Read Iban 1 Makabi 10 Bible Online

1 Makabi 10 - Iban bible

1 Makabi 10

¹Dalam taun 160 Alexander Epipanes anak Raja Antiokus Keempat mansang beperang lalu ngerebut nengeri Ptolemais. Raja Antiokus Keempat diterima orang ke diau dia lalu nyadi raja sida.

²Lebuh Raja Demetrius ninga berita nya, iya ngempuruka mayuh amat bala soldadu lalu merang Alexander.

³Raja Demetrius mega ngirum surat ti penuh enggau jaku puji mai bebaik enggau Jonathan

⁴laban ku runding iya, “Manah kitai bebaik enggau orang Judah sebedau sida ngaga sempekat enggau Alexander ngelaban kitai.

⁵Jonathan tentu agi ingatka semua penyai ti udah digaga kitai ngagai iya, bala menyadi iya enggau semua bansa iya.”

⁶Baka nya meh chara Raja Demetrius mai Jonathan setanah enggau iya, lalu meri kuasa ngagai iya ngaga siti raban soldadu ti disikap enggau senyata. Semua orang ke ditan ba kuta nengeri Jerusalem deka diserahka Raja ngagai Jonathan.

⁷Jonathan mansang ke Jerusalem lalu macha surat nya ba mua semua rayat enggau soldadu dalam kuta nya.

⁸Bala soldadu ba endur nya takut amat ninga rita raja udah meri kuasa ngagai Jonathan ngaga siti raban soldadu.

⁹Sida nyerah ngagai Jonathan semua orang ke ditangkap, lalu iya nyerahka sida pulai ngagai apai indai sida.

¹⁰Jonathan lalu diau di Jerusalem sereta belabuh ngaga nengeri nya baru.

¹¹Iya ngasuh orang ke gawa ngaga dinding ngelingi Bukit Sion ngena batu besegi ti besai ngambika kuta nya lebih tegap. Semua utai nya dikereja sida magang.

¹²Semua orang bansa bukai ba semua kuta ti digaga Bakhides rari magang.

¹³Sida ninggalka endur ti dijaga sida lalu pulai ngagai menua sida empu.

¹⁴Tang sekeda orang Judah ke ngelekaka Adat Moses agi diau di Bet-Sur endur sida rari.

¹⁵Maya nya Raja Alexander ninga semua semaya Raja Demetrius ngagai Jonathan. Iya mega ninga pasal Jonathan, pasal semua perang iya, pemerani iya beperang enggau semua penusah ti ninggang iya enggau bala menyadi iya.

¹⁶Lalu ku Raja Alexander bejaku, “Ulih kini kitai tetemuka orang baka iya? Manah kitai bekaban enggau iya lalu mai iya setanah enggau kitai.”

¹⁷Nya alai iya lalu nulis siti surat ngagai Jonathan. Baka tu ku munyi surat nya:

¹⁸“Raja Alexander ngagai Jonathan, tabika nuan!

¹⁹Kami udah ninga nuan siku orang ke gagah berani lalu patut nyadikaban raja.

²⁰Nya alai sehari tu kami ngangkatka nuan nyadi Imam Besai ari bansa nuan empu, lalu meri nuan gelar ‘Kaban Raja’ enti nuan setanah enggau kami lalu tetap bekaban enggau kami.” Raja Alexander mega ngirumka siti gari perintah enggau siti makuta mas ngagai Jonathan.

²¹Dalam bulan tujuh taun 160 lebuh Gawai Belangkau, Jonathan ngena baju Imam Besai. Iya ngaga siti raban soldadu ti disikap enggau mayuh senyata.

²²Lebuh Raja Demetrius ninga berita nya, iya tusah amat ati lalu bejaku,

²³“Baka ni kitai tau ngelakka Raja Alexander dulu ari kitai? Raja nya udah ngeringka penuduk iya ngena jalai bekaban enggau orang Judah.

²⁴Aku mega deka nulis surat ti ngenyenangka ati sida, besemaya deka meri sida penuduk ti tinggi, lalu meri sida pemeri ngambika sida nyukung aku.”

²⁵Nya alai, iya lalu nulis siti surat ngagai orang Judah enggau pesan ti munyi tu: “Raja Demetrius ngagai bansa Judah, Tabika kita!

²⁶Kami gaga amat ninga bala kita nitihka semua atur ti bisi ba semaya kitai. Kita agi taluk ngagai kami, lalu enda setanah enggau munsuh kami.

²⁷Enti kita taluk belama, penaluk kita deka dibalas kami enggau pemanah.

²⁸Kita deka diberi kami utai ti manah-manah, lalu diseliahka ari mayar mayuh chukai.

²⁹Kami ngemendarka semua bansa Judah enda ibuh mayar chukai biasa, chukai garam enggau semua chukai ungkup raja.

³⁰Kelimpah ari nya, kita enda ibuh mayar sebagi ari tiga bagi asil gandum enggau setengah ari asil semua buah. Belabuh ari sehari tu datai ke selama-lama iya, kami enda minta bayar ari menua Judah enggau tiga bagi menua ti suba dalam Samaria enggau Galili, lalu diatu begulai enggau Judah.

³¹Jerusalem enggau menua ngelingi nya mesti diaku kami nyadi nengeri kudus, lalu enda ibuh mayar semua chukai.

³²Kami mega badu bekuasa ba kuta di Jerusalem lalu nyerahka kuasa nya ngagai Imam Besai. Iya tau ngasuh bala soldadu ke dipilih iya nyaga endur nya.

³³Semua orang Judah ke ditangkap lebuh perang ba semua endur ti dikuasa kami, dilepaska kami magang, nadai mayar uang tebus. Semua sida enda ibuh mayar chukai, lalu pia mega jelu ti ditupi sida enda ibuh dichukai.

³⁴Lebuh Hari Sabat, Hari Besai Bulan Baru enggau hari besai bukai, semua orang Judah ba perintah kami enda ibuh mayar chukai sereta enda ibuh mayar utang. Nambahka nya, chukai enggau utang mega enda digumpul tiga hari sebedau enggau tiga hari udah hari besai ti disebut tadi.

³⁵Ba semua hari nya mega nadai siku orang patut minta bayar ari kita tauka ngachau kita ngena sebarang jalai.

³⁶Lebih kurang 30,000 iku orang Judah bepeluang nyadi soldadu raja, lalu deka digaji sebaka enggau bala soldadu bukai.

³⁷Sekeda sida deka diengkah ba semua kuta besai raja, lalu sekeda deka diberi penuduk ngereja pengawa perintah. Orang ke nyadi tuai enggau tuai perang sida, deka dipilih ari bala sida empu. Sida tau nitihka adat sida empu baka ti udah dikemendarka raja ungkup menua Judah.

³⁸Semua tiga bengkah pelilih menua di Samaria ti udah dipegulaika enggau menua Judah, tetap nyadi siti menua enggau Judah, lalu deka dikuasa Imam Besai empu.

³⁹Duit perintah ari nengeri Ptolemais enggau semua endur ti diperintah iya, diberi kami ngagai Rumah Sembiang di Jerusalem kena melanja semua utai ti dikena sembiang.

⁴⁰Tiap taun kami deka meri 15,000 kepin duit pirak ari reta raja.

⁴¹Semua duit tulung perintah ti enda dibayar kami dua tiga taun tu ti udah, deka dibayar kami diatu. Belabuh ari diatu kami deka nyuaka bayar nya belama kena ngereja pengawa ba Rumah Sembiang.

⁴²Kelimpah ari nya kami badu ngambi chukai tiap taun penyampau 5,000 kepin duit pirak ari Rumah Sembiang. Duit nya ungkup bala imam ke nguluka sembiang ba Rumah Sembiang.

⁴³Barang sapa ke rari ngagai Rumah Sembiang tauka ngagai tengah laman rumah nya ngambika enda kena tangkap, laban iya berutang ba raja tauka ba orang bukai, orang nya deka dilepas, lalu reta iya deka diberi pulai baru ngagai iya.

⁴⁴Semua belanja ti dikena ngaga tauka ngaduka Rumah Sembiang deka dibayar ngena reta raja.

⁴⁵Baka nya mega, semua belanja kena ngaga baru dinding Jerusalem, kuta kena ngelingi iya enggau dinding di sekeda nengeri di menua Judah, dibayar ngena reta raja magang.”

⁴⁶Lebuh Jonathan enggau rayat ninga perambu Raja Demetrius, sida enda arap lalu enggai nerima semua utai nya. Sida agi ingatka semua penyai ti balat amat dikereja iya ba bansa Israel lebuh iya merinsa sida.

⁴⁷Sida deka agi setanah enggau Raja Alexander laban iya ke dulu besemayaka pemaik enggau sida. Nya alai, sida tetap setanah enggau Raja Alexander.

⁴⁸Maya nya Raja Alexander ngempuruka mayuh raban soldadu lalu beperang ngelaban Raja Demetrius.

⁴⁹Raja dua iku nya betempuh, lalu soldadu Raja Demetrius ngerarika diri. Raja Alexander ngagai sida, lalu ngalahka sida.

⁵⁰Raja Alexander ngelaban enggau naka alah sampai matahari padam, lalu sehari nya mega Raja Demetrius parai.

⁵¹Udah nya Raja Alexander ngirumka seruan ti mai pesan ti munyi tu ngagai Raja Ptolemeus Keenam ke nyadi raja menua Ejip:

⁵²“Aku udah pulai ke menua diri empu lalu udah mujur ngalahka Demetrius. Aku udah ngerebut kuasa ba bagi menua kami lalu duduk ba kerusi raja aki ini aku.

⁵³Demetrius enggau bala soldadu iya dialahka aku lebuh beperang, lalu aku ngerampas perintah iya.

⁵⁴Nya alai, kitai patut ngaga semaya bekaban enggau pangan diri. Awakka aku jadi enggau anak nuan. Aku deka meri nuan enggau anak nuan pemeri ti ngerinduka ati seduai.”

⁵⁵Raja Ptolemeus nyaut, “Gaga amat nuan sehari nya lebuh nuan pulai ngagai menua diri empu lalu duduk ba kerusi raja aki ini nuan.

⁵⁶Aku setuju enggau penemu nuan. Tang nuan mesti betemu enggau aku ba nengeri Ptolemais ngambika tua ulih bekelala. Udah nya nuan tau jadi enggau anak aku.”

⁵⁷Nya alai dalam taun 162 Raja Ptolemeus enggau anak iya Kleopatra ninggalka menua Ejip lalu datai di Ptolemais.

⁵⁸Seduai iya disambut Raja Alexander, lalu Raja Ptolemeus nyerahka Kleopatra anak iya ngagai Raja Alexander. Tikah seduai nya dintu enggau pengerami besai di Ptolemais baka adat bala raja ngelama tu.

⁵⁹Udah nya Raja Alexander nulis surat ngagai Jonathan ngambika iya nemuai ngagai raja.

⁶⁰Nya alai Jonathan mansang ngagai Ptolemais lalu enggau baju ti dikena orang bepangkat iya betemu enggau dua iku raja nya. Iya nyuaka pemeri mas enggau pirak ngagai seduai nya. Iya mega meri mayuh pemeri bukai ngagai bala kaban raja, lalu semua sida berasai tetegu ati laban iya.

⁶¹Sekeda orang Judah ke ngelaban adat, lalu deka ngerusak bansa diri empu baum ngelaban Jonathan sereta betenahka iya. Tang Raja Alexander enda pedulika sida.

⁶²Iya ngasuh Jonathan diberi gari perintah.

⁶³Jonathan diasuh duduk nisi raja. Raja Alexander lalu bejaku enggau bala pemesai iya, “Alai kita enggau Jonathan ngagai tengah-tengah nengeri, lalu padahka nadai siku orang tau betenahka Jonathan tauka ngachau iya ketegal nama-nama kebuah.”

⁶⁴Lebuh orang ke betenahka Jonathan meda iya diberi gari perintah enggau basa, lalu lebuh sida ninga jaku padah orang pasal Jonathan, semua sida rari magang.

⁶⁵Raja meri basa ngagai Jonathan ngena jalai, meri iya pangkat ti pemadu tinggi nyadi Pangan Raja. Jonathan mega diasuh nyadi tuai perang lalu nyadi tuai megai menua.

⁶⁶Jonathan lalu pulai ke Jerusalem enggau ati senang sereta selamat.

⁶⁷Dalam taun 165, Demetrius Kedua, anak Raja Demetrius Kesatu ninggalka Kreta lalu datai di Siria, menua aki ini iya.

⁶⁸Lebuh ninga berita nya, Raja Alexander irau ati lalu pulai ke Antiokia, indu nengeri Siria.

⁶⁹Maya nya Raja Demetrius nuduh Apolonius baru nyadi tuai megai menua Siria Besai. Apolonius ngaga raban soldadu ti besai lalu belangkau semak Jamnia. Iya ngirum pesan tu ngagai Jonathan, Imam Besai:

⁷⁰“Nuan aja ke ngelaban kami. Ketegal nuan, kami diketawa sereta dikeleseka orang. Nama kebuah nuan mandangka kuasa nuan ngelaban kami di bukit?

⁷¹Enti nuan amat arapka soldadu nuan, nurun meh besatup enggau kami ba emperan ngambika kitai nemu sapa bagi kitai ke amat kering. Nuan deka meda raban soldadu ari semua nengeri bisi enggau kami.

⁷²Manah agi enti nuan mansik dulu sapa kami, lalu sapa ke setanah enggau kami. Nuan deka nemu diri enda tan laban kami. Aki ini nuan sampai dua kali ngerarika diri ba menua sida empu.

⁷³Anang nuan ngarapka diri tan laban raban bekuda kami enggau soldadu kami ke kering ba emperan tu. Ditu batu mit pen nadai endur belalai lalu nadai endur alai rari.”

⁷⁴Lebuh Jonathan nerima pesan Apolonius, iya ringat amat. Dipilih iya 10,000 iku soldadu, lalu angkat meh sida ari Jerusalem. Menyadi tuai iya, benama Simon mai raban soldadu siti deka nulung iya.

⁷⁵Sida lalu belangkau semak nengeri Jopa. Orang ba nengeri nya enda ngasuh sida tama laban dia udah bisi soldadu Apolonius. Tang Jonathan nyerang nengeri nya.

⁷⁶Laban takut, nya alai orang ke diau ba nengeri nya lalu muka pintu penama besai, ngelakka Jonathan ngalahka nengeri nya.

⁷⁷Lebuh ninga berita nya, Apolonius mai 3,000 iku raban soldadu ke nepan kuda enggau raban soldadu bejalai kaki ti mayuh amat. Iya ngaga diri nuju nengeri Asdot. Tang maya nya iya mansang ke emperan bepanggai ba pengering raban soldadu iya ke nepan kuda.

⁷⁸Iya ninggalka 1,000 iku raban soldadu iya ke nepan kuda ngambika nyubuk lalu nyerang soldadu Jonathan ari belakang. Jonathan nitihka munsuh sampai ke Asdot, lalu betempuh dia.

⁷⁹

⁸⁰Maya nya meh Jonathan nemu diri kena ipa. Bala soldadu iya diserang. Ari pagi sampai lemai sida ditembak munsuh ngena panah.

⁸¹Tang bala nembiak Jonathan ngenanka diri enda rari, lalu ngelaban baka ti udah dipadahka iya, ketegal nya raban soldadu munsuh ke nepan kuda nyau lelak.

⁸²Udah raban soldadu ke nepan kuda nya lelak, ngenyit Simon enggau bala iya ayan. Iya nyerang lalu ngasakka raban soldadu munsuh ke bejalai kaki. Nya alai, bala munsuh rari lalu pambar.

⁸³Raban soldadu munsuh ke nepan kuda mega pambar di emperan, lalu rari ke Asdot sereta belalai ba rumah sembiang petara bukai engkeramba sida benama Dagon.

⁸⁴Tang Jonathan nunu nengeri nya enggau rumah sembiang petara bukai Dagon ti bisi dia, lalu semua orang ke belalai dia mati retung magang. Semua genturung pendiau ba sebelah nya dirampas lalu ditunu mega.

⁸⁵Sehari nya munsuh ke parai laban pedang tauka api bisi lebih kurang 8,000 iku.

⁸⁶Udah nya Jonathan ngejangka endur nya, lalu belangkau semak Askelon. Iya disambut orang di nengeri nya enggau basa ti besai.

⁸⁷Iya enggau bala nembiak iya pulai ke Jerusalem mai mayuh perapasan.

⁸⁸Lebuh Raja Alexander ninga utai ti udah dikereja Jonathan, iya meri basa ti besai agi ngagai iya.

⁸⁹Iya meri siti kancin mas baka ti selalu diberi iya ngagai orang ke dikumbai “Kaban Raja”, lalu nyerahka nengeri Ekron enggau endur ngelingi nya ngagai Jonathan ngambika dempu iya aja.