Read Iban 1 Makabi 13 Bible Online

1 Makabi 13 - Iban bible

1 Makabi 13

¹Simon ninga Trifon ngempuruka mayuh bala soldadu laban deka tama ke menua Judea lalu nganchurka iya.

²Simon nemu berita nya ngenakut sereta ngerawanka ati rayat. Nya alai, iya mansang ke Jerusalem, lalu ngempuruka semua rayat.

³Iya nguji meransang ati sida enggau jaku tu, “Semua kita nemu mayuh utai udah dikereja apai aku, kami menyadi enggau aku empu ketegal Adat Moses enggau Rumah Sembiang. Kita mega nemu pasal semua perang enggau penusah ti diasaika kami.

⁴Semua menyadi aku udah meri nyawa diri ketegal Rumah Sembiang, Adat Moses enggau bansa kitai. Ari semua kami menyadi semina aku aja ke agi idup.

⁵Tang aku enggai nyelamatka diri empu lebuh kena tuntung sebarang penusah. Aku ukai ngumbai diri manah agi ari bala menyadi aku.

⁶Taja semua bansa bukai ke benchi meda kitai, setanah magang, laban deka ngalahka kitai, aku deka ngelaban ketegal nyaga bansa aku, Rumah Sembiang enggau bini anak kita.”

⁷Lebuh ninga jaku nya, rayat bulih peransang ati

⁸lalu nyaut enggau nyawa ti nyaris, “Idup Simon, tuai baru kitai nganti Judas seduai Jonathan!

⁹Uluka kami beperang! Semua jaku nuan deka dititihka kami magang!”

¹⁰Simon ngempuruka semua soldadu lalu berumban-rumban nembuka semua dinding Jerusalem sereta negapka pengelikun iya.

¹¹Iya ngirumka Jonathan anak Absalom enggau siti raban soldadu ti chukup besai ngagai nengeri Jopa. Jonathan muru orang ke diau dia, lalu iya empu netapka diri diau dia.

¹²Trifon enggau siti raban soldadu ti besai ngejangka nengeri Ptolemais laban deka nyerang menua Judea. Jonathan menyadi Simon ke udah ditangkap dibai enggau sida.

¹³Maya nya Simon belangkau semak nengeri Adida ba tisi emperan.

¹⁴Lebuh Trifon ninga rita Simon udah nganti menyadi iya Jonathan, lalu udah besedia deka betempuh ngelaban iya, dia iya ngirumka pesan ti munyi tu ngagai Simon,

¹⁵“Kami udah nangkap Jonathan, menyadi nuan laban lebuh iya agi mangku pengawa, iya enda mayar semua utang iya ngagai sarang reta raja.

¹⁶Tang kami deka ngelepaska iya enti nuan mayar 3,000 kilogram pirak ngagai kami, lalu ngirumka dua iku anak lelaki iya ngambika ditan kami nyadi ke jamin iya enda ngelaban kami udah kami ngelepaska iya.”

¹⁷Taja Simon nemu diri ditipu, tang iya ngirum duit enggau dua iku anak lelaki Jonathan laban iya enggai ngasuh rayat ngembuan ati benchi.

¹⁸Iya nangika sida ngumbai Jonathan dibunuh laban iya enggai ngirumka duit enggau dua iku anak lelaki nya.

¹⁹Nya alai iya nurutka peminta Trifon tang Trifon mungkir janji iya lalu enda ngelepaska Jonathan.

²⁰Udah nya Trifon mansang nengah jalai bukai ke Adora laban deka ngempu lalu ngerusak nengeri nya. Tang Simon enggau bala soldadu iya nyekat semua tunga pejalai Trifon.

²¹Benung nya, bala soldadu munsuh di kuta Jerusalem ngirumka mayuh seruan ngagai Trifon ngansak iya datai jampat nengah padang pasir mai ke sida barang pemakai.

²²Trifon nyediaka semua raban soldadu iya ti ngena kuda laban sida mansang nyerang. Tang malam nya saleju nurun balat amat nyentukka sida enda ulih majakka pejalai diri. Nya alai, Trifon nyurutka diri lalu mansang ke Giliat.

²³Lebuh sida nyau semak nengeri Baskama, Trifon munuh Jonathan lalu nguburka bangkai iya dia.

²⁴Udah nya Trifon nikal lalu mulaika diri ngagai menua iya empu.

²⁵Simon lalu ngasuh sekeda orang mai bangkai Jonathan ke Modein ngambika dibukur ba nengeri aki ini iya.

²⁶Semua bansa Israel enggau ati tusah nyabakka Jonathan, lalu ngulitka iya lama amat.

²⁷Udah nya Simon nirika siti tugu ti ulih dipeda ari jauh atas kubur apai enggau bala menyadi iya. Mua enggau belakang tugu nya dilapis enggau batu ti bekilat.

²⁸Iya mega ngaga tujuh iti piramid ti betunga ungkup apai indai iya enggau empat iku bala menyadi iya.

²⁹Ngelingi semua piramid nya didirika iya mayuh tiang besai. Ba atas iya bisi ukir perengka senyata, lalu ba tisi iya bisi mayuh ukir kapal. Tugu nya digaga ke tanda pengingat pemenang sida ke selama-lama iya, lalu dipeda semua orang ke belayar di tasik.

³⁰Kubur ti didirika Simon ba nengeri Modein agi meruan sampaika sehari tu.

³¹Benung nya, Trifon mudi Raja Antiokus Keenam, raja ke agi biak lalu munuh iya.

³²Trifon lalu duduk ba kerusi raja perintah Asia Barat Daya, lalu mai penusah ngagai menua nya.

³³Simon ngaga mayuh kuta di menua Judea lalu ngaga mayuh menara ti tinggi, ngaga mayuh dinding ti tegap enggau pintu penama besai enggau sengkal penambit. Iya mega nyimpan bekal pemakai di endur nya.

³⁴Iya ngirumka seruan ngagai Raja Demetrius Kedua minta ngambika bagi menua nya dilepaska ari mayar chukai laban Trifon udah ngerampas sida.

³⁵Tu saut ti dikirum Raja Demetrius:

³⁶“Raja Demetrius ngagai Imam Besai Simon ti pangan semua raja enggau ngagai bansa Judah enggau bala tuai sida, tabika semua kita!

³⁷Kami udah nerima makuta mas enggau dan engkerema ti dikirumka nuan. Kami deka ngaga sempekat pemaik enggau nuan lalu nulis ngagai bala pemesai pengumpul chukai ngambika kita enda mayar chukai.

³⁸Semua utai ti ditetapka kami suba endang agi baka suba, lalu semua kuta ti digaga nuan endang enggi nuan.

³⁹Semua penyilap enggau penyalah nuan sampaika sehari tu, diampun kami. Nuan mega enda ibuh mayar chukai perintah ti patut dibayar nuan lalu enda ibuh mega mayar semua chukai bukai ti digumpul sampai sehari tu di Jerusalem.

⁴⁰Semua orang Judah ke patut gawa nyaga pengelikun kami, diterima kami gawa enggau kami. Aram meh kitai diau dalam pemaik.”

⁴¹Nya alai, dalam taun 170, semua bansa bukai badu ngenyakka orang Judah.

⁴²Belabuh ari nya, kena ngepunka semua surat sempekat, orang Judah belabuh enggau jaku tu: “Dalam taun keterubah Simon ke nyadi Imam Besai, tuai perang enggau tuai orang Judah.”

⁴³Lebuh maya nya Simon enggau bala soldadu iya nyerang nengeri Geser. Iya ngaga siti panggau dikena nyerang ti ulih dipindah kin kitu. Panggau nya dibai iya semak ngagai dinding nengeri. Siti ari menara nengeri nya diserang lalu dirampas iya.

⁴⁴Orang ke datas panggau nya terejun ke dalam nengeri lalu ngasuh orang begau.

⁴⁵Orang ke diau ba nengeri nya, lelaki, indu enggau bala anak sida niki ke atas dinding nengeri lalu nyarikka gari sida tanda tusah ati. Enggau nyawa ti inggar sida minta Simon bebaik enggau sida.

⁴⁶Ku sida ngangau, “Kasihka kami! Anang malas penyai kami!”

⁴⁷Nya alai, Simon bebaik enggau sida lalu enda nyerang sida. Tang iya muru orang ke diau ba nengeri nya, lalu meresi semua rumah sida ari patung engkeramba. Udah nya iya enggau bala nembiak iya tama ke nengeri lalu nanyi lagu puji.

⁴⁸Semua utai ti ngasuh nengeri nya enda kudus dibuai iya magang, lalu iya ngasuh orang ke talukka Adat Moses diau dia. Iya mega nambahka pengering nengeri nya lalu nirika siti istana enggi iya empu.

⁴⁹Benung nya bala soldadu ke diau ba kuta di Jerusalem enda ulih pansut bebeli tauka bejual ngagai endur bukai. Sida enda chukup pemakai, lalu mayuh ari sida parai kebuluran.

⁵⁰Ujung iya sida minta diri bebaik enggau Simon. Iya setuju tang sida nya diburu iya ari endur nya, lalu kuta nya diberesi ari semua penyai ti ngasuh enda kudus.

⁵¹Kena dua puluh tiga haribulan kedua taun 171, Simon enggau bala nembiak iya tama kuta nya. Sida mai dan engkerema lalu nanyi lagu puji enggau terima kasih diring gambus, gong enggau belikan laban munsuh besai Israel udah alah.

⁵²Simon netapka hari nya mesti dirami enggau pengaga ninting taun. Udah nya ditambahka iya pengering ba bukit endur Rumah Sembiang ti betunga enggau kuta. Iya enggau bala soldadu iya diau dia.

⁵³Joannes anak Simon udah besai, nya alai Simon lalu ngangkatka iya nyadi tuai perang semua bala soldadu. Joannes diau di Geser.