Read Iban 1 Makabi 14 Bible Online

1 Makabi 14 - Iban bible

1 Makabi 14

¹Dalam taun 172 Raja Demetrius Kedua ngempuruka bala soldadu iya, lalu angkat ke Media ngiga tulung beperang ngelaban Trifon.

²Lebuh Arsakes Keenam, raja Persia enggau Media ninga Raja Demetrius tama ngagai bagi menua iya, dia iya lalu ngirum siku tuai perang enggau sekeda raban soldadu nangkap Raja Demetrius idup-idup.

³Sodadu Raja Demetrius diserang lalu alah. Raja Demetrius empu ditangkap lalu dibai betemu enggau Raja Arsakes sereta dijil.

⁴Sekumbang Simon merintah menua Judea, menua nya bisi pemaik. Iya enggau naka ulih mai pengelantang ngagai bansa iya. Perintah iya dikarinduka semua rayat, lalu iya dipebasa seumur idup.

⁵Iya ngerampas Jopa siti nengeri endur penyangkai kapal, nya alai tebuka meh jalai nuju mayuh pulau di Gerika. Pemanah Simon nya ngasuh iya majak tebilang.

⁶Simon ngaga besai agi bagi menua bansa iya, lalu nguasa serata menua nya.

⁷Mayuh orang ke ditangkap lebuh perang dibai iya pulai. Geser, Bet-Sur enggau kuta di Jerusalem dirampas iya. Kuta nya dituchi iya ari semua pengamah, lalu nadai siku orang ngelaban iya.

⁸Orang Judah bumai ba tanah sida dalam pemaik enggau pengelantang. Nya alai tanah mansutka asil enggau mayuh pun buah ti lebat.

⁹Bala sida ke bujang ngena baju soldadu sida ti manah endar, lalu bala orang tuai duduk ba padang berandau pasal pengelantang ti diasaika sida maya nya.

¹⁰Simon meri pemakai ngagai semua nengeri lalu nyikap sida ngena senyata kena nyaga diri ari munsuh. Ketegal nya, iya majak tebilang di serata menua nya.

¹¹Iya mai pemaik ngagai bansa iya, lalu nya ke ngasuh semua orang Israel udu gaga.

¹²Semua orang idup lantang ba baruh pun anggur enggau pun ara, lalu nadai utai ngenakutka sida.

¹³Semua raja ke bemunsuh enggau sida udah alah magang, lalu ba nengeri nya nadai agi orang beperang enggau orang Judah.

¹⁴Simon nulung mayuh bansa iya ke miskin. Iya talukka Adat Moses lalu ngalahka semua orang jai enggau orang ke ngelaban adat.

¹⁵Rumah Sembiang dilagu iya enggau manah. Iya mega nambahka mayuh perengka kena besembiang.

¹⁶Berita pasal pemarai Jonathan ngasuh orang Rom enggau Sparta tusah amat ati.

¹⁷Tang lebuh orang Sparta ninga Simon nganti menyadi iya nyadi Imam Besai, lalu nguasa serata menua nya enggau nengeri dia,

¹⁸sida nulis surat ngagai Simon ngulang semaya bekaban ti digaga sida enggau menyadi iya Judas seduai Jonathan. Surat ti diukir ba lampang engkeraju

¹⁹ti dibacha ngagai pengari rayat di Jerusalem.

²⁰Tu kupi surat ti dikirum orang Sparta: “Rayat Sparta enggau bala tuai sida ngagai Imam Besai Simon, bala tuai enggau bala imam sereta enggau semua rayat bansa Judah ti menyadi kami, tabika semua kita!

²¹Bala seruan ke dikirum nuan ngagai kami nusi kita tebilang sereta dibasa orang amat. Penemuai sida mai pengaga ngagai kami.

²²Penerang ari sida udah kami tulis ba pemutus aum pengari rayat baka tu: ‘Numenius anak Antiokus enggau Antipater anak Jason, seruan bansa Judah ke dipebasa, datai ngagai kami ngulang sempekat bekaban enggau kami.

²³Aum pengari rayat setuju nerima sida enggau basa lalu nuliska penerang ari sida ba siti bup disimpan ba nengeri tu ngambika bisi dikenang rayat Sparta. Kupi surat nya diberi ngagai Imam Besai Simon.’ ”

²⁴Udah nya Simon ngirumka Numenius ke Rom lalu mai pemeri terabai mas ti besai berat 44 kilogram kena negapka sempekat sida bekaban enggau orang Rom.

²⁵Lebuh rayat ninga semua utai ti nyadi nya, sida lalu bejaku, “Baka ni kami ulih malas pemanah Simon enggau bala anak iya?

²⁶Iya enggau bala menyadi iya enggau ruang bilik apai iya orang ke gagah berani. Sida udah ngalahka munsuh kitai, lalu ngelepaska bansa kitai ari bansa bukai.” Nya alai, sida ngukir semua utai nya ba lampang engkeraju lalu ngengkah iya ba tiang besai di Bukit Sion.

²⁷Tu isi utai ti ditulis nya: “Kena lapan belas haribulan Elul taun 172, iya nya, taun ketiga perintah Imam Besai Simon di Asaramel,

²⁸pekara dibaruh tu disebut ba aum besai bala imam, rayat enggau tuai-tuai raban bansa:

²⁹Tiap kali lebuh perang nyadi ba menua tu, Simon anak Matatias peturun Jehoiarib enggau bala menyadi iya merantuka nyawa sida nyelamatka Rumah Sembiang, bansa enggau Adat kitai ari munsuh. Sida udah ngasuh bansa kitai nyadi bansa ti besai, ti dipebasa ulih semua orang.

³⁰Jonathan udah ngempung bansa kitai lalu nyadi Imam Besai sampai parai.

³¹Udah nya munsuh deka nyerang lalu ngerusak menua tu sereta ngamahka Rumah Sembiang.

³²Tang Simon angkat lalu beperang ngeringka bansa iya. Mayuh duit iya dikena ngaji bala soldadu sereta dikena meli senyata ke guna sida.

³³Semua nengeri di Judea dikeringka iya, lebih agi Bet-Sur ti ba entara menua, ti dulu suba nyadi gudang endur munsuh nyimpan senyata. Dia diengkah iya siti raban soldadu diau ba nengeri nya.

³⁴Nengeri penyangkai kapal Jopa enggau nengeri Geser ba entara menua Asdot ti dulu suba endur soldadu munsuh diau dikeringka Simon mega. Iya ngasuh orang Judah diau ba nengeri dua iti nya, lalu meri sida sebarang utai ti dikena ngaduka baru nengeri dua iti nya.

³⁵Lebuh rayat meda penaluk Simon enggau semua pengawa ti dikereja iya ngemansangka bansa diri, sida ngasuh iya nyadi Imam Besai enggau tuai sida. Sida ngereja nya ketegal semua pengawa ti udah ditembuka Simon ulih penaluk iya. Iya mega udah ngayanka pengelurus lalu nguji ngena mayuh jalai ngulihka pemenang ke bansa iya.

³⁶Lebuh Simon merintah, iya ngalahka orang bansa bukai ari nengeri Judea. Iya mega ngalahka soldadu munsuh ke diau di kuta di Jerusalem ke selalu pansut ari nya ngamahka endur ngelingi Rumah Sembiang.

³⁷Orang Judah dengkah iya ba kuta nya, lalu dikeringka iya ngambika nengeri Jerusalem enggau serata menua nya bisi pemaik. Semua dinding nengeri Jerusalem digaga iya tinggi.

³⁸Ketegal pemanah Simon nya, Raja Demetrius netapka iya nyadi Imam Besai.

³⁹Raja bebasa amat ke Simon lalu meri iya gelar Pangan Raja.

⁴⁰Pekara nya dikereja iya laban iya ninga orang Rom ngambu orang Judah kaban enggau menyadi ke setanah enggau sida. Raja mega ninga orang ke dikirum Simon diterima enggau penuh basa di Rom.

⁴¹Rayat Judah enggau bala imam sida setuju ngasuh Simon enggau peturun iya nyadi tuai enggau nyadi Imam Besai sida sekumbang ke nganti penatai siku nabi.

⁴²Simon diangkat nyadi orang ke nguasa menua, nguasa Rumbah Sembiang enggau nyadi tuai perang. Iya bisi kuasa ngasuh orang nguasa barang soldadu enggau semua nengeri ti bekuta. Iya mega bisi kuasa nuduh orang nyadi tuai ngereja semua pengawa ke orang mayuh. Iya mega bisi kuasa milih orang nyadi tuai nguasa pelilih menua.

⁴³Semua orang mesti nitihka jaku iya dalam semua utai. Semua sempekat perintah mesti ngena nama iya. Iya bisi kuasa ngena gari perintah enggau kancin mas.

⁴⁴Nadai siku rayat tauka imam ulih ngubah tauka madamka semua pemutus nya tauka ngelaban perintah Simon. Sida mega enda diasuh ngempuruka orang mayuh ba menua nya enti nadai pemendar, lalu enda tau mega ngena gari perintah enggau kancin mas.

⁴⁵Barang sapa enda peduli tauka enda nitihka semua atur nya deka diukum.

⁴⁶Semua rayat setuju meri kuasa ngagai Simon bejalaika pengawa belalauka semua pemutus nya.

⁴⁷Simon mega nerima nya lalu besedia nyadi orang ke pemadu bekuasa, nyadi Imam Besai, nyadi tuai perang soldadu enggau nyadi tuai rayat enggau tuai bala imam.”

⁴⁸Semua jaku nya ditulis ba lampang engkeraju lalu diengkah ba endur ti ulih dipeda di genturung Rumah Sembiang.

⁴⁹Kupi utai ti ditulis nya disimpan ba sarang nyimpan duit Rumah Sembiang ngambika bisi dipeda Simon enggau bala anak.