Read Iban 1 Makabi 4 Bible Online

1 Makabi 4 - Iban bible

1 Makabi 4

¹Gorgias enggau 5,000 iku soldadu ke bejalai kaki enggau 1,000 iku raban soldadu ke bekuda, ke udah teleba amat beperang, ngejangka palan sida lebuh malam hari

²laban deka ngenyit nyerang palan bansa Judah. Sida dianjung olih sekeda orang ari kuta di Jerusalem ke nunjukka sida jalai.

³Tang Judas ninga nya, lalu mai sida seraban angkat lalu nyerang bala soldadu raja di Emaus,

⁴benung Gorgias enggau raban soldadu iya agi pambar di luar palan.

⁵Malam nya Gorgias enggau bala soldadu iya datai ba palan sida Judas, tang siku pen nadai orang ditemu sida dia. Sida nyangka Judas enggau bala nembiak iya udah ngerarika diri. Nya alai, raban soldadu Gorgias lalu ngiga sida di bukit.

⁶Lebuh baru kerebak tawas, Judas enggau 3,000 iku orang ayan ba emperan. Senyata sida enda baka ti dikedeka sida laban enda chukup.

⁷Sida meda palan orang bansa bukai kuat amat, kuta sida dikelinggi raban soldadu bekuda ke bepenemu amat pasal pengawa perang.

⁸Tang Judas bejaku enggau bala nembiak iya, “Anang irauka pemesai raban soldadu sida. Anang takut enti sida nyerang kitai.

⁹Ingat meh baka ni bala aki ini kitai diselamatka Tuhan di Tasik Mirah lebuh sida digagai raja Ejip enggau bala soldadu iya.

¹⁰Aram kitai ngangauka Tuhan ngambika Iya kasihka kitai. Arapka Tuhan ingatka semua sempekat Iya enggau aki ini kitai lalu munuh raban soldadu ke besatup enggau kitai sehari tu.

¹¹Nya baru bansa bukai nemu Israel bisi Allah Taala ti ngelepas sereta ngidupka nembiak Iya.”

¹²Lebuh semua orang bansa bukai meda Judas enggau nembiak iya datai beperang,

¹³sida pansut ari palan sida laban deka betempuh. Judas enggau bala nembiak iya nyepu terumpit lalu

¹⁴belabuh beperang. Raban bansa bukai digasakka sida amat lalu ngerarika diri ke emperan,

¹⁵tang sida ke bejalai dibelakang dibunuh magang. Orang Israel ngagai munsuh naka Geser, emperan menua Idumea, enggau mayuh nengeri di Asdot enggau Jamnia. Kurang lebih 3,000 iku munsuh parai dibunuh sida.

¹⁶Lebuh Judas enggau bala iya pulai ari ngagai munsuh,

¹⁷iya bejaku enggau bala nembiak iya, “Anang amu ngambi perepasan. Gorgias enggau raban iya agi bisi ba sebelah bukit tu. Kitai deka betempuh baru. Kitai enda tau enda liat ati ngelaban sida. Udah nya, baru kita tau peneka ati ngambi perapasan.”

¹⁸

¹⁹Baru tembu Judas bejaku, sebagi ari bala munsuh dipeda ayan ba bukit.

²⁰Bala munsuh meda soldadu sida udah rari. Ari asap ti dipeda rembun-rembun, sida nemu palan sida udah ditunu.

²¹Lebuh sida meda semua utai nya, sida takut amat. Lebuh sida meda raban soldadu Judas ba emperan udah besedia deka betempuh,

²²semua sida ngerarika diri ke Pilistia.

²³Judas nikali ngagai palan munsuh ngambi mayuh mas enggau pirak, kain biru enggau mirah ungu, enggau mayuh reta bukai.

²⁴Udah nya orang Judah mulaika diri ngagai palan sida empu lalu nanyi lagu puji tu, “Puji meh Tuhan laban Iya manah. Pengasih Iya meruan belama.”

²⁵Sehari nya bansa Israel menang amat.

²⁶Semua bansa bukai ke ulih ngidupka diri nusi ngagai Lisias pasal semua utai ti udah nyadi.

²⁷Lebuh iya ninga semua utai nya, Lisias tekenyit lalu nadai ati agi laban utai ti diatur iya ba Israel enda mujur, lalu utai ti diasuh raja enda ulih dikereja iya.

²⁸Dalam taun nangkanka nya, 60,000 iku raban soldadu ke bejalai kaki ke pemadu manah, enggau 5,000 iku raban soldadu ke bekuda diasuh Lisias nyerang orang Judah.

²⁹Sida tama ngagai Idumea lalu belangkau semak nengeri Bet-Sur. Judas mai 10,000 iku orang mansang betemu enggau sida.

³⁰ Lebuh Judas meda soldadu munsuh kering amat, iya lalu besembiang, “Pujika Nuan Tuhan ke nyelamatka Israel. Ngena jari nembiak Nuan David, Nuan ngemaduka serang siku orang ke kering sereta gagah. Semua soldadu bansa Pilistin diserahka Nuan ngagai Jonathan anak Saul enggau orang ke mai senyata iya.

³¹Awakka baka nya mega, Nuan nyerahka raban soldadu munsuh ngagai jari nembiak Nuan, Israel. Asuh sida malu ketegal ngarapka raban soldadu sida ke nepan kuda.

³²Asuh sida takut sereta lemi ngambika sida alah lalu gegetar.

³³Alahka sida ngena pedang orang ke rinduka Nuan ngambika Nuan dipuji semua orang ke ngaku Nuan Tuhan.”

³⁴Sida pen belabuh beperang, nyatup siku sama siku. Kurang lebih 5,000 iku orang ari raban soldadu Lisias dibunuh.

³⁵Lisias meda raban soldadu iya ngerarika diri. Tang Judas enggau bala iya majak mansang enggau ati ti pemadu berani, lalu sanggup parai baka bujang berani. Nya alai, Lisias lalu nyurutka diri, lalu mansang ke Antiok. Din iya ngupah orang bansa bukai ngambika ulih ngagai Judea enggau siti raban soldadu ke besai agi.

³⁶Judas enggau bala menyadi iya bejaku, “Munsuh kitai udah alah. Aram kitai ngagai Jerusalem meresi Rumah Sembiang lalu ngasuh iya kudus baru.”

³⁷Nya alai, semua bala soldadu sama bela mansang ngagai Bukit Sion.

³⁸Sida meda Rumah Sembiang nadai orang. Alta kamah, lalu pintu besai penama udah ditunu. Tengah laman iya nyau repa laban babas baka kampung tauka bukit. Semua bilik bala imam udah dirubuh.

³⁹Sida lalu nyarikka gari diri laban tusah ati, nyabak enggau nyawa ti inggar, lalu naburka abus ba atas pala.

⁴⁰Sida ningkap ba tanah, lalu lebuh sida ninga munyi terumpit, semua sida ngangauka Tuhan.

⁴¹Udah nya Judas ngasuh bala soldadu iya nyerang orang ke bisi dalam kuta, lalu benung nya, iya meresi Rumah Sembiang.

⁴²Iya milih bala imam ke patut agi tau nampung pengawa sida ketegal sida talukka Adat.

⁴³Sida meresi Rumah Sembiang. Semua batu ti udah kamah diambi sida lalu diengkah ba endur ti kamah.

⁴⁴Sida berunding baka ni enggau alta ti udah kamah. Alta nya endur meri piring kena ngenyenangka ati Tuhan.[7]

⁴⁵Sida tulihka penemu deka ngerubuh alta nya ngambika sida enda dikeleseka orang ketegal iya laban alta nya udah enda kamah laban bansa bukai. Alta nya lalu dirubuh sida,

⁴⁶lalu semua batu iya diengkah sida ba endur ti manah ba bukit Rumah Sembiang. Benung nya, sida nganti siku nabi ke deka meri pemutus pasal semua batu nya.

⁴⁷ Nitihka Adat Moses, sida ngambi semua batu ti enda dipat, lalu nirika siti alta ti baru baka iya ti lama.

⁴⁸Udah nya Rumah Sembiang diaduka baru, lalu dalam iya enggau di tengah laman diberekat baru.

⁴⁹Sida ngaga perengka baru kena besembiang. Kaki kelita, alta endur nunu menyan enggau mija endur engkah roti ti dibai tama ke dalam Rumah Sembiang.

⁵⁰Udah nya menyan ditunu ba atas alta, lalu semua kelita ti diengkah ba kaki kelita ditungkun magang ngasuh Rumah Sembiang tampak bebendang.

⁵¹Roti ti kudus diengkah sida ba atas mija, tirai lalu digantung. Enggau nya, tembu meh pengawa sida dia.

⁵² Dua puluh lima haribulan Kislew, iya nya, bulan kesembilan, taun 148,[8] nya hari ulang taun kena ngingatka alta dikamahka bansa bukai. Sehari nya mega, piring nundaka Adat Moses diberi ba atas alta ti baru. Sida merekat alta ti baru, lalu nanyi mayuh lagu diring gambus, belikan enggau gong.

⁵³

⁵⁴

⁵⁵Semua rayat nyerugang nyembah sereta muji Tuhan ke udah ngasuh sida menang.

⁵⁶Pengelama lapan hari sida ngerami pengawa merekat alta. Enggau ati ti gaga sida meri piring kena ngenyenangka ati Tuhan.

⁵⁷Mua Rumah Sembiang dilagu ngena mas enggau mayuh terabai. Semua pintu penama besai digaga baru. Semua bilik bala imam diaduka baru, lalu digagaka pintu.

⁵⁸Semua rayat gaga amat ketegal badu malu agi laban bansa bukai

⁵⁹Judas, bala menyadi iya enggau semua rayat netapka pengawa ti merekat alta nya mesti dintu enggau pengerami besai tiap taun pengelama lapan hari, belabuh ari dua puluh lima bulan Kislew.

⁶⁰Udah nya sida ngaga mayuh dinding ti tinggi enggau mayuh menara ti kuat ngelingi Bukit Sion ngambika orang bansa bukai enda ulih tama lalu ngamahka iya baru.

⁶¹Judas lalu ngasuh siti raban soldadu nyaga endur nya. Iya mega ngaga kuta ti kuat ba nengeri Bet-Sur ngambika orang Israel bisi kuta tunga ke Idumea.