Read Iban 1 Makabi 2 Bible Online

1 Makabi 2 - Iban bible

1 Makabi 2

¹Maya nya bisi siku imam ari bilik Jehoiarib benama Matatias anak John, uchu Simeon pindah ari Jerusalem lalu diau di nengeri Modein.

²Matatias bisi lima iku anak; John ti dikumbai Gaddi,

³Simon ti dikumbai Thassi,

⁴Judas ti dikumbai Makabi

⁵Eleasar ti dikumbai Avaran enggau Jonathan ti dikumbai Apphus.

⁶Lebuh Matatias meda semua pengamah di Judea enggau di Jerusalem,

⁷iya lalu bejaku, “Naka meh penusah aku tu! Nama kebuah aku diadaka meda bansa aku enggau nengeri kudus tu dirusak? Kati aku patut diau aja meda nengeri tu diserah ngagai munsuh lalu Rumah Sembiang dikuasa bansa bukai?

⁸Rumah Sembiang baka mensia ke nadai basa;

⁹perengka iya ti manah-manah udah ambis diambi orang. Bala anak kitai dibunuh ba sebelah jalai, bala sida ke bujang udah dibunuh munsuh ngena pedang.

¹⁰Pemanah nama Jerusalem nadai agi lalu reta iya udah diambi semua bansa;

¹¹Semua utai kena ngelagu iya udah diambi; iya enda agi ngatika diri lalu nyadi ulun.

¹²Peda endur kudus; semua utai ti manah sereta besai reti ba kitai udah kamah lalu dirusak bansa bukai.

¹³Nya alai, nama guna kitai idup?”

¹⁴Matatias enggau bala anak iya nyarikka gari diri laban tusah ati, lalu ngena gari guni tanda ngulit.

¹⁵Bala pemesai raja ke diasuh iya mejal orang Judah ninggalka Allah Taala mansang ke Modein laban deka meri piring ngagai bala engkeramba.

¹⁶Mayuh orang Israel datai betemu enggau sida. Matatias enggau bala anak iya mega enggau orang begempuru dia.

¹⁷Bala pemesai raja bejaku enggau Matatias, “Nuan tu siku tuai ke besai nama sereta pemadu dipebasa ba nengeri tu. Nuan disukung bala anak enggau kaban belayan nuan.

¹⁸Manah amat enti nuan nyadi orang keterubah ngereja utai ti diasuh raja. Semua bansa bukai, orang ke diau di Judea enggau semua orang ke agi tinggal di Jerusalem udah ngereja utai ti diasuh raja. Enti nuan nitihka jaku raja, nuan enggau bala anak nuan deka dikumbai ‘Pangan Raja’. Nuan deka diberi mas, pirak enggau mayuh pemeri bukai kena bebasaka nuan.”

¹⁹Matatias nyaut enggau nyawa ti inggar, “Awakka semua bansa dalam perintah tu ngasika raja. Awakka sida ngelekaka pengarap aki ini sida.

²⁰Aku, bala anak aku enggau kaban belayan aku tetap talukka sempekat ti digaga Allah Taala enggau aki ini kami.

²¹Ari tulung Allah Taala, kami tetap bepegai ba Adat enggau semua pengasuh iya.

²²Kami enggai ngasika jaku raja, lalu mimit pen kami enggai limpang ari chara kami besembiang.”

²³Baru tembu iya bejaku, dia siku orang Judah ari Modein mansang ke mua orang mayuh lalu meri piring ba atas alta nitihka pinta raja.

²⁴Lebuh Mattahtias meda orang nya, iya ringat amat. Pengeringat iya balat amat nyentukka tubuh iya nyau gegetar. Iya mansang lalu munuh orang nya ba semak alta.

²⁵Iya mega munuh pemesai raja ke mejal orang meri piring sereta ngerubuh alta ti endur meri piring ngagai engkeramba.

²⁶ Ngena jalai nya, Matatias nunjukka pengeransing ati iya ngetanka Adat Tuhan, baka ti dikereja Pinehas lebuh iya munuh Simri anak Salu.

²⁷Udah nya Matatias bejalai ngelingi nengeri nya lalu bejaku, “Barang sapa talukka sempekat Allah Taala lalu deka ngasika Adat Iya, titihka aku!”

²⁸Sida menyanak pen lalu ninggalka semua utai sida di nengeri nya lalu ngerarika diri ngagai bukit.

²⁹Maya nya, mayuh orang Israel agi deka bekaul enggau Allah Taala lalu ngasika Adat Iya. Sida rari ngagai padang pasir mai bini anak enggau jelu tupi sida ngambika enda balat diperinsa.

³⁰

³¹Enda lama udah nya, bala pemesai raja enggau seraban soldadu ke ba kuta Jerusalem nerima berita pasal sekeda orang ke enggai nitihka jaku raja lalu belalai di menua puang.

³² Seraban soldadu ti mayuh ngagai sida lalu tetemuka sida. Bala soldadu nya belangkau betentang enggau orang Judah lalu deka nyerang sida kena Hari Sabat.

³³Sida lalu ngangauka orang Judah enggau nyawa ti inggar, “Pansut diatu! Titihka jaku raja ngambika kita selamat!”

³⁴Orang Judah nyaut, “Enggai! Kami enggai pansut. Enggai kami nitihka jaku raja. Kami enggai ngelaban Hari Sabat!”

³⁵Tekala nya bala soldadu lalu nyerang sida,

³⁶tang orang Judah nadai ngelaban mimit. Sida enda nikau munsuh ngena batu. Sida mega enda ngempang jalai ti nuju endur sida belalai.

³⁷Ku sida, “Semua kami deka parai enggau ati ti beresi. Awakka langit enggau tanah nyadi saksi, kita enda patut sekali munuh kami.”

³⁸Munsuh lalu nyerang sida kena Hari Sabat. Kurang lebih seribu iku sida parai, nyengkaum orang laki, indu, bala anak enggau jelu tupi sida.

³⁹Lebuh Matatias enggau bala kaban iya ninga berita nya, sida tusah amat ati

⁴⁰lalu bejaku enggau diri sama diri, “Enti semua kitai baka sida nya, enggai ngelaban orang bansa bukai, kena ngetanka nyawa enggau pengarap kitai, tentu enda lama da kitai mega abis lengis ari dunya tu.”

⁴¹Sehari nya sida mutus ati deka ngelaban enti sida diserang kena Hari Sabat ngambika sida enda parai magang baka bala sida ke abis dibunuh ba endur sida belalai.

⁴²Udah nya Matatias enggau bala nembiak iya setanah enggau seraban orang Judah ke talukka Tuhan ke dikumbai Hasida. Sida tu pemadu kering sereta pamadu berani di Israel. Sida sanggup parai ketegal Adat.

⁴³Kelimpah ari nya, semua orang ke ngerarika diri ari diperinsa bela enggau sida ngeringka raban sida.

⁴⁴Matatias lalu ngaga siti raban soldadu, lalu enggau ati kudi sida nyerang orang Judah ke bedosa ngelaban Adat. Sida ke lepas, ngerarika diri ngagai bansa bukai ngambika selamat.

⁴⁵Matatias enggau bala kaban iya bejalai ngagai serata menua nya lalu ngerubuh semua alta engkeramba ti digaga bansa bukai.

⁴⁶Semua anak lelaki ba menua Israel ke ditemu sida empai ditutus, dipejal sida betutus.

⁴⁷Sida mega mujur muru bala pemesai bansa bukai ke dipeda sumbung amat.

⁴⁸Sida nyelamatka Adat Moses ari bansa bukai enggau raja sida. Sida mega ngemadamka kuasa Raja Antiokus.

⁴⁹Lebuh Matatias nyau deka parai, iya bejaku ngagai bala anak iya, “Tu maya ti penuh penyarut enggau bebunuh. Orang ke sumbung megai kuasa ketawaka kitai.

⁵⁰Tang kita, bala anak aku, mesti ngasika adat lalu sanggup parai ngetanka sempekat Allah Taala enggau aki ini kitai.

⁵¹Kingatka utai ti udah dikereja aki ini kitai kelia. Titihka teladan sida ngambika kita mega deka bulih basa ti besai lalu nama kita deka dikingatka selama-lama iya.

⁵²Ingat meh baka ni Abraham talukka Allah Taala lebuh iya diuji. Tuhan gaga meda iya lalu nerima iya.

⁵³Baka nya mega Joseph ngasika pengasuh Allah Taala lebuh iya dalam penusah. Udah nya iya nyadi pemesai di Ejip.

⁵⁴Pinehas, aki ini kitai ransing ati amat ke Tuhan, nya alai Tuhan besemaya ngasuh peturun iya nyadi imam ke selama-lama iya.

⁵⁵Josua nyadi tuai di Israel laban iya ngasika pengasuh Moses.

⁵⁶Kaleb mai berita manah ngagai nembiak Allah Taala, nya alai, iya ngempu tanah pesaka.

⁵⁷David tetap taluk, nya alai Allah Taala besemaya ngasuh peturun iya nyadi raja merintah ari rebak siti ngagai rebak siti.

⁵⁸Elijah dibai ke serega laban pengeransing ati iya ngetanka Adat.

⁵⁹Hananiah, Asariah enggau Misael diselamatka ari api ti mau ketegal pengarap sida.

⁶⁰Daniel diselamatka ari mulut singa laban iya manah ati.

⁶¹Kita enda tau enda beteladanka aki ini kitai, nya baru kita deka meda orang ke arapka Tuhan enda lemi.

⁶²Anang takutka emba orang jai laban pengaya sida deka abis lalu bangkai sida deka but dempa ulat.

⁶³Sehari tu sida deka bulih basa besai tang pagila sida lenyau. Tubuh sida deka pulai nyadi tanah, lalu semua utai ti diatur sida nadai pengujung.

⁶⁴Anak aku, kita enda tau enda kering sereta gagah ngetanka Adat, laban semina nengah Adat kita tau bulih basa ti besai.

⁶⁵Menyadi kita, Simeon, orang ke badas. Dingaka iya belama baka kita ke ningaka aku apai kita.

⁶⁶Judas Makabi gagah sereta berani kenyau ari biak. Iya deka nyadi tuai perang kita lalu nguluka kita beperang ngelaban munsuh.

⁶⁷Gempuruka semua orang ke ngasika Adat Allah Taala ngambika setanah enggau kita. Mansang meh kita malas penyai ti udah dikereja orang ba bansa kitai.

⁶⁸Ukum meh semua bansa bukai ketegal penyai pengawa sida. Kita enda tau enda ngasika Adat.”

⁶⁹Udah iya merekat bala anak iya, Matatias lalu ngapuska seput.

⁷⁰Iya dikuburka ba pendam sida sebilik di Modein. Semua bansa Israel nyabak lalu ngulitka pemarai iya. Utai tu nyadi dalam taun 146.