Read Iban 1 Makabi 15 Bible Online

1 Makabi 15 - Iban bible

1 Makabi 15

¹Maya nya ari pulau Gerika, Antiokus anak Raja Demetrius nulis surat ngagai Simon, Imam Besai ke nguasa bansa Judah enggau ngagai semua bansa rayat Judah.

²Tu munyi surat nya: “Raja Antiokus ngagai Simon, Imam Besai ke nguasa bansa Judah, enggau ngagai semua rayat, tabika semua kita!

³Perintah aki ini kami udah dirampas sekeda orang ke jai. Kami bisi ati deka ngambi iya pulai baru lalu ngemansangka iya baka ke dulu suba. Kami udah ngempuruka raban soldadu ti besai lalu nyikap semua kapal perang.

⁴Kami deka sangkai di menua kami sereta ngalahka orang ke udah ngerusak mayuh nengeri lalu nganchurka menua.

⁵Kami deka netapka kita enda mayar chukai tauka mayar utai bukai baka ti udah ditetapka bala raja ke dulu ari kami.

⁶Kami meri kuasa ngagai nuan ngaga mata duit ke diri empu.

⁷Jerusalem enggau Rumah Sembiang tetap enda mayar chukai. Semua perengka senyata ti digaga nuan enggau semua kuta ti didiri sereta dikuasa nuan tetap enggi nuan.

⁸Kelimpah ari nya, semua utang nuan ngagai perintah enggau semua utai ti patut dibayar nuan udah dikinsil magang ke selama-lama iya.

⁹Pengudah kami ngerebut penuduk raja, kami deka meri basa ti pemadu besai ngagai nuan, bansa nuan enggau Rumah Sembiang ngambika tampak nama di serata dunya.”

¹⁰Dalam taun 174 Antiokus nyerang menua aki ini iya. Mayuh raban soldadu setanah enggau iya, lalu mimit aja raban soldadu ke setanah enggau Trifon.

¹¹Antiokus ngagai Trifon ke rari ngagai nengeri Dor di tebing tasik.

¹²Trifon nadai pengandal agi laban semua raban soldadu iya udah ninggalka iya.

¹³Antiokus mai 120,000 iku soldadu enggau 8,000 iku raban soldadu ke bekuda nyerang nengeri Dor.

¹⁴Maya nya mega, nengeri nya diserang Antiokus ari tasik ngena kapal sampaika nadai siku orang ulih tama tauka pansut.

¹⁵Maya nya Numenius enggau bala iya pulai ari Rom mai surat ti ditujuka ngagai bala raja enggau mayuh bengkah menua. Baka tu ku munyi surat nya:

¹⁶“Ari Lusius pengari orang Rom ngagai Raja Ptolemeus, tabika nuan!

¹⁷Imam Besai Simon enggau bansa Judah, pangan enggau sida ke setanah enggau kami udah ngirum seruan ngambika ngulang baru sempekat kitai ti bekaban.

¹⁸Sida mai pemeri, iya nya, siti terabai mas ti berat 44 kilogram.

¹⁹Kami sanggup nulis surat ngagai semua raja enggau menua ngambika enda ngachau tauka nyerang orang Judah, semua nengeri enggau menua sida, lalu enda mega setanah enggau orang ke nyerang sida.

²⁰Kami udah mutus ati nerima terabai nya ari sida.

²¹Nya alai enti bisi orang ke ngelaban rari ari menua Judea lalu belalai di menua nuan, serahka iya ngagai Imam Besai Simon ngambika iya ngukum orang nya nitihka adat sida.”

²²Lucius nulis surat ti sebaka isi ngagai Raja Demetrius, Atalus, Ariarates enggau Arsakes,

²³pia mega ngagai semua menua tu: Sampsames, Sparta, Delos, Mindos, Sikion, Karia, Samos, Pamfilia, Likia, Halikarnasus, Rodes, Faselis, Kos, Side, Aradus, Gortina, Knidus, Siprus enggau Kirene.

²⁴Salin semua surat nya mega dikirum ngagai Imam Besai Simon.

²⁵Raja Antiokus ngelingi nengeri Dor kedua kali. Iya ngasuh raban soldadu iya majak nyerang nengeri nya ngena panggau asur ti digaga iya empu. Trifon dikelinggi munsuh ngambika iya enda ulih ninggalka nengeri nya.

²⁶Simon ngirumka 2,000 iku soldadu ke pemadu manah nulung Raja Antiokus. Iya mega ngirum mas, pirak enggau mayuh pekakas.

²⁷Tang Raja Antiokus enggai nerima semua utai nya. Semua sempekat iya enggau Simon dikinsil magang, lalu iya bemunsuh enggau Simon.

²⁸Raja Antiokus ngirumka Atenobius, siku ari pemesai ti dikarapka iya, ngambika berunding enggau Simon lalu ngenataika pesan tu: “Nuan nguasa nengeri Jopa, Geser enggau kuta di Jerusalem ti dipegai perintah kami.

²⁹Nuan udah ngerusak semua bagi menua lalu mai penusah ngagai menua nya. Nuan ngerebut kuasa ba mayuh endur ti dipegai perintah kami.

³⁰Diatu serah ngagai kami semua nengeri ti direbut nuan, lalu pia mega serahka semua duit chukai ti digumpul nuan ari semua endur di luar bagi menua Judea ti dikuasa nuan.

³¹Enti nuan enda nitihka utai ku kami, nuan mesti mayar ngagai kami 17,000 kilogram pirak, ditambahka enggau 17,000 kilogram da pirak kena nganti chukai semua nengeri nya enggau kena nganti semua pengerusak laban nuan. Enti nuan enggai, kami deka nyerang nuan.”

³²Lebuh Atenobius datai di Jerusalem, iya meda pengaya istana Simon, endur makai ti bisi semua pekakas digaga ari mas enggau pirak enggau mayuh barang bukai. Nya alai, Atenobius nyau temati kutu. Iya lalu ngenataika pesan raja ngagai Simon.

³³Ku Simon nyaut, “Ukai tanah bansa bukai ti direbut kami, lalu ukai utai orang bukai ti diambi kami. Kami semina ngambi pesaka aki ini kami ti ngelama tu dikuasa munsuh kami ngena jalai ti enda beradat.

³⁴Kami ngena peluang tu semina ngambi pulai baru pesaka aki ini kami.

³⁵Pasal nengeri Jopa enggau Geser ti dipinta nuan, kami sanggup mayar 3,000 kilogram pirak taja orang ke diau ba semua nengeri nya udah ngerugi menua enggau bansa kami.” Atenobius enda bemunyi.

³⁶Enggau ati ti pedis Atenobius pulai ngagai raja. Iya ngenataika saut Simon sereta nusi pengaya Simon enggau semua utai ti dipeda iya. Lebuh raja ninga berita nya, iya ringat amat.

³⁷Benung nya Trifon ngena kapal rari ke Ortosia.

³⁸Raja Antiokus ngasuh Kendebeus nyadi tuai perang besai pelilih menua sebelah tebing tasik, lalu meri iya raban soldadu ke bejalai kaki enggau raban soldadu ke nepan kuda.

³⁹Kendebeus diasuh belangkau ba entara menua Judea, lalu ngaduka baru nengeri Kidron sereta negapka semua pintu penama besai ngambika raja ulih nyerang bansa Judah. Benung nya raja empu majak ngagai Trifon.

⁴⁰Kendebeus mansang ngagai nengeri Jamnia lalu belabuh ngachau orang Judah lebuh iya tama ngagai bagi menua Judea, nangkap orang ke diau dia sereta munuh sida.

⁴¹Nengeri Kidron digaga Kendebeus baru, lalu dia diengkah iya raban soldadu ke nepan kuda enggau raban soldadu ke bejalai kaki. Ngena jalai nya, sida ulih nyerang semua jalai di Judea baka ti diasuh raja.