Read Iban 1 Makabi 12 Bible Online

1 Makabi 12 - Iban bible

1 Makabi 12

¹Lebuh Jonathan meda diri bisi peluang ti manah, iya milih sekeda orang lalu ngirumka sida ke Rom ngambi neguh sereta ngulang baru kaul sida enggau orang Rom.

²Iya mega ngirumka mayuh surat ti bisi pesan ti sebaka ngagai Sparta enggau sekeda endur bukai.

³Sida ke dikirum nya lalu angkat ke Rom. Sida mansang ngagai Dewan Negara lalu madahka diri nyadi pengari dikirum Imam Besai Jonathan enggau bansa Judah ngulang baru kaul enggau orang Rom.

⁴Orang Rom lalu meri sida surat ti diserah ngagai bala pemesai di semua menua ti ditengah sida ngambika sida likun pulai ke menua.

⁵Tu kupi surat ti dikirum Jonathan ngagai orang Sparta:

⁶“Imam Besai Jonathan, Kunsil Tuai-Tuai Raban Bansa, bala imam enggau semua bansa Judah, ngagai bala menyadi kami di Sparta, tabi basa!

⁷Dulu suba raja kita Raja Areios ngirum surat ngagai Onias, Imam Besai kami madahka bansa kitai bekaban. Kupi surat nya bisi disertaka kami ditu.

⁸Sida ke dikirum Raja Areios disambut Onias enggau penuh basa, lalu surat ti madahka kitai bekaban udah diterima iya.

⁹Iya ke bendar, kaul baka nya tau enda ibuh ba kami laban kami ngulihka pengering ari bup kudus ti dikembuan kami.

¹⁰Tang kami nguji ngirum surat tu mega kena ngulang baru kaul kitai lalu ngambu kita menyadi laban kami enggai dikumbai kita orang ke enda dikelala kita. Tambah mega udah betaun-taun kitai nadai ngaul pangan diri kenyau ari surat ti keterubah iya suba.

¹¹Ngelama tu, ninting taun kami ingatka kita maya kami bisi peluang, baka lebuh ngintu pengerami enggau hari bukai lebuh kami nyuaka pesembilian enggau sembiang, lalu nya dikereja kami ke kita kena kami ngingatka kita baka orang diri menyadi.

¹²Kami gaga laban kita tampak rita.

¹³Kami amat udah ngasaika mayuh penusah enggau perang laban kami suah diserang bala raja ngelingi kami.

¹⁴Sekumbang kami beperang, kami enggai ngenusah kita enggau sida ke setanah tauka bekaban enggau kami,

¹⁵laban kami bulih tulung ari Tuhan. Iya meh ke ngalahka semua munsuh kami lalu nyelamatka kami ari sida.

¹⁶Kami udah milih Numenius anak Antiokus enggau Antipater anak Jason, lalu ngirumka seduai iya ke Rom ngambi ngulang baru kaul kami enggau orang Rom.

¹⁷Seduai iya mega dikirum kami ngagai kita ngambika ngenataika jaku tabi kami, lalu mai surat tu pasal ngulang baru kaul kitai bambu madi.

¹⁸Kami minta kita malas surat kami tu.”

¹⁹Nyadi tu kupi surat ti dikirum sida ngagai Onias:

²⁰“Raja Areios, raja Sparta ngagai Imam Besai Onias, tabika nuan!

²¹Kami udah tetemuka siti surat pasal orang Sparta enggau orang Judah ti madahka kitai tu diri menyadi laban bansa kitai peturun Abraham.

²²Kenyau ari kami nemu pekara nya, kami deka nemu berita pasal kita.

²³Reta kami, jelu tupi kami enggau tanah kami enggi kita. Lalu pia mega, reta kita, jelu tupi kita enggau tanah kita enggi kami. Kami ngasuh sida ke dikirum kami madahka pekara tu ngagai kita.”

²⁴Jonathan ninga berita pasal bala tuai perang Raja Demetrius datai baru mai bala soldadu mayuh agi laban deka beperang ngelaban iya.

²⁵Jonathan enggai meri peluang ngagai sida tama ngagai menua iya. Nya alai, Jonathan angkat ari Jerusalem lalu besatup enggau sida ba pelilih menua Hamat.

²⁶Jonathan ngasuh sekeda orang matau langkau munsuh. Sida pulai lalu nusi pasal munsuh ke udah besedia deka nyerang orang Judah lebuh malam hari.

²⁷Lebuh mata panas padam, Jonathan ngasuh bala nembiak iya bejaga sepemanjai malam ngena senyata ti chukup, besedia nyatup serang munsuh sebarang maya. Iya mega ngasuh orang bejaga ngelingi langkau.

²⁸Lebuh bala soldadu munsuh ninga Jonathan enggau bala nembiak iya udah besedia deka betempuh, sida takut amat. Sida ngidupka tugung panduk ba langkau sida lalu ngerarika diri.

²⁹Jonathan enggau bala nembiak iya meda tugung panduk nya, tang baru hari siti nya baru sida nemu utai ti udah nyadi.

³⁰Jonathan lalu ngagai bala munsuh tang enda ulih nangkap sida laban sida udah ngelayang Sungai Eleuterus.

³¹Jonathan nguing lalu nyerang orang Zabadi ari raban bansa Arab. Orang Zabadi alah, lalu semua reta sida dirampas.

³²Udah nya Jonathan angkat baru lalu mansang ke Damaskus sereta matau serata menua nya.

³³Maya nya Simon mega mansang betempuh lalu terus mansang datai di Askelon enggau semua kuta ngelingi endur nya. Udah nya iya nguing nuju Jopa, siti nengeri ti bekuta lalu ngengkah seraban soldadu nyaga endur nya laban iya udah ninga orang ke diau dia deka nyerahka nengeri bekuta nya ngagai raban soldadu Raja Demetrius.

³⁴

³⁵Lebuh Jonathan pulai ke Jerusalem, iya ngangauka bala tuai rayat lalu berunding enggau sida ngaga sekeda kubu di Judea,

³⁶ngeninggika semua dinding di Jerusalem, lalu nirika dinding ti tinggi kena nyapat kuta enggau nengeri ngambika kuta kediri lalu munsuh enda ulih bedagang enggau orang ke diau dia.

³⁷Rayat begotong-royang gawa ngenanka nengeri, laban sebagi ari dinding muak ari timur sepemanjai Lebak Kidron udah rubuh. Dinding ba entang Kafenata mega patut diaduka baru.

³⁸Simon mega ngaga baru nengeri Adida ti ba kaki bukit. Nengeri nya ditegapka iya, lalu digagaka pintu besai penama enggau sengkal penambit pintu.

³⁹Udah nya Trifon nguji deka muai Raja Antiokus ngambika iya empu ulih nyadi raja Asia Barat Daya.

⁴⁰Tang iya irauka Jonathan enda setuju lalu nyerang iya. Nya alai Trifon mansang ke Bet-Sean enggau tuju deka nangkap lalu munuh Jonathan.

⁴¹Jonathan mega ke Bet-Sean mai 40,000 iku soldadu ke dipilih iya laban deka nyatup Trifon.

⁴²Meda Jonathan mai soldadu ngemayuh nya, Trifon enda berani nangkap iya.

⁴³Nya alai, iya lalu nerima Jonathan enggau penuh basa, lalu dibai iya bekelala enggau semua pangan iya. Jonathan diberi iya mayuh macham pemeri. Semua pangan enggau raban soldadu iya diasuh iya talukka Jonathan baka sida ke talukka iya.

⁴⁴Iya nanya Jonathan, “Nama kebuah nuan ngenusah soldadu ngemayuh nya, ukai tua beperang?

⁴⁵Manah nuan ngasuh sida pulai. Pilih mimit aja ari sida nya lalu bai enggau kitai ke Ptolemais. Aku deka nyerahka nengeri tu ngagai nuan. Aku mega deka nyerahka semua kuta, semua soldadu enggau semua bala pemesai aku ngagai nuan. Udah nya aku deka nguing lalu ninggalka nuan. Nya meh kebuah aku tu ditu.”

⁴⁶Jonathan pechayaka Trifon lalu nitihka jaku iya. Iya ngasuh semua raban soldadu iya pulai ke Judea.

⁴⁷Semina 3,000 iku aja dibai iya, 2,000 iku ditinggalka iya di Galili, lalu 1,000 iku sida bukai dibai begulai enggau iya.

⁴⁸Tang udah Jonathan tama ke nengeri Ptolemais, orang ke diau dia nutup pintu besai penama. Jonathan ditangkap lalu semua bala soldadu ke enggau iya dibunuh enggau pedang.

⁴⁹Trifon lalu ngirumka raban soldadu iya ke bejalai kaki enggau raban soldadu iya ke ngena kuda ngagai Galili enggau Lebak Yizreel ngambi ngalahka semua raban soldadu Jonathan.

⁵⁰Raban soldadu bansa Judah berunding ngumbai Jonathan enggau bala sida ke enggau iya udah ditangkap lalu dibunuh. Nya alai, sida ngeringka ati diri lalu bebaris mansang deka betempuh.

⁵¹Lebuh bala munsuh meda orang Judah udah besedia deka beperang sampai parai, sida nikal.

⁵²Semua soldadu bansa Judah datai di Judea enggau selamat tang enggau ati ti takut. Semua rayat Israel ngulit laban tusah ati ngumbai Jonathan enggau bala soldadu iya udah parai.

⁵³Semua bansa ke ngelingi sida nguji deka ngerusak orang Judah. Ku runding sida, “Orang Judah nadai tuai tauka penulung agi. Manah kitai betempuh ngelaban sida diatu ngambika semua sida parai magang, lalu badu dikingatka orang agi.”