Read Iban 1 Makabi 1 Bible Online

1 Makabi 1 - Iban bible

1 Makabi 1

¹Cherita tu belabuh lebuh Raja Alexander anak Philip angkat ari Masedonia, lalu nyerang Raja Darius ke nyadi raja Persia enggau Media. Raja Alexander ngalahka Raja Darius lalu ngerampas penuduk raja. Enggau nya perintah Gerika besai agi.

²Raja ngatur mayuh perang. Mayuh nengeri ti bekuta dirampas iya. Bala raja sida dibunuh iya.

³Iya mansang sampai ke pengujung dunya sereta ngerumpak reta tengkira mayuh bansa. Serata dunya nadai daya laban iya. Nya alai, iya nyau sumbung sereta lawa.

⁴Raja ngempuruka bala soldadu ti kering lalu merintah mayuh nengeri, bansa enggau sida ke bekuasa. Sida enda tau enda mayar chukai ngagai iya.

⁵Udah Raja Alexander merintah pengelama dua belas taun, iya sakit lalu ngasaika diri deka parai. Nya alai, raja lalu ngangauka semua tuai-tuai perang ke tebilang ke belajar begulai enggau iya kenyau ari mit. Iya lalu magi menua ti diperintah iya enggau sida.

⁶

⁷

⁸Udah Raja Alexander parai, bala tuai perang iya lalu merintah menua diri empu ti diberi raja ngagai sida.

⁹Sida nyiri diri empu nyadi raja. Peturun bala raja nya merintah betaun-betaun lalu mai penusah ngagai dunya tu.

¹⁰ Antiokus Epipanes tu anak Raja Antiokus ti ketiga ari Siria. Iya peturun siku tuai perang Raja Alexander. Antiokus Epipanes tu jai. Iya kala dijil di Roma sebedau nyadi raja dalam taun 137[1]

¹¹Maya nya di Israel, bisi seraban orang ke enda pedulika Adat Moses. Sida mai perangai enggau pengawa ti enda manah ngagai orang mayuh. Ku sida, “Manah agi kitai ngaga sempekat enggau semua bansa bukai ke berimbai enggau kitai. Enti kitai enggai begaul enggau sida, kitai deka bulih penusah.”

¹²Perambu nya diterima enggau manah.

¹³Sekeda ari sida sanggup betemu enggau raja, minta iya ngemendarka sida nitihka adat bansa bukai.

¹⁴Di Jerusalem sida ngaga siti stadium baka iya ti bisi di nengeri-nengeri menua Gerika.

¹⁵ Sida muai abi tutus lalu ninggalka sempekat enggau Allah Taala. Sida betampil[2] enggau bansa bukai lalu ngereja pengawa ti jai.

¹⁶Lebuh Raja Antiokus meda perintah iya udah tegap, iya bisi ati deka ngerebut menua Ejip lalu merintah menua nya mega.

¹⁷Iya nyerang Ejip ngena mayuh kapal perang enggau bala soldadu ti kuat, nyengkaum kereta kuda perang enggau bala gajah.

¹⁸Dalam perang nya, Raja Plotemi ke nyadi raja menua Ejip alah. Iya ngerarika diri, lalu mayuh ari bala soldadu iya parai dibunuh.

¹⁹Raja Antiokus mujur ngalahka mayuh nengeri ti bekuta di Ejip lalu nabanka reta tengkira di serata nengeri nya.

²⁰Udah menua Ejip dialahka dalam taun 143[3], Raja Antiokus pulai enggau bala soldadu ti besai amat nyerang menua Israel enggau nengeri Jerusalem.

²¹Enggau penyumbung iya tama ke dalam Rumah Sembiang lalu ngambi alta mas, kaki lampu kelita enggau semua perengka iya,

²²mija endur engkah roti ti kudus, pirin enggau mangkuk, sungkum mas, tirai enggau makuta. Semua mas ti dikena ngelagu mua Rumah Sembiang diambi iya mega.

²³Raja ngambi semua utai ti digaga ari mas enggau pirak nyengkaum semua barang ti berega enggau pengeraja ti dilalai ti ditemu iya dia.

²⁴Semua utai nya diangkut raja ke menua iya empu. Iya udah munuh mayuh orang lalu enggau penyumbung iya nusi semua pengawa ti udah dikereja iya.

²⁵Semua orang di serata menua Israel berasai tusah ati bendar.

²⁶Semua sida ke bekuasa enggau bala tuai-tuai raban bansa serabana magang, bala nembiak, lelaki enggau indu nyau nadai ati, sida ke indu enda bajik agi

²⁷Tiap pengantin lelaki nanyi lagu tusah ati lalu tiap pengantin indu ngulit dalam bilik iya.

²⁸Semua rayat Israel berasai malu, nengeri kitai enda tegap laban orang bansa bukai diau dia.

²⁹Dua taun udah nya, Raja Antiokus ngirumka siku tuai pengumpul chukai ngagai semua nengeri di Judea. Iya mansang ke nengeri Jerusalem enggau seraban soldadu ke mayuh amat.

³⁰Iya bejaku manah enggau rayat. Iya ngaga diri mai sida ngaga sempekat pemaik, lalu sida arapka iya. Ngenyit iya nyerang nengeri nya lalu ngerusak iya balat amat. Mayuh orang Israel parai.

³¹Nengeri nya ditunu lalu reta iya dirampas; mayuh rumah enggau semua dinding nengeri nya dirubuh.

³²Jelu tupi dirampas. Sida ke indu enggau bala anak mit ditabanka sida.

³³Udah nya bagi nengeri tunga ke utara Rumah Sembiang digagaka mayuh dinding ti tinggi sereta tegap enggau mayuh menara ti kuat, lalu nyadi kuta sida.

³⁴Dia sida ngengkah seraban orang Judah ke bedosa sereta ngelaban adat ngambika nyaga endur nya.

³⁵Sida mega nyimpan senjata enggau pemakai enggau prepasan ari Jerusalem. Kuta nya tau mai penusah ngagai nengeri nya.

³⁶Kuta nya tau mai penusah ngagai Rumah Sembiang, munsuh majak ngenusah orang Israel.

³⁷Orang ke enda salah dibunuh ngelingi mija alta ti kamah laban sida ke munuh orang.

³⁸Orang ke diau di Jerusalem rari laban takut lalu orang bansa bukai diau ba nengeri nya. Orang Jerusalem empu ngasaika nengeri nya ukai enggi sida lalu semadi amat sida angkat ninggalka iya.

³⁹Rumah Sembiang sunyi baka padang pasir, semua hari besai iya nyadi hari ngulit. Hari Sabat dikeleseka, basa iya diketawaka sida.

⁴⁰Pemalu iya diatu ngemesai mulia iya suba; pemesai nama iya diulitka.

⁴¹Udah nya Raja Antiokus ngaga adat baru ngasuh semua bansa dalam perintah iya enda tau enda ngelekaka adat sida lalu nyadi siti bansa aja. Semua bansa bukai nitihka adat nya.

⁴²

⁴³Mayuh orang Israel masuk pengarap raja, lalu meri piring ngagai engkeramba sereta ngelaban adat ngetu gawa kena Hari Sabat.

⁴⁴Raja mega ngirumka seruan ngagai Jerusalem enggau nengeri-nengeri di Judea. Seruan nya mai surat ti madahka semua orang enda tau enda nitihka adat bansa bukai.

⁴⁵Sida enda diasuh meri piring kena ngenyenangka ati Tuhan ba Rumah Sembiang, lalu dipinta kereja lebuh hari Sabat enggau hari besai bukai ke selalu diintu sida.

⁴⁶Sida sampai dipinta ngamahka Rumah Sembiang enggau utai kudus dalam iya.[4]

⁴⁷Sida dipinta ngaga alta, rumah sembiang, patung orang kapir, lalu dipinta munuh babi enggau jelu bukai ke enda tuchi diberi nyadika piring ba endur nya.

⁴⁸Sida enda diasuh nutus bala anak sida, lalu sida dipinta ngelaban pengarap diri empu ngena sebarang chara ti ulih dikereja sida,

⁴⁹ngambika sida enda ingatka Adat ti diberi Tuhan ngagai sida nengah Moses, lalu ngelaban semua pengasuh iya.

⁵⁰Barang sapa ngelaban utai ti udah ditetapka raja deka diukum bunuh.

⁵¹Raja netapka adat nya ba semua endur ti diperintah iya. Iya nuduh sekeda orang nyadi pemesai ngemataka rayat lalu ngasuh tiap nengeri di Judea meri piring ngagai engkeramba.

⁵²Mayuh orang bansa Judah sanggup ngelekaka Adat lalu ngasika bala pemesai raja. Sida ngamahka nengeri enggau penyai sida,

⁵³lalu ulah sida ngasuh orang Israel ti manah belalai di sebarang endur.

⁵⁴Kena lima belas bulan Kislev taun 145, Raja Antiokus ngaga ‘utai ti balat ngasuh takut’ ba alta Rumah Sembiang, lalu iya mega ngaga alta petara bukai di semua nengeri di menua Judea.

⁵⁵Piring ngagai petara bukai diberi ba mua rumah enggau ba tisi jalai.

⁵⁶Sebarang bup pasal Adat Moses ti ditemu deka dicharik sereta ditunu,

⁵⁷lalu sebarang orang ditemu nyimpan bup kudus tauka ngasika Adat Moses deka ukum bunuh ari asuh raja.

⁵⁸Bebulan-bulan bala orang ke jai nya ngena kuasa sida ngelaban orang Israel ti ditangkap ba mayuh nengeri.

⁵⁹Kena dua puluh lima hari bulan nya, orang ke jai nya meri piring ba alta sida ti diengkah atas alta ba Rumah Sembiang.

⁶⁰Bala indai ke nutus anak sida diasuh raja ukum bunuh,

⁶¹lalu bala anak mit digantung ba rekung. Sida sebilik enggau orang ke nutus sida diukum bunuh mega.

⁶²Tang mayuh mega orang Israel kering amat ngelaban adat raja, lalu enggai makai pemakai ti enda tuchi.

⁶³Sida deka agi parai ari ti ngelaban sempekat Tuhan, lalu makai utai ti mali. Nya alai, mayuh sida dibunuh.

⁶⁴Israel kena tinggang pengeringat Allah Taala lalu sida merinsa amat.