Read Iban Malaki 3 Bible Online

Malaki 3 - Iban bible

Malaki 3

¹ Aku deka ngasuh seruan Aku nyendiaka jalai ke Aku. Nya baru TUHAN ti digiga kita deka datai enggau ngenyit ba Rumah Sembiang Iya. Seruan ti dikedekaka kita deka datai lalu madahka sempekat Aku.”

² Tang sapa tan lebuh Iya datai? Sapa ulih idup lebuh Iya pegari? Iya deka nyadi baka sabun ti bisa, baka api ti meresi besi.

³Iya deka nuchi peturun Lewi, baka ke nuchi pirak tauka emas. Udah nya baru sida mai piring ti ngena ngagai TUHAN.

⁴Nya baru piring ti dibai orang Judah enggau orang Jerusalem ngagai TUHAN deka ngerinduka ati TUHAN baka menya.

⁵Udah nya baru Aku deka datai semak lalu ngakim kita. Aku deka tekala nya besaksi ngelaban manang, ngelaban orang ke butang, ngelaban orang ke besaksi bula, ngelaban orang ke enda meri gaji ngagai orang ke gawa ke sida, ngelaban orang ke nekanka pengidup orang ke patu balu, enggau pengidup orang kampar, lalu enda nangika Aku, ku TUHAN ti Pemadu Bekuasa bejaku.

⁶ “Laban Aku tu TUHAN, lalu Aku enda berubah. Nya kebuah kita ke peturun Jakop enda lus.

⁷Kenyau ari maya aki ini kita kelia, kita udah limpang lalu enda nitihka Adat Aku. Pulai baru ngagai Aku, nya baru Aku deka pulai baru ngagai kita, ku TUHAN ti Pemadu Bekuasa bejaku. Tang ku kita bejaku, “Baka ni ku chara kami mulaika diri?”

⁸Kati bisi orang deka ngerumpak Allah Taala? Tang kita ngerumpak Aku! Lalu kita nanya, “Baka ni ku kami ngerumpak Nuan?” Ba pasal pemeri sepuluh peratus enggau piring kita!

⁹Kita kena sumpah, laban semua bansa kita ngerumpak Aku!

¹⁰ Bai semua pemeri sepuluh peratus kita ngagai rumah setor Aku, ngambika pemakai seruran bisi dalam rumah Aku. Uji meh Aku, ku TUHAN ti Pemadu Bekuasa bejaku. Nya baru kita deka meda Aku nukangka pintu serega, lalu nuang mayuh macham utai ti manah, ti belimpah-limpah ngagai kita.

¹¹Aku deka nagang bala buntak ngerusak utai ti ditanam kita,[2] lalu anggur kita deka bebuah lebat, ku TUHAN ti Pemadu Bekuasa bejaku.

¹²Nya baru semua bansa deka ngumbai kita beberekat, laban menua kita nyamai alai diau, ku TUHAN ti Pemadu Bekuasa bejaku.

¹³Kita udah bejaku kasar ngelaban Aku, ku TUHAN bejaku. Tang kita nanya, “Baka ni ku kami udah bejaku ngelaban Nuan?”

¹⁴Kita udah nyebut, “Nadai guna betuaika Allah Taala. Nama penguntung ngereja utai ti diasuh Iya, tauka baka orang ke ngulit di mua TUHAN ti Pemadu Bekuasa?

¹⁵Nyadi kitai ngumbai orang ke sumbung lantang diau. Orang ke jai ukai semina nyadi kaya-raja, tang lebuh sida nguji Allah Taala, sida enda diukum.”

¹⁶Udah nya orang ke nangika TUHAN deka bejaku enggau pangan diri. TUHAN mending lalu ninga. Di mua TUHAN Empu, semua nama orang ke nangi sereta bebasaka TUHAN dituliska magang dalam siti bup.

¹⁷“Sida deka nyadi nembiak Aku, ku TUHAN ti Pemadu Bekuasa bejaku, nyadika pesaka Aku ba hari Aku bekereja, lalu Aku enda ngukum sida baka apai ti kasihka anak ke betuaika sida.

¹⁸Udah nya baru bala nembiak Aku deka, sekali agi, meda bida entara orang ke lurus enggau orang ke jai, entara orang ke betuaika Allah Taala enggau orang ke enda betuaika Iya.