Read Iban 1 Makabi 3 Bible Online

1 Makabi 3 - Iban bible

1 Makabi 3

¹Judas ke dikumbai Makabi nganti apai iya Matatias.

²Iya disukung bala menyadi iya, kaban belayan iya enggau semua orang ke nitihka apai iya. Enggau ati ti ransing sida nampung perang bansa Israel.

³Judas nambahka pemenang bansa iya: iya ngena baju besi baka siku orang ke besai, tinggi sereta kering. Iya ngena perengka perang lalu nyaga palan ngena pedang.

⁴Iya nyerang baka singa negung ngiga orang ti deka dempa.

⁵Orang ngelaban adat digagai iya, semua orang ke ngenyakka bansa iya ditunu iya magang.

⁶Semua orang ke jai nadai daya belalai laban takutka iya. Baka nya meh iya mujur ngelepaska bansa iya.

⁷Iya ngasuh mayuh raja pedis ati, tang bansa Israel diasuh iya gaga. Endang patut iya dikingat lalu dipuji ke selama-lama iya ketegal utai ti udah digaga iya.

⁸Iya bejalai ngagai semua nengeri di Judea lalu munaska semua orang jai sereta ngelepaska Israel ari pemerinsa ti balat.

⁹Nama iya tebilang nyentukka pengujung dunya, laban iya ngempuruka orang ke nyau deka kena bunuh.

¹⁰Udah nya Apollonius ngaga siti raban soldadu. Sida nya orang bansa bukai setanah enggau orang Samaria kena nyerang bansa Israel.

¹¹Lebuh Judas ninga nya, iya lalu mansang beperang, lalu ngalahka Apollonius sereta munuh iya. Mayuh munsuh parai, lalu sekeda ngerarika diri.

¹²Barang sida dirampas. Judas ngambi pedang Apollonius lalu ngena iya seumur idup.

¹³Seron, tuai perang soldadu menua Siria ninga Judas bisi siti raban soldadu ti besai ke bisi seraban orang ke taluk amat ke Judas ke sanggup beperang enti iya nguluka sida.

¹⁴Ku Seron, “Nama aku deka tebilang ba seluruh perintah tu enti aku beperang ngelaban Judas enggau bala nembiak iya ke enggai nitihka jaku raja.”

¹⁵Seron lalu mansang. Iya ditulung olih siti raban besai orang jai ke deka bebalas ngagai bansa Israel.

¹⁶Lebuh iya datai ba genting Bet-Horon, Judas enggau raban iya ti enda mayuh, mansang nyatup Seron.

¹⁷Lebuh sida meda raban soldadu Seron datai, sida lalu bejaku enggau Judas, “Baka ni raban kitai ti ngemimit tu ulih beperang ngelaban soldadu ti mayuh sereta kuat baka nya! Tambah mega kitai tu lelak, lalu empai makai sehari-hari tu!”

¹⁸Ku Judas nyaut, “Enda tusah raban ti mit ngalahka raban ti besai. Ba Tuhan nadai bida nyelamatka ngena mayuh orang tauka mimit aja.

¹⁹Ba perang raban ke menang ukai mesti raban ke mayuh orang. Kuasa Tuhan ti nentuka sapa patut menang tauka alah.

²⁰Raban orang ke datai ngelaban kitai sumbung sereta jai amat. Sida deka ngerampas semua utai kitai lalu munuh kitai, anak enggau bini kitai.

²¹Tang kitai ngelaban ketegal nyawa enggau pengarap kitai.

²²Tuhan empu deka munuh munsuh ba mua kitai. Nya alai, anang takutka sida!”

²³Udah sida bejaku munyi nya, Judas enggau bala iya ngenyit nyerang Seron enggau raban soldadu iya, lalu munuh sida.

²⁴Sida ngagai munsuh ba jalai ti nurun ari Bet-Horon sampaika ngagai emperan. Sida munuh kurang lebih 800 iku orang lalu sekeda ngerarika diri ngagai Pilistia.

²⁵Kenyau ari nya, semua bansa ke ngelingi endur nya takutka Judas enggau bala menyadi iya.

²⁶Semua bansa berandauka perang ti diatur Judas. Berita nya mega didinga Raja Antiokus.

²⁷Lebuh Raja Antiokus ninga utai ti udah nyadi, iya ringat amat. Iya minta semua soldadu ba perintah iya begulai nyadi siti raban soldadu ti kering amat.

²⁸Bala soldadu diberi iya setaun gaji ngena duit perintah. Sida diasuh iya besedia nyatup sebarang utai ti deka nyadi.

²⁹Tang udah nya iya nemu duit perintah nyau enda chukup. Chukai ti digumpul ari sitak menua siti-siti nyau kurang ketegal pengachau enggau penyarut ti dipunka iya empu lebuh iya deka ngemadamka adat ti endang udah bisi kenyau ari suba.

³⁰Raja Antiokus selalu gerah jari meri pemeri. Iya lebih gerah jari ari raja bukai ke dulu ari iya. Tang diatu iya irauka duit enda chukup kena meri pemeri. Duit iya enda chukup indah kena mayar utai ti dibayar ngelamatu. Hal nya kala nyadi sekali dua suba.

³¹Raja tusah amat ati, lalu mutus ati bejalai ngagai menua Persia ngumpul chukai ari semua sitak menua nya, lalu mai mayuh duit pulai.

³²Lisias, siku orang ke tebilang peturun raja, dituduh nyadi gabenor megai perintah ari Sungai Efratis nyentukka entara menua enggau Ejip.

³³Lisias mega diasuh nyadi pengibun anak Antiokus ti kelima datai ngagai maya raja pulai baru.

³⁴Kelimpah ari nya, semua gajah enggau setengah ari bala soldadu perintah diserah ngagai Lisias. Iya mega dipadah pasal semua utai ti deka dikereja raja lebih agi pasal orang ke diau di Judea enggau di Jerusalem.

³⁵Lisias dipinta ngirumka seraban soldadu kena ngelaban orang Judah, kelebih agi, sida ke agi diau di Jerusalem. Bala soldadu diasuh ngelemika pengering orang Judah sereta munuh sida abis lengis ngambika sida badu dikingatka agi.

³⁶Iya diasuh ngambi tanah sida lalu meri tanah nya ngagai orang bansa bukai ke pindah ngagai serata menua nya.

³⁷Raja enggau raban soldadu iya ti bukai angkat ari Antiohia, indu nengeri iya empu dalam taun 147.[5] Iya ngelayang Sungai Efratis lalu mansang ngagai tanah rata ba bukit di Persia.

³⁸Udah nya Lisias milih tiga iku tuai ke tebilang ari bala pangan raja empu nguluka raban soldadu. Sida tu Nikanor, Gorgias enggau Ptolemius anak Doriminus.

³⁹Sida dikirum begulai enggau 40,000 iku raban soldadu ke bejalai kaki enggau 7,000 iku raban soldadu ke ngena kuda mansang nyerang lalu ngerusak menua Judea nitihka asuh raja.

⁴⁰Sida pen lalu angkat enggau bala soldadu. Lebuh sida datai ba emperan semak Emaus, sida lalu belangkau dia.

⁴¹Raban soldadu ari Siria[6] enggau Pilitia begulai enggau sida. Orang ke bedagang ari endur nya ninga pengering bala soldadu, mansang ngagai palan nya. Sida mai mayuh duit enggau rantai ngadang diri meli orang Israel ke ulun sida.

⁴²Judas enggau bala menyadi iya nemu penusah ti besai- sebesai deka nuntung sida laban mayuh raban soldadu bansa bukai bepalan ba sitak menua sida. Sida mega ninga raja udah ngasuh ngerusak bansa sida sampai abis lengis.

⁴³Tang ku sida bejaku enggau diri sama diri, “Aram kitai niri negika baru bansa kitai ari pengerusak lalu angkat ngelaban ngetanka menua enggau Rumah Sembiang!”

⁴⁴Nya alai, bansa sida lalu begempuru nyediaka diri beperang lalu besembiang minta pengasih ari Allah Taala.

⁴⁵Jerusalem baka padang pasir nadai orang diau dia; Nadai peranak menua nya tama tauka pansut ari nengeri nya. Bansa bukai ngamahka Rumah Sembiang, diau ba kuta nengeri nya lalu ngaga endur nya alai orang bansa bukai diau bemalam. Pengaga nadai agi di Israel; munyi muziek nadai didinga agi.

⁴⁶Udah nya Judas enggau bala iya begempuru lalu mansang ngagai nengeri Mispah ti betentang enggau Jerusalem, laban suba orang Israel bisi endur besembiang di Mispah.

⁴⁷Sepemanjai hari nya sida bepuasa. Sida ngena gari guni tanda ngulit. Sida naburka abus ba pala lalu nyarikka gari diri tanda tusah ati.

⁴⁸Ba maya ti baka nya, bansa bukai deka minta iring ari engkeramba sida, tang orang Israel muka bup Adat ngambika bulih iring ari Allah Taala.

⁴⁹Sida mai baju imam, nyuaka asil keterubah ari tanah sida, lalu mega nyuaka sepuluh peratus ari utai kemisi sida. Sida mega mai orang Nasir ke udah nembuka sumpah sida.

⁵⁰Semua orang ke arap enggau nyawa ti inggar besembiang baka tu, “O Tuhan, nama patut digaga kami enggau semua utai tu? Kini kami patut mai utai tu?

⁵¹Rumah Nuan ti tuchi udah dilunjak lalu kamah. Bala imam nuan ngulit enggau ati baruh.

⁵²Orang bansa bukai beserakup nyerang lalu ngerusak kami. Nuan nemu utai ti diatur sida kena ngelaban kami.

⁵³Enti Nuan enda nulung kami, dini kami tan laban sida?”

⁵⁴Sida nyepu terumpit lalu manjung enggau inggar.

⁵⁵Udah nya, Judas lalu milih orang ke patut nyadi tuai ba siti-siti raban soldadu. Siti-siti raban bisi seribu iku, seratus iku, lima puluh iku enggau sepuluh iku orang.

⁵⁶ Nitihka Adat, Judas ngasuh semua orang ke ngaga rumah, tauka sida ke betanam ba kebun anggur tauka sida ke baru udah jadi belaki-bebini enggau semua orang ke takut, pulai magang.

⁵⁷Ujung iya, raban soldadu sida lalu mansang. Sida ngambi endur tunga ba selatan nengeri Emaus.

⁵⁸Ku Judas bejaku enggau sida, “Besedia meh. Kita enda tau enda gagah sereta berani! Pagi pagila kitai deka betempuh ngelaban orang bansa bukai ke begulai deka nyerang lalu ngerusak kitai enggau Rumah Sembiang.

⁵⁹Manah agi mati beperang ari ti meda bansa kitai merinsa lalu Rumah Sembiang dirusak.

⁶⁰Tang awakka utai nyadi nundaka peneka Tuhan nyadi.”