Read Iban 1 Makabi 7 Bible Online

1 Makabi 7 - Iban bible

1 Makabi 7

¹Dalam taun 151 Demetrius anak Seleukus angkat ari nengeri Rom. Iya enggau sekeda orang sangkai ba siti nengeri di pantai Tasik Mediterranean, lalu nyiri diri nyadi raja dia.

²Lebuh Raja Demetrius tama ke istana aki ini iya, bala iya nangkap Antiokus Kelima enggau Lisias deka mai seduai nya ngagai iya.

³Tang lebuh Demetrius ninga nya, ku iya, “Aku enggai meda seduai nya.”

⁴Seduai nya dibunuh, lalu Demetrius duduk ba kerusi raja.

⁵Udah nya semua orang Israel ke udah limpang ari Allah Taala betemu enggau Demetrius. Sida diuluka Alkimus ke deka nyadi Imam Besai.

⁶Ba mua raja sida betenahka bansa diri empu. Ku sida, “Judas enggau bala menyadi iya udah munuh semua orang ke nyukung nuan. Kami mega diburu sida ari nengeri kami.

⁷Kami minta nuan ngirumka orang ke tau dipechaya meresa semua pengerugi kami enggau menua ti diperintah nuan, lalu ukum meh Judas, bala menyadi iya enggau semua orang ke nyukung sida.”

⁸Demetrius lalu milih siku pangan iya benama Bakhides, gabenor Siria Besai. Iya orang ke pemadu beguna dalam perintah, lalu talukka raja.

⁹Bakhides dikirum begulai enggau Alkimus, siku orang ke jai diasuh raja mangku pengawa Imam Besai. Sida diasuh malas dendam ngagai orang Judah.

¹⁰Sida ninggalka Antiokia enggau siti raban ti besai, lalu datai di Judea. Bakhides ngirumka sekeda orang ngaga diri mai bebaik kena nipu Judas enggau bala menyadi iya.

¹¹Tang lebuh Judas meda bala soldadu mayuh amat, iya enda arapka utai ti disebut sida ke dikirum Bakhides.

¹²Seraban pengajar Adat Moses betemu enggau Alkimus seduai Bakhides minta diatur enggau lurus.

¹³Sida nya meh orang bansa Judah ke arapka Allah Taala ke dulu nguji bebaik enggau Alkimus seduai Bakhides. Sida nya meh dikumbai Hasida.

¹⁴Ku runding sida, “Alkimus imam peturun Aron udah datai enggau raban nya. Iya tentu enda jai enggau kitai.”

¹⁵Bakhides mega bejaku manah enggau sida. Iya sampai besumpah, “Menyadi, kami nadai ati jai enggau kita tauka enggau kaban belayan kita.”

¹⁶Tang udah sida arapka iya, 60 iku ari sida nya ditangkap iya. Semua sida nya dibunuh magang sehari nya baka ti ditulis dalam Bup Kudus,

¹⁷“Darah orang ke arapka Allah Taala naya, lalu bangkai sida betegaring ngelingi Jerusalem, lalu nadai siku orang nguburka sida.”

¹⁸Udah utai nya nyadi, semua rayat takut amat ke Alkimus seduai Bakhides. Ku sida, “Seduai nya enda nemu tuku pengamat enggau pengelurus. Seduai bejamin ngena sumpah lalu udah nya seduai ke mungkir.”

¹⁹Udah nya Bakhides ninggalka Jerusalem lalu nirika langkau di Betzeta. Iya minta awakka mayuh orang Judah, orang ke setanah enggau iya, nyengkaum sekeda rayat ditangkap sereta dibunuh, lalu bangkai sida diasuh iya buai ngagai telaga ti dalam.

²⁰Bakhides ngasuh Alkimus nguasa menua nya. Iya mega ninggalka sekeda raban soldadu ngambika nulung Alkimus, lalu iya empu pulai ngagai raja.

²¹Udah nya Alkimus belabuh ngemansangka penuduk diri nyadi Imam Besai.

²²Iya disukung ulih semua orang Judah ke rindu ngachau bansa diri empu. Sida mujur ngerampas menua Judea, lalu mai mayuh penusah ngagai orang Judah.

²³Judas nyau nemu penyai ti digaga Alkimus enggau bala iya balat agi ari penyai ti dikereja bansa bukai.

²⁴Nya alai iya mansang ngagai serata menua Judea laban deka malas penyai orang ke setanah enggau munsuh ngambika nagang sida ninggalka semua nengeri lalu pansut ngagai menua pesisir.

²⁵Alkimus meda Judas enggau nembiak iya nyau kering-sekering, lalu iya nemu diri enda ulih ngelaban sida. Nya alai, iya pulai ngagai raja laban deka nusi penyai sida nya.

²⁶Udah nya raja ngirumka Nikanor, siku ari tuai perang raja ke tebilang ke benchi meda orang Judah lalu ngumbai sida nya munsuh iya. Raja ngasuh iya ngalahka bansa Judah.

²⁷Nikanor datai di Jerusalem enggau siti raban soldadu ti besai. Ngena jalai tipu iya ngenataika perambu mai Judas enggau bala menyadi iya bebaik. Ku iya,

²⁸“Kitai enda tau beperang enggau pangan diri. Aku deka mai sekeda orang nemuai laban deka bekaban enggau nuan.”

²⁹Nya alai Nikanor lalu nemuai ngagai Judas, lalu seduai iya betabi enggau ati ti manah. Tang bala munsuh Judas udah besedia deka nangkap iya.

³⁰Lebuh Judas nemu Nikanor datai deka nipu iya, iya takut lalu enggai agi betemu enggau Nikanor.

³¹Meda atur iya udah ditemu orang, Nikanor mansang laban deka betempuh enggau Judas semak Kafarsalama.

³²Kurang lebih 500 iku bala Nikanor parai, lalu sekeda ngerarika diri ke kuta di Jerusalem.

³³Nyau kelama udah nya, Nikanor mansang ngagai Bukit Sion. Sekeda imam enggai tuai-tuai raban bansa pansut ari Rumah Sembiang laban deka nyambut iya enggau ati manah. Sida mandangka piring ti diberi ngarika raja. Persembilian nya dikena ngenyenangka ati Tuhan.

³⁴Tang Nikanor ngelese, ketawa sereta mantah sida. Iya bejaku enggau sumbung

³⁵sereta besumpah enggau ati ringat, “Enti sekali tu Judas enggau bala soldadu iya enda diserah ngagai aku, Rumah Sembiang tu deka ditunu aku lebuh aku pulai enggau selamat ila.” Udah nya iya angkat enggau ati ti ringat.

³⁶Udah nya sida imam tama ke tengah laman lalu bediri nunga mija alta enggau Rumah Sembiang. Enggau sabak-sabak sida besembiang,

³⁷“O Tuhan, Rumah Sembiang tu udah dipilih Nuan nyadika enggi Nuan lalu nyadi rumah endur besembiang enggau endur ngenataika peminta nembiak Nuan.

³⁸Balas meh penyai orang nya enggau bala soldadu iya. Ingat meh baka ni sida bejai Nuan. Anang ngelakka sida idup tang asuh parai maya betempuh.”

³⁹Nikanor ninggalka Jerusalem lalu belangkau di Bet-Horon. Dia bala soldadu Siria begulai enggau iya.

⁴⁰Lebuh maya nya, Judas belangkau di Adasa enggau 3,000 iku orang. Iya lalu besembiang munyi tu,

⁴¹“O Tuhan, lebuh orang ke diasuh raja Asyur bejai Nuan, melikat Nuan datai lalu munuh 185,000 iku orang ari raban soldadu sida.

⁴²Baka nya mega, alahka bala soldadu munsuh nya seharitu, ngambika semua orang nemu Nikanor ngeleseka Rumah Nuan ti kudus. Ukum meh iya setimpak enggau penyai iya.”

⁴³Perang nyadi kena tiga belas haribulan Adar, bala soldadu Nikanor alah. Nikanor empu orang ke dulu parai lebuh perang nya.

⁴⁴Lebuh bala soldadu iya meda Nikanor udah parai, sida nikauka senyata, lalu ngerarika diri.

⁴⁵Orang bansa Judah ngagai sida sehari-hari nya ari nengeri Adasa ke nengeri Geser nyepu terumpit.

⁴⁶Semua orang di menua Judea pansut lalu nyerang munsuh ari tiap sukut, nyentukka munsuh nyurutka diri lalu ulih ditangkap. Semua bala soldadu munsuh dibunuh enggau pedang, lalu nadai siku sida idup.

⁴⁷Udah nya orang Judah ngambi reta tengkira ti dirampas. Sida mumpung pala Nikanor lalu netak lengan kanan iya ti diangkatka iya enggau sombong suba. Pala enggau lengan nya digitang semak Jerusalem ngambika dipeda semua orang.

⁴⁸Bansa Judah gaga amat, lalu hari nya dintu sida enggau naka pengerami.

⁴⁹Nya alai tiga belas haribulan Adar ditetapka nyadi siti hari besai ti mesti dikingatka tiap taun.

⁵⁰Udah nya menua Judea bisi pemaik chukup lama.