Read Iban Malaki 2 Bible Online

Malaki 2 - Iban bible

Malaki 2

¹Ku TUHAN ti Pemadu Bekuasa bejaku ngagai bala imam, “Pesan tu diberi ngagai kita:

²Kita enda tau enda ngemesaika Aku ngena utai ti dikereja kita. Enti kita enggai mendingka utai ti disebut Aku, Aku deka nyumpah kita. Aku deka nyumpah utai ti diterima lalu dikena kita nyukung diri. Iya ti bendar, Aku udah nyumpah utai nya, laban kita enda nerima pesan Aku enggau bendar.

³Aku deka ngukum bala anak kita, lalu nginsarka mua kita ba tai jelu, jelu ti diberi kita nyadika piring, lalu kita deka dibai pansut ngagai tugung tai.

⁴ Nya baru kita deka nemu Aku udah meri kita pesan tu, ngambika kita enda ngelanggar sempekat ti udah digaga Aku enggau sida imam ti ari peturun Lewi.

⁵ “Dalam sempekat Aku, Aku besemaya deka meri sida pengidup enggau pengerai, lalu nya meh utai ti udah diberi Aku ngagai sida, ngambika sida nemu bebasaka Aku. Lebuh maya nya kelia, sida amat bebasa sereta nangika Aku.

⁶Sida ngajar utai ti ngena, ukai utai ti salah. Sida sama seati enggau Aku. Sida ukai semina ngereja utai ti ngena, tang sida mega nagang mayuh orang bukai ngereja penyai.

⁷Imam endang betanggungjawap ngajar penemu ti bendar pasal Allah Taala. Orang patut datai ngagai sida ngambika nemu peneka Aku, laban sida imam tu endang seruan TUHAN ti Pemadu Bekuasa.

⁸“Tang diatu kita ke imam udah limpang ari jalai ti ngena. Ajar ti diberi kita udah ngasuh mayuh orang ngereja penyalah. Kita udah ngelanggar sempekat ti udah digaga Aku enggau kita.

⁹Nya alai, Aku diatu deka ngasuh orang Israel mechat kita laban kita enda ngasika peneka Aku, lalu lebuh kita ngajar bala nembiak Aku, kita bepilih mata.”

¹⁰Kati kitai enda saum apai? Ukai enda semua kitai tu digaga Allah Taala? Enti pia, nama kebuah kitai bulaka semaya ti digaga kitai enggau pangan diri? Lalu nama kebuah kitai mechat sempekat ti udah digaga Allah Taala enggau aki ini kitai?

¹¹Orang Judah udah bulaka semaya sida enggau Allah Taala, lalu udah ngereja utai ti jai di Jerusalem, enggau di serata menua tu. Sida udah ngamahka Rumah Sembiang ti dikerinduka TUHAN. Orang ke lelaki udah jadi enggau indu ke nyembah petara orang bansa bukai.

¹²Awakka TUHAN muai orang ke ngereja utai nya ari bansa orang Israel, lalu enda agi nejuka sida enggau orang beberika piring ti dibai bansa kitai ngagai TUHAN ti Pemadu Bekuasa.[1]

¹³Tu siti agi utai ti dikereja kita. Kita ngampuhka alta TUHAN ngena ai mata, nyabak duie-duie laban Iya enda agi nerima piring ti dibai kita ngagai Iya.

¹⁴Kita nanya, “Nama kebuah Iya enda agi nerima piring kita?” Laban TUHAN nemu kita udah bulaka semaya ti digaga kita enggau bini ti enggau kita jadi lebuh kita agi biak menya, laban kita udah enda tetap ati ngagai bini kita, taja pen iya pangan enggau bini kita, ulih sempekat ti digaga kita di mua Allah Taala.

¹⁵Ukai enda Allah Taala ngaga nuan saum tubuh, saum roh enggau iya? Nama tuju Allah Taala ngaga nya? Ngambika seduai bisi anak ke endang amat nembiak Allah Taala. Nya alai, kita enda tau enda netapka diri enda bulaka semaya enggau bini kita.

¹⁶“Aku begedika pengawa sarak,” ku TUHAN Allah Taala ke disembah orang Israel bejaku. “Aku begedi lebuh kita ngereja utai ti jai baka nya ngagai bini kita. Tentuka diri enda bulaka semaya ti madahka kita deka tetap ati ngagai bini kita.”

¹⁷Kita udah ngasuh TUHAN leju mendingka jaku kita. Tang agi ga kita nanya, “Baka ni ku kami udah ngasuh Iya leju?” Laban kita nyebut, “Semua orang ke ngereja penyai manah magang di mua TUHAN, lalu Iya gaga ati ke sida.” Tauka kita nanya, “Dini alai Allah Taala ti dikumbai lurus?”