Read Iban 1 Makabi 11 Bible Online

1 Makabi 11 - Iban bible

1 Makabi 11

¹Raja Ptolemeus Keenam ke nyadi raja Ejip ngempuruka raban soldadu ti besai amat mayuh baka keresik di tebing tasik, lalu ngumpul mayuh kapal perang. Enggau jalai tipu iya deka ngalahka perintah Raja Alexander ngambika menua raja nya nambahka menua iya.

²Nya alai raja ngagai menua Siria deka ngaga sempekat pemaik. Semua orang ke diau ba nengeri nya muka pintu besai ke iya lalu nyambut iya. Pengawa nya dikereja sida ari asuh Raja Alexander laban Raja Ptolemeus nya mentua iya.

³Raja Ptolemeus ngengkah raban soldadu ba tiap nengeri ti ditama iya.

⁴Lebuh iya datai di Asdot, iya dibai meda pengerusak rumah sembiang petara bukai Dagon ti angus, lalu iya mega dibai meda pengerusak nengeri enggau mayuh genturung pendiau ti ngelingi nya, nyengkaum endur bangkai mensia betegaring. Bangkai orang ke parai angus ditunu Jonathan lebuh beperang, ditugungka ba tisi pemanjai jalai ti mesti ditengah Raja Ptolemeus.

⁵Raja Ptolemeus mega ditusika pasal pengawa ti udah dikereja Jonathan kena ngenyaika nama iya. Tang raja enda bemunyi.

⁶Jonathan mansang ngagai Jopa deka nyambut penatai raja enggau pengerami. Sida betabi lalu bemalam din.

⁷Udah nya, Jonathan nganjung raja naka Sungai Eleuterus, lalu pulai baru ke Jerusalem.

⁸Baka nya meh jalai Raja Ptolemeus ngambi kuasa semua nengeri di sebelah tebing tasik datai ngagai nengeri Seleukia semak tasik. Raja ngaga atur ti jai kena ngelaban Raja Alexander lebuh iya

⁹ngirum surat ngagai Raja Demetrius munyi tu, “Manah tua ngaga sempekat. Anak indu aku ke jadi enggau Raja Alexander deka diberi aku ngagai nuan, lalu nuan deka megai perintah apai nuan.

¹⁰Aku nesal amat nyerahka anak indu aku ngagai Alexander laban iya nguji deka munuh aku.”

¹¹Raja Ptolemeus bejai Raja Alexander laban deka ngambi kuasa perintah iya.

¹²Raja Ptolemeus ngambi anak iya ari Raja Alexander lalu meri iya ngagai Raja Demetrius. Raja Ptolemeus mutuska semua kaul enggau Raja Alexander, lalu iya nyata bendar bemunsuh enggau iya.

¹³Raja Ptolemeus tama ke dalam nengeri Antiokia lalu ngangkatka diri nyadi raja Asia Barat Daya. Enggau nya iya nyadi raja Ejip enggau Asia Barat Daya.

¹⁴Labuh maya nya Raja Alexander benung di Kilikia laban orang ba menua nya benung ngelaban iya.

¹⁵Tang lebuh Raja Alexander ninga pengawa ti dikereja Raja Ptolemeus, raja mansang beperang ngelaban iya. Raja Ptolemeus ngelaban iya enggau raban soldadu ti kering sampai Raja Alexander rari.

¹⁶Kuasa Raja Ptolemeus majak nambah. Benung nya Raja Alexander belalai di Arab.

¹⁷Tang iya dibunuh ulih siku orang Arab benama Zabdiel, lalu pala iya dikirum ngagai Raja Ptolemeus.

¹⁸Dua hari udah nya Raja Ptolemeus empu parai. Raban soldadu iya ba semua nengeri ti bekuta dibunuh orang ke diau ba nengeri nya empu.

¹⁹Nya alai Demetrius Kedua nyadi raja dalam taun 167 (145 B.C.).

²⁰Lebuh maya nya Jonathan ngempuruka orang ari Judea laban deka nyerang kuta di Jerusalem. Sida ngaga mayuh panggau asur ngambika bisi dikena beperang.

²¹Tang sekeda orang Judah ke benchi meda bansa diri empu mansang betemu enggau Raja Demetrius Kedua. Sida madahka iya pasal Jonathan ke deka nyerang kuta di Jerusalem.

²²Lebuh ninga berita nya, Raja Demetrius ringat lalu terus mansang ke nengeri Ptolemais. Iya ngirumka siti surat ngagai Jonathan minta iya badu nyerang lalu jampat datai betemu enggau raja di Ptolemais.

²³Taja Jonathan udah nerima pesan raja, tang iya majak ngasuh nyerang. Iya milih sekeda bala tuai di Israel enggau sekeda imam ngambika enggau iya. Iya merantuka nyawa diri empu,

²⁴mansang betemu enggau raja di Ptolemais mai mas, pirak, gari enggau mayuh pemeri bukai. Iya mandangka pemanah diri, nya alai raja rinduka iya.

²⁵Taja Jonathan dipetenah orang jai ari bansa iya empu,

²⁶raja manah enggau iya baka bala raja bukai ke manah enggau iya dulu ari nya. Jonathan dipebasa ba mua bala pangan raja.

²⁷Iya ditetapka mangku pengawa Imam Besai lalu mega mangku pengawa ti besai-besai ti dipegai iya ngelama tu. Iya sampai diangkat nyadi siku ari raban ti dikumbai Pangan Raja.

²⁸Jonathan minta ngagai raja ngambika menua Judea enggau tiga iti bagi menua Samaria enda ibuh mayar chukai, lalu kena nganti nya iya besemaya deka meri 11,000 kilogram pirak ngagai raja.

²⁹Raja setuju lalu kena netapka semua utai nya, iya nulis siti surat ngagai Jonathan. Tu munyi surat nya,

³⁰“Raja Demetrius ngagai Jonathan pangan aku, enggau ngagai bansa Judah, tabika semua kita!

³¹Kami udah ngirum surat ngagai kaban kami Lastenes nusi pasal kita. Kupi surat nya dikirum kami ngagai kita ngambika kita nemu.

³²Ari Raja Demetrius nuju iya ke dipebasa tuan Lastenes, tabika nuan.

³³Kami udah mutuska runding deka meri utai ti nguntungka bansa Judah kena malas pemanah sida laban sida kaban kami ke taluk lalu ngereja pengawa nitihka semaya sida enggau kami.

³⁴Kami ngemendarka sida ngempu bagi menua Judea enggau tiga bagi menua bukai baka nengeri Efraim, Lida enggau Ramataim nyengkaum endur ngelingi nya. Tiga iti bagi menua Samaria nya ditetapka kami nyadi siti enggau Judea. Pekara nya deka nguntungka orang ke mai pemeri ngagai Jerusalem laban chukai ninting taun ari semua utai ti ditanam enda agi diberi ngagai raja tang diberi ngagai Rumah Sembiang.

³⁵Belabuh ari sehari tu sida enda agi mayar chukai sepuluh peratus, chukai garam enggau semua chukai ungkup raja.

³⁶Nadai siti ari pekara ti disebut dalam surat tu tau dikinsil belabuh ari seharitu datai ke selama-lama iya.

³⁷Gaga kupi surat tu, lalu beri ngagai Jonathan ngambi bisi engkah ba Bukit Sion awakka ulih dipeda semua orang.”

³⁸Raja Demetrius meda menua iya bisi pemaik enggau pengelantang diperintah iya, lalu nadai agi orang deka ngelaban iya. Nya alai iya lalu ngemaduka semua raban soldadu iya. Semua bala soldadu diasuh pulai ke rumah diri empu magang, semina raban soldadu ke digaji ari Gerika aja ke agi bisi dia. Ketegal nya, bala soldadu ke bekereja kenyau ari bala raja dulu suba, belabuh benchi meda Raja Demetrius.

³⁹Ari pemayuh orang suba ke nyukung Raja Alexander, bisi siku orang benama Trifon. Iya meda semua raban soldadu muchau ngagai Raja Demetrius. Nya alai iya mansang betemu enggau Imalkue, orang Arab ke ngibun lalu ngajar Antiokus, anak Raja Alexander ke agi biak.

⁴⁰Lama diri Trifon diau dia. Iya ngansak Imalkue nyerahka nembiak nya ngagai iya ngambika diangkat nyadi raja nganti apai iya. Iya mega madah ngagai Imalkue pasal pengawa ti dikereja Raja Demetrius ti ngujungka iya dibenchi bala soldadu ke diasuh iya badu.

⁴¹Benung nya Jonathan ngenataika peminta ngagai Raja Demetrius ngambika iya narit bala raban soldadu iya ari kuta di Jerusalem enggau ari semua kuta di Judea laban sida nya majak nyerang Israel.

⁴²Ku Raja Demetrius nyaut, “Peminta nuan deka dikemendarka aku, lalu enti bisi peluang, aku deka bebasaka nuan enggau bansa nuan lebih agi ari selama.

⁴³Tang diatu aku minta nuan ngirumka bala nuan nulung aku beperang laban semua raban soldadu aku ngelaban aku.”

⁴⁴Nya alai Jonathan lalu ngirumka 3,000 iku soldadu ke gagah berani ngagai Antiokia. Raja gaga amat ati nyambut penatai sida.

⁴⁵Tang 120,000 iku orang ke diau ba nengeri udah begempuru ba tengah-tengah nengeri laban deka munuh raja.

⁴⁶Lebuh orang mayuh nya nguasa semua jalai lalu belabuh nyerang, raja rari ke dalam istana.

⁴⁷Raja lalu minta tulung raban soldadu bansa Judah, lalu semua sida nya begempuru ngelingi raja. Sida mansang ngagai serata nengeri nya lalu munuh kira 100,000 iku orang.

⁴⁸Sida nyelamatka raja lalu ngerampas nengeri nya sereta nunu iya sampai retung.

⁴⁹Lebuh orang mayuh meda nengeri sida udah dikuasa orang Judah, sida nyau nadai ati agi, lalu enggau nyawa ti inggar minta kasihka raja. Ku sida,

⁵⁰“Bebaik meh enggau kami! Anang ngelakka orang Judah majak nyerang kami enggau nengeri tu!”

⁵¹Sida ke ngelaban raja nikauka senyata diri lalu bebaik enggau iya. Ketegal nya, raja enggau semua orang ba perintah iya bebasa amat ke orang Judah. Udah nya sida pulai ke Jerusalem mai mayuh perapasan.

⁵²Penuduk Raja Demetrius makin tegap lalu menua iya bisi pemaik enggau pengelantang.

⁵³Tang raja mungkir semaya diri lalu ngelaban Jonathan. Iya enda malas pemanah Jonathan tang balat ngenusah iya.

⁵⁴Enda lama udah nya Trifon pulai enggau Antiokus ke agi biak amat. Antiokus lalu dichiri nyadi raja.

⁵⁵Semua raban soldadu ke udah dikemaduka Raja Demetrius setanah enggau raja ke agi biak nya. Raja Demetrius diserang lalu alah sereta ngerarika diri.

⁵⁶Trifon ngerampas bala gajah lalu ngerebut nengeri Antiokia.

⁵⁷Raja Antiokus ke agi biak nulis surat ngagai Jonathan. Baka tu ku isi surat nya: “Aku netapka nuan mangku pengawa nyadi Imam Besai lalu ngangkatka nuan nguasa empat iti bagi menua nya. Aku mega meri nuan gelar ‘Pangan Raja’.”

⁵⁸Sereta enggau surat nya, raja ngirumka perengka enggau kerusi mija kena makai ti digaga ari mas. Jonathan dikemendarka ngirup ngena mangkuk mas, ngena gari printah enggau kancin mas ti semina tau dikena “Kaban Raja” aja.

⁵⁹Raja mega ngangkatka Simon menyadi tuai Jonathan nyadi tuai megai menua ba endur ari entara menua enggau Fenisia sampai ngagai entara menua enggau Ejip.

⁶⁰Udah nya Jonathan enggau bala soldadu iya mansang nengah mayuh nengeri di menua Siria Besai. Semua raban soldadu Siria setanah enggau sida. Jonathan mansang ke Askelon, lalu disambut orang ke diau dia enggau pengerami.

⁶¹Angkat ari nya, iya ke Gasa tang orang ke diau ba endur nya nutup pintu besai. Nya alai, iya nyerang nengeri nya, lalu endur ngelingi nya dirampas sereta ditunu iya.

⁶²Orang ke diau di Gasa minta diri bebaik enggau Jonathan. Nya alai, iya lalu mai sida ngaga sempekat. Tang bala anak tuai sida ditangkap lalu dikirum ke Jerusalem. Udah nya iya nemuai ngagai menua nya datai ngagai Damaskus.

⁶³Jonathan ninga berita pasal tuai perang Raja Demetrius enggau raban soldadu iya ti besai udah datai di Kades di Galili enggau tuju deka muai iya.

⁶⁴Nya alai, iya angkat deka beperang ngelaban sida, lalu menyadi tuai iya benama Simon tinggal di Judea.

⁶⁵Simon belangkau ba mua nengeri Bet-Sur nyerang nengeri nya lalu sida lama amat betempuh enggau orang ke diau dia.

⁶⁶Ujung iya orang di menua nya minta diri bebaik enggau iya. Simon pen lalu setuju. Tang iya muru sida lalu diau ba nengeri nya. Bala soldadu diengkah iya dia mega.

⁶⁷Benung nya Jonathan enggau raban soldadu iya belangkau semak Tasik Genesaret. Tumu pagi siti sida angkat ke emperan Hasor.

⁶⁸Tang soldadu munsuh nyatup sida dia, udah sida ninggalka sekeda ari bala sida ngipa orang Judah dia. Benung soldadu munsuh besatup enggau Jonathan,

⁶⁹bala soldadu munsuh ke ngipa sida pansut lalu nyerang sida.

⁷⁰Semua soldadu Jonathan ngerarika diri. Nadai siku sida tinggal kelimpah ari dua iku tuai perang sida, iya nya, Matatias anak Absalom enggau Judas anak Kalfi.

⁷¹Jonathan nyarikka baju iya laban berasai malu amat lalu iya enggau ati baruh besembiang.

⁷²Iya lalu mansang baru nyerang munsuh lalu muru sida sampai sida ngerarika diri.

⁷³Lebuh bala nembiak Jonathan ke ngerarika diri meda utai baka nya, sida nikal baru enggau ngagai munsuh sampai di langkau sida di Kades lalu diau ba langkau nya.

⁷⁴Sehari nya lebih kurang 3,000 iku soldadu munsuh parai. Udah nya, Jonathan mulaika diri ke Jerusalem.