Read Iban 1 Makabi 6 Bible Online

1 Makabi 6 - Iban bible

1 Makabi 6

¹Benung Raja Antiokus Keempat bejalai nengah emperan tinggi di Persia, iya ninga rita nengeri Elimias tebilang kaya mas enggau pirak.

²Kuil ba nengeri nya mega kaya laban dia endur nyimpan mayuh terabai mas, baju perang besi enggau senyata ti ditinggalka Alexander, anak Raja Philip, raja keterubah Masedonia.

³Nya alai, Raja Antiokus mansang ngagai nengeri nya laban deka ngerampas nengeri nya enggau semua reta tengkira iya. Tang iya enda mujur laban utai ti diatur iya ditemu orang ke empu menua.

⁴Sida ngelaban iya nyentukka iya rari, lalu pulai ke Babilon enggau ati ti lebu.

⁵Lebuh Raja Antiokus agi di Persia, siku seruan datai lalu nusi ngagai iya pasal semua raban soldadu ti dikirum iya ke Judea udah alah magang.

⁶Bisi berita mega madahka Lisias enggau raban soldadu iya ti kering udah ngerarika diri ari orang Judah ke majak kering-sekering laban sida ngambi senyata enggau semua perengka kena beperang ari raban soldadu ke dialahka sida.

⁷Orang Judah mega udah ngerubuh utai ti dikumbai sida “Pengerusak Ti Pemadu Balat” ti didirika Raja Antiokus ba atas alta di Jerusalem. Ngelingi Rumah Sembiang udah digagaka sida dinding ti tinggi baka suba. Nengeri Bet-Sur, siti ari nengeri raja, udah dirampas lalu digagaka sida kuta ti tegap.

⁸Lebuh raja ninga berita nya, iya tekenyit lalu tusah amat ati. Iya pedis amat ati laban semua utai diatur iya nadai nyadi.

⁹Lama amat raja enda dapat angkat laban tekelalu tusah ati. Nyau kelama udah nya, iya nemu diri deka parai.

¹⁰Nya alai, iya ngempuruka semua pangan iya, lalu bejaku enggau sida, “Aku enda ulih tinduk lalu ati aku tusah sereta irau.

¹¹Terubah iya aku nanya diri empu nama kebuah penusah tu majak ninggang aku taja aku manah lalu dikarinduka orang sekumbang aku ke megai perintah.

¹²Tang diatu aku ingatka semua penyai ti digaga aku di Jerusalem, ngerampas semua barang mas enggau pirak ari Rumah Sembiang, lalu enggau nadai kebuah aku munuh orang Judea.

¹³Aku nesal laban ketegal semua penyai nya aku ditinggang penusah tu. Diatu aku deka parai ba menua orang enggau ati ti tusah.”

¹⁴Udah nya, raja ngangauka pangan iya Philip, lalu nuduh iya merintah semua menua ti diperintah raja.

¹⁵Raja nyerahka makuta, baju panjai enggau tinchin iya ngagai Philip, lalu ngasuh ngajar anak iya, Antiokus ngambika ila nyadi raja.

¹⁶Raja Antiokus Keempat pen parai dia dalam taun 149.

¹⁷Lebuh Lisias ninga raja udah parai, iya lalu ngangkatka Antiokus ke agi biak nyadi raja. Kenyau ari mit iya diajar Lisias. Diatu raja nya diberi nama Eupator.

¹⁸Maya nya soldadu munsuh dalam kuta di Jerusalem nutup jalai orang Israel ngelingi Rumah Sembiang. Sida enda ngetu ngenusah orang Israel lalu nyukung orang bansa bukai.

¹⁹Ketegal nya Judas lalu mutus ati deka ngalahka sida. Iya ngempuruka semua rayat nyerang kuta nya.

²⁰Sida begempuru lalu nyerang kuta nya dalam taun 150. Sida ngaga panggau asur enggau kayu penikau kena nyerang.

²¹Tang sekeda munsuh enggau sekeda bansa Judah ke setanah enggau munsuh ulih ngelepaska diri ari diserang,

²²sida betemu enggau raja lalu bejaku, “Ni pengelama nuan agi nganti endur nuan negika adat, lalu malas penyai ti udah digaga sida nya ngagai bala kami?

²³Kami udah gawaka apai nuan ari peneka kami empu, nitihka semua jaku enggau atur iya.

²⁴Tang ketegal semua utai nya, kami nyadi munsuh bansa kami empu, lalu kuta kami diserang. Sida sampai munuh barang sapa ari bala kami ke ditemu sida, lalu ngambi reta tengkira kami.

²⁵Nambahka nya, ukai kami aja ke diserang sida tang mega pelilih menua ngelingi sida.

²⁶Diatu sida udah nyerang kuta di Jerusalem laban deka ngerampas iya. Sida mega udah ngeringka Rumah Sembiang enggau nengeri Bet-Sur.

²⁷Enti nuan enda nyekat sida, balat agi sida ngerusak, lalu nuan empu enda ulih nagang sida agi.”

²⁸Lebuh raja ninga berita nya, iya lalu ringat. Raja ngempuruka semua pangan iya, bala tuai perang enggau bala pemesai soldadu ke bekuda.

²⁹Raja mega ngaji mayuh raban soldadu ari perintah menua bukai enggau ari mayuh pulau di Tasik Tengah.

³⁰Penyampau bala soldadu raja ke bejalai kaki 100,000 iku, sida ke bekuda 20,000 iku enggau 32 iku gajah ti udah dilatih kena betempuh.

³¹Sida nengah pelilih menua Idumea lalu nyerang nengeri Bet-Sur. Sida ngaga mayuh kayu penikau enggau panggau asur kena beperang lalu betempuh dia besari-sari. Tang orang ke empu nengeri ti diserang sida betempuh enggau gagah berani. Sida pansut ari nengeri lalu nunu mayuh panggau asur.

³²Udah nya Judas mansutka raban soldadu iya ari kuta di Jerusalem, lalu belangkau ba Bet Sekariah betunga enggau bala soldadu raja.

³³Tumu-tumu pagi hari siti, raja ngasuh bala soldadu iya sertai angkat mansang ke Bet Sekariah. Bala soldadu ke besedia deka betempuh udah betusun, terumpit pen lalu disepu.

³⁴Bala gajah ti udah disediaka kena betempuh, diumpan ngena ai buah anggur enggau ai buah strawberi.

³⁵Semua jelu ti besai nya diengkah entara baris bala soldadu. Tiap iku gajah diring 500 iku orang ke dipilih ari raban soldadu ke bekuda enggau 1,000 iku orang ke ngena baju perang besi ti berantai enggau ketapu engkeraju.

³⁶Raban sida nya mesti ba mua tiap iku gajah. Kini-kini tunga gajah bejalai, sida mesti nitihka iya, lalu enda tau sekali-kali ninggalka jelu nya.

³⁷Siti menara kayu ti tegap dipasang ba atas belakang tiap iku gajah. Menara nya nyadi endur belindung empat iku soldadu enggau siku manang ke nepan gajah nya.

³⁸Raban bekuda bukai diengkah raja ba kiba enggau kanan raban soldadu ngambika ulih nyaga raban soldadu ke bejalai kaki lebuh sida nya ngachau munsuh.

³⁹Pancar matahari ti dipantulka terabai mas enggau engkeraju baka api sempun meri penampak ngagai endur ti bebukit.

⁴⁰Sebagi ari bala soldadu raja ba sebelah lebak bukit, lalu sebagi da ba emperan ti baruh, tang semua sida nya betusun-tusun mansang.

⁴¹Semua orang takut sereta gegetar ninga munyi panjung, munyi senyata besengki enggau munyi redup kaki raban soldadu ti besai sereta kering.

⁴²Judas enggau bala raban soldadu iya mansang ngagai endur betempuh, lalu munuh 600 iku soldadu raja.

⁴³Orang siku benama Eleasar Avaran tepedaka siku gajah ti lebih besai ari gajah bukai, ngena baju perang perintah. Iya nyangka raja nepan ba gajah nya.

⁴⁴Enggau ati ti berani Eleasar belanda nuju gajah ti ditengah-tengah bala soldadu ke bejalai kaki. Benung iya mansang, iya munuh bala soldadu ari kiba kanan iya nyentukka bala soldadu ke di sepiak-sepiak iya nyurutka diri. Eleasar lalu tama ke baruh gajah nya, sereta numbuk iya sampai mati. Gajah ti mati nya rebah ke tanah ninggang Eleasar ti ngujungka iya parai mega. Baka nya meh Eleasar meri nyawa diri ngidupka bansa iya empu, lalu iya bulih nama manah ke selama-lama iya.

⁴⁵

⁴⁶

⁴⁷Tang orang Judah meda bala soldadu raja kering sereta ngenjing deka beperang. Nya alai, bala soldadu bansa Judah lalu nyurutka diri.

⁴⁸Udah nya, bala soldadu raja mansang ke Jerusalem deka nyerang bansa Judah. Sida nyerang serata menua pigai Judea enggau Jerusalem.

⁴⁹Raja pen lalu bebaik enggau orang Judah di Bet-Sur. Seninjik bendar taun nya taun Sabat, lalu maya nya sida enda tau betanam. Ketegal nya, utai dempa sida enda chukup kena sida ngetan diri ari diserang. Nya alai, sida lalu ninggalka nengeri nya.

⁵⁰Nya alai, raja lalu ngerebut nengeri Bet-Sur. Iya ngengkah siti raban soldadu ngambika nyaga endur nya.

⁵¹Udah nya iya ngelingi lalu ngerampas Rumah Sembiang. Iya ngasuh orang ngaga panggau asur, kayu penikau enggau setik kena nikauka api enggau batu.

⁵²Orang bansa Judah mega ngaga senyata kena nyilat senyata munsuh. Perang nya lama amat.

⁵³Pemakai ti disimpan ba Rumah Sembiang udah abis laban maya nya taun Sabat, lalu pemakai nya abis dempa orang Judah ke belalai ari bansa bukai di Judea.

⁵⁴Ketegal penusah lapar pungkang nya, mayuh orang pambar ngagai endur sida empu, lalu semina mimit aja orang ke tinggal ba Rumah Sembiang.

⁵⁵Lebuh maya nya, Lisias ninga Philip enggau soldadu perintah udah pulai ari Persia enggau Media. Lebuh Raja Antiokus agi idup, Philip nya meh ke diasuh iya ngajar anak iya nyadi raja. Lisias mega ninga Philip bisi ati deka ngerampas kuasa perintah.

⁵⁶

⁵⁷Nya alai, Lisias lalu mai sida angkat enggau jampat. Iya bejaku enggau raja, bala tuai perang enggau bala nembiak iya, “Hari siti ngagai hari siti kitai tu nyau lemi selemi. Bekal kitai nyau mimit semimit. Endur ti deka dialahka kitai tu kering bendar. Kelimpah ari nya, bisi pekara perintah ti patut diaduka kitai enggau jampat.

⁵⁸Nya alai, manah agi kitai bebaik enggau orang Judah enggau semua bansa sida.

⁵⁹Kitai deka ngasuh sida nitihka adat sida empu baka dulu suba. Ketegal kitai madamka undang-undang enggau adat sida, nya kebuah sida ringat lalu ngepunka penyarut tu.”

⁶⁰Raja enggau bala tuai perang iya setuju enggau penemu nya. Nya alai, Lisias lalu mansutka penemu mai bebaik ngagai bansa Judah, lalu sida nerima penemu nya.

⁶¹Udah raja enggau bala tuai perang iya besumpah madahka diri bepegai ba semaya sida, nya baru orang Judah pansut ari kuta sida.

⁶²Tang lebuh raja tama ngagai rampa endur Rumah Sembiang ba Bukit Sion sereta meda kuta nya tegap, iya bula ke semaya diri, lalu ngasuh dinding ngelingi Rumah Sembiang nya dirubuh.

⁶³Udah nya iya enggau jampat ninggalka endur nya lalu pulai ke Antiok. Din iya nemu Philip bekuasa ba nengeri nya. Raja lalu nyerang nengeri nya sereta ngerampas iya ngena jalai pejal.