Read Iban 1 Makabi 5 Bible Online

1 Makabi 5 - Iban bible

1 Makabi 5

¹Semua bansa ke berimbai enggau orang Judah ringat amat lebuh sida ninga orang Judah nirika alta sereta nguduska Rumah Sembiang baru.

²Sida mutuska runding deka munaska semua orang Judah ke diau begulai enggau sida. Nya alai, sida lalu belabuh munuh orang Judah.

³Judas lalu merang peturun Esau di Idumea semak Akrabatena laban sida majak ngagai orang Israel. Iya ngalahka sida lalu ngerampas reta tengkira sida.

⁴Judas mega ingatka penyai raban bansa Baian ke selalu ngenakutka bansa Israel laban sida selalu ngipa orang Israel di sebelah jalai.

⁵Orang Baian dikurung iya dalam kuta sida. Iya ngagai sida lalu besumpah deka munuh sida. Semua kuta enggau semua orang dalam nya di tunu iya.

⁶Udah nya Judas mansang nyerang orang Amon. Dia iya besatup enggau raban soldadu ti besai sereta kering betuaika Timoti.

⁷Judas suah betempuh enggau sida sampaika sida alah.

⁸Iya ngerebut nengeri Jaser enggau semua genturung pendiau ti semak nya, lalu udah nya pulai ke Judea.

⁹Orang bansa bukai ke diau di Gilead setanah deka ngalahka orang Israel ke diau ba bagi menua sida. Tang orang Israel ngerarika diri ngagai kuta Datema,

¹⁰lalu ngirumka siti surat ti munyi tu ngagai Judas enggau bala menyadi iya, “Orang bansa bukai ke beserimbai pendiau enggau kami setanah betuaika Timoti. Kami udah ngerarika diri ngagai kuta Datema. Diatu sida besedia deka ngerebut kuta tu lalu munuh kami.

¹¹

¹²Mayuh ari bala kami udah dibunuh. Datai meh kitu ngelepaska kami.

¹³Semua orang laki bansa Judah ke diau di menua pegai Tob udah dibunuh. Bini enggau anak sida ditangkap, lalu reta tengkira sida mega dirampas. Kira seribu iku bala kami udah dibunuh dia.”

¹⁴Empai tembu surat nya dibacha, ngenyit datai sekeda orang mai berita ari Galili. Gari sida abis charik tanda tusah ati.

¹⁵Ku sida, “Raban soldadu ti besai bala orang Ptolemais, Tirus, Sidon enggau semua orang bansa bukai ke diau di Galili udah begempuru deka munuh kami.”

¹⁶Lebuh Judas enggau rayat ninga berita nya, sida lalu ngaga aum besai berunding ngiga jalai nulung kaban sida ke balat ditinggang penusah laban kena serang munsuh.

¹⁷Ku Judas bejaku enggau menyadi tuai iya benama Simon, “Pilih seraban orang lalu kin meh kita ngelepaska bala menyadi kitai di Galili. Aku enggau menyadi kitai, Jonathan deka ke Gilead.”

¹⁸Judas ninggalka sekeda raban soldadu iya nyaga Judea. Asariah enggau Joseph anak Sekariah diasuh iya nyadi tuai rayat dia.

¹⁹Ku Judas bejaku enggau seduai nya, “Seduai diasuh aku nyadi tuai rayat ditu. Anang mansang beperang ngelaban orang bansa bukai sebedau kami pulai.”

²⁰Tiga ribu iku soldadu diserah ngagai Simon dibai iya ke Galili. Lapan ribu iku diserah ngagai Judas dibai ke Gilead.

²¹Udah nya Simon mansang ngagai Galili, lalu suah amat iya betempuh ngelaban orang bansa bukai. Iya ngalahka sida,

²²lalu ngagai sida sampaika datai ba nengeri Ptolemais. Kurang lebih 3,000 iku soldadu munsuh dibunuh lalu dirumpak.

²³Orang Judah enggau bini enggau anak sida ke diau di Galili enggau di Arbata dibai Simon pulai ke Judea enggau naka pengaga. Reta tengkira sida mega dibai magang.

²⁴Maya nya, Judas Makabi enggau menyadi iya, Jonathan udah ngelayang Sungai Jordan lalu bejalai pengelama tiga hari nengah menua puang.

²⁵Sida betemu enggau orang Nabatai ke nerima sida enggau manah. Raban orang nya nusi semua utai ti udah nyadi ninggang orang Judah di Gilead.

²⁶Sida nusi mayuh orang Judah dijel ba nengeri Bosrah, Bosor, Alema, Chaspho, Maked, enggau Karnaim. Semua nya nengeri besai ti bisi kuta magang.

²⁷Bisi mega sekeda dijel ba mayuh nengeri bukai di Gilead. Sida mega nusi munsuh deka nyerang mayuh kuta orang Judah pagila, lalu andalka diri ulih munuh semua orang Judah dalam sehari.

²⁸Ketegal nya, Judas enggau raban soldadu iya jampat nguing lalu bejalai nengah menua puang nuju Bosrah. Nengeri nya dialahka sida, lalu tiap orang laki dibunuh. Reta tengkira dia diambi sida, lalu ditunu sida nengeri nya sampai retung.

²⁹Udah nya, sida angkat lalu bejalai semalam-malam nuju kuta Datema.

³⁰Baru kerebak tawas, Judas enggau nembiak iya meda raban soldadu ti besai amat nyerang kuta nya. Raban soldadu nya benung masang mayuh tangga, panggau asur enggau kayu penikau kena nyerang orang Judah dalam kuta.

³¹Lebuh Judas ninga orang chapuh, manjung enggau munyi terumpit ari nengeri nya, iya nemu orang udah belabuh betempuh.

³²Iya bejaku enggau bala nembiak iya, “Sehari tu kitai mesti betempuh ngarika kaban belayan kitai!”

³³Judas magi bala iya ngagai tiga iti raban lalu nyerang munsuh ari belakang. Benung sida mansang, sida nyepu terumpit lalu besembiang.

³⁴Lebuh raban soldadu ti betuaika Timoti meda Judas Makabi, sida ngerarika diri laban sida alah amat. Sehari nya kurang lebih 8,000 iku orang parai.

³⁵Udah nya Judas nguing laban deka nyerang nengeri Maafa. Nengeri nya dialahka iya, lalu semua orang lelaki dia dibunuh iya. Nengeri nya ditunu sampai retung, lalu reta tengkira iya dirampas.

³⁶Angkat ari nya iya lalu ngerebut nengeri Kafso, Maked, Beser enggau nengeri bukai di Gilead.

³⁷Udah nya Timoti ngempuruka raban siti da, lalu belangkau betentang enggau nengeri Rafon ba seberai sungai.

³⁸Judas lalu ngasuh sekeda orang matau palan nya. Udah sida pulai, sida nusi ngagai iya, “Semua bansa bukai ke berimbai enggau kitai setanah enggau Timoti, lalu ngaga siti raban ti besai.

³⁹Orang Arab mega bisi diupah kena ngeringka raban sida. Sida belangkau ba seberai sungai, besedia deka nyerang kitai.” Ninga nya, Judas lalu mansang deka betempuh enggau sida.

⁴⁰Benung Judas enggau bala nembiak iya nyau semak sungai, Timoti bejaku enggau bala pemesai soldadu iya, “Enti iya ngelayang dulu, kitai tentu enda tan laban kitai sigi ulih dialahka iya.

⁴¹Tang enti iya takut lalu belangkau di seberai din, kitai ngelayang lalu ngalahka iya.”

⁴²Lebuh Judas datai ba sungai, iya ngasuh bala pemesai iya ba tebing sungai, lalu bejaku enggau sida, “Nadai siku tau ngetu. Semua kitai mesti mansang betempuh!”

⁴³Judas empu orang keterubah ngelayang ngelaban munsuh, lalu semua nembiak iya nitih ari belakang. Orang bansa bukai ba mua iya digasakka iya. Sida muai senyata diri, lalu rari ngagai rumah sembiang petara bukai di Karnain.

⁴⁴Tang Judas enggau bala nembiak iya ngerampas nengeri nya, lalu nunu rumah sembiang petara bukai enggau semua orang ke bisi dalam nya. Udah nengeri Karnain dirampas, semua bansa bukai enda ulih ngelaban Judas agi.

⁴⁵Udah nya Judas lalu ngempuruka semua orang Judah ke diau di Gilead laban deka nganjung sida ke Judea. Sida tu orang besai tuai, bini enggau anak enggau semua reta tengkira sida. Penyampau sida mayuh amat.

⁴⁶Sida datai di Efron, nengeri ti besai sereta tegap. Iya ba entara dua iti bukit. Nadai jalai ari kiba tauka kanan. Semina siti aja jalai, iya nya, nengah nengeri nya empu.

⁴⁷Tang orang dia enda ngasuh orang Judah nengah nengeri sida. Sida nutup pintu besai lalu nekal iya ngena batu.

⁴⁸Judas ngirumka pesan mai sida bekaban, ku iya, “Kami tu bejalai mulaika diri ngagai menua kami. Asuh meh kami nengah nengeri kita. Nadai siku orang deka ngachau kita; kami semina deka nengah nengeri kita aja.” Tang orang empu nengeri enggai muka pintu besai.

⁴⁹Judas lalu ngasuh tiap iku orang besedia ba endur diri empu.

⁵⁰Nya alai, bala soldadu lalu besedia. Sida nyerang nengeri nya lalu betempuh sehari semalam sampaika nengeri nya dirampas sida.

⁵¹Semua orang lelaki dia dibunuh, lalu nengeri nya dirata sebela enggau tanah, reta tengkira iya dirampas. Udah nya, Judas enggau rayat nengah nengeri nya bejalai atas bangkai sida ke udah parai.

⁵²Sida ngelayang Sungai Jordan nuju emperan ti besai betentang enggau Bet-Sean.

⁵³Sepemanjai jalai, Judas ngempuruka orang ke agi tinggal lalu meri peransang ngagai rayat nyentukka sida datai ba tanah Judea.

⁵⁴Enggau terima kasih sereta gaga sida niki ke Bukit Sion meri piring kena ngenyenangka ati Tuhan laban sida udah datai enggau likun, lalu nadai siku pen ari sida lenyau.

⁵⁵Benung Judas enggau Jonathan di Gilead, menyadi sida ke benama Simon di Galili semak nengeri Ptolemais.

⁵⁶Joseph enggau Asariah, dua iku tuai perang raban soldadu di Judea ninga rita pemerani Judas seduai Simon.

⁵⁷Ku seduai iya bejaku, “Aram kitai beperang ngelaban orang bansa bukai ke berimbai enggau kitai ngambika tua beberita.”

⁵⁸Nya alai, seduai lalu ngasuh bala nembiak seduai nyerang nengeri Jamnia.

⁵⁹Tang Gorgias enggau bala nembiak iya pansut ari nengeri nya laban deka betempuh enggau sida.

⁶⁰Joseph enggau Asariah alah lalu digagai sampai ke entara menua Judea. Sehari nya kurang lebih 2,000 iku orang Israel parai.

⁶¹Rayat alah balat amat laban tuai-tuai perang bansa Judah deka nyadi bujang berani lalu enggai nitihka jaku Judas enggau bala menyadi iya.

⁶²Kelimpah ari nya, sida ukai ari bilik orang ke udah dipilih Tuhan ngelepaska bansa Israel.

⁶³Semua orang Israel enggau semua orang bansa bukai bebasa amat ke Judas Makabi enggau bala menyadi iya. Orang ninga nama sida di sebarang endur,

⁶⁴lalu orang begempuru bebala mayuh muji sida.

⁶⁵Udah nya Judas enggau bala menyadi iya mansang deka nyerang orang Idumea di selatan. Iya nyerang nengeri Hebron enggau semua genturung pendiau ti semak nya. Mayuh kuta dirusak sida, mayuh menara ti tinggi ditunu.

⁶⁶Ari nya, sida majakka pejalai diri ngagai menua Pilistea nengah nengeri Marisa.

⁶⁷Sehari nya mayuh bala imam parai lebuh betempuh laban sida deka tebilang, lalu beli amat pansut enggau betempuh.

⁶⁸Udah nya Judas nguing ke nengeri Asdot ba menua Pilistea. Iya lalu ngerubuh semua alta enggau semua engkeramba sida. Udah iya ngerampas reta tengkira ba mayuh nengeri sida, iya pulai ke Judea.