubah runding Diri, tang bejalaika pelan nya.

¹⁵Tang diatu Aku deka merekatka orang Jerusalem enggau orang Judah. Nya alai anang takut.

¹⁶ Tu utai ti patut dikereja kita: sebut utai ti bendar ngagai pangan diri. Dalam kot, beri atur ti lurus - atur ti mai pemaik.

¹⁷Anang bekira deka ngemediska pangan diri. Anang besaksi bula lalu ngelanggar sumpah diri empu. Aku begedika pemula, atur ti enda lurus, enggau ulah ti kasar.”

¹⁸TUHAN ti Pemadu Bekuasa meri pesan tu ngagai Sekariah:

¹⁹“Pengawa bepasa ti dikereja dalam bulan ti keempat, bulan ti kelima, bulan ti ketujuh enggau bulan ti kesepuluh deka nyadi gawai lantang ati enggau pengaga ke orang Judah. Kita enda tau enda rinduka pemendar enggau pemaik.”

²⁰Ku TUHAN ti Pemadu Bekuasa bejaku, “Maya deka datai alai mensia ari mayuh bengkah nengeri [11] deka datai ngagai Jerusalem.

²¹Sida ke datai ari nengeri siti deka nyebut ngagai sida ke datai ari nengeri bukai, ‘Kami deka nyembah TUHAN ti Pemadu Bekuasa. Aram mupuk enggau kami!’

²²Mayuh bansa enggau menua ti bekuasa deka datai ngagai Jerusalem, deka nyembah TUHAN ti Pemadu Bekuasa, lalu besampi minta berekat ari Iya.

²³Lebuh maya nya ila, sepuluh iku orang ari bansa bukai deka mansang ngagai siku orang Judah lalu bejaku, ‘Kami ingin deka enggau kita, laban kami udah ninga Allah Taala bisi enggau kita.’ ”